ކުޅުދުއްފުށި ސިޓީގެ އިންތިޚާބީ ދާއިރާތައް ކަނޑައަޅާފައިވާ ގޮތުގެ ވަގުތީ ރިޕޯޓާއި އިންތިޚާބީ ދާއިރާތަކުގެ ނަންތަކަށް ޚިޔާލު ހުށަހެޅުމަށް ހުޅުވާލާފައިވާ ފުރުޞަތުގެ މުއްދަތު އިލެކްޝަންސް ކޮމިޝަނުން އިތުރު ކޮށްފިއެވެ.
ވަގުތީ ރިޕޯޓަށް ޝަކުވާ ހުށަހެޅުމުގެ ފުރުސަތު ކުރިން ހަމަވާ ގޮތަށް އޮތީ މިއަދު ހެނދުނު 9:00 އިން ފެށިގެން މެންދުރު ފަހު 3:00 އާ ހަމައަށެވެ. އެ ފުރުސަތު މިހާރު ވަނީ މިރޭ 9:00 އަށް އިތުރު ކޮށްފައެވެ.
އެ ރިޕޯޓަށް ޝަކުވާ ހުށަހެޅޭނީ ދެގޮތަކަށެވެ. އެއީ ސިޓީ މެދުވެރިކޮށްގެންނާއި އިލެކްޝަންސް ކޮމިޝަންގެ އީމެއިލް މެދުވެރި ކޮށެވެ. ސިޓީ މެދުވެރިކޮށް ޝަކުވާ ބަލައިގަންނަނީ ބައުޖަމާލުއްދީން ގައި ހުންނަ އިންތިޚާބާ ބެހޭ މަރުކަޒުންނެވެ.
ކުޅުދުއްފުށި ސިޓީގެ އިންތިޚާބީ ދާއިރާތައް ކަނޑައެޅުމަށްފަހު އެ ދާއިރާތަކުގެ ނަންތަކަށް ޚިޔާލު ހުށަހެޅުމުގެ ފުރުޞަތުގެ މުއްދަތު ވެސް ހަމަވާން އޮތީ މެންދުރު ފަހު 3:00 އަށެވެ. އެ މުއްދަތުވެސް މިހާރުވަނީ މިރޭ 9:00 އަށް އިތުރުކޮށްފައެވެ.
އިލެކްޝަންސް ކޮމިޝަންގެ އީމެއިލް، ޓުވިޓަރ، ފޭސްބުކު މެދުވެރިކޮށް ޚިޔާލު ހުށަހެޅޭނެ ކަމަށް އެކޮމިޝަނުން ވަނީ ވިދާޅުވެފައެވެ.
