މިއަހަރު ބޭއްވުމަށް ހަމަޖެހިފައިވާ ލޯކަލް ކައުންސިލް އިންތިޚާބާއި އަންހެނުންގެ ތަރައްގީއަށް މަސައްކަތްކުރާ ކޮމިޓީގެ އިންތިޚާބީ ދާއިރާ ތަކުގެ ނަންތަކަށް ޚިޔާލު ހުށަހެޅުމުގެ ފުރުސަތު އިލެކްޝަންސް ކޮމިޝަނުން ހުޅުވާލައިފިއެވެ.
އެކޮމިޝަނުންވަނީ ކުޅުދުއްފުށި ސިޓީގެ އިންތިޚާބީ ދާއިރާތައް ކަނޑައަޅާފައިވާ ގޮތުގެ ވަގުތީ ރިޕޯޓު ވެސް އާންމުކޮށް އެއަށް ވެސް ޝަކުވާ ހުށަހެޅުމުގެ ފުރުސަތު ވެސް ހުޅުވާލައްވައިފައެވެ.
އެރިޕޯޓު މިހާރުވަނީ ސަރުކާރުގެ ގެޒެޓާއި އިލެކްޝަސްން ކޮމިޝަންގެ ވެބްސައިޓުގައި ޢާއްމު ކޮށްފައެވެ.
މި ރިޕޯޓަށް ޝަކުވާ ހުށަހެޅުމުގެ ފުރުސަތު އޮތީ މިއަދު ހެނދުނު 9:00 އިން ފެށިގެން މެންދުރު ފަހު 3:00 އާ ހަމައަށެވެ. ރިޕޯޓަށް ޝަކުވާ ހުށަހެޅޭނީ ދެގޮތަކަށެވެ. އެއީ ސިޓީ މެދުވެރިކޮށްގެންނާއި އީލެކްޝަންސް ކޮމިޝަންގެ އީމެއިލް މެދުވެރި ކޮށެވެ. ސިޓީ މެދުވެރިކޮށް ޝަކުވާ ބަލައިގަންނަނީ ބައުޖަމާލުއްދީން ގައި ހުންނަ އިންތިޚާބާ ބެހޭ މަރުކަޒުންނެވެ.
ކުޅުދުއްފުށި ސިޓީގެ އިންތިޚާބީ ދާއިރާތައް ކަނޑައެޅުމަށްފަހު އެ ދާއިރާތަކުގެ ނަންތަކަށް ޚިޔާލު ހުށަހެޅުމުގެ ފުރުޞަތު ވެސް ހުޅުވާލައިފައިވަނީ މިއަދު ހެނދުނު 9:00 އިން މެންދުރު ފަހު 3:00 އަށެވެ.
އިލެކްޝަންސް ކޮމިޝަންގެ އީމެއިލް، ޓުވިޓަރ، ފޭސްބުކު މެދުވެރިކޮށް ޚިޔާލު ހުށަހެޅޭނެ ކަމަށް އެކޮމިޝަނުން ވަނީ ވިދާޅުވެފައެވެ.
