ރާއްޖޭގެ ގިނަ ރިސޯޓުތަކުން ސާވިސްޗާޖު ބެހުމުގައި ޤާނޫނާއި ޤަވާޢިދުތަކަށް ޢަމަލުކުރަމުންދާ ކަމަށް މޯލްޑިވްސް އެސޯސިއޭޝަން އޮފް ޓޫރިޒަމް އިންޑަސްޓްރީ (މަޓީ) އިން ވިދާޅުވެއްޖެއެވެ.
މަޓީން ވިދާޅުވެފައިވަނީ އެފަދަ ގާނޫނާއި ގަވާއިދާ އަބަދުވެސް އަމަލު ކުރަމުންދާ ކަމަށް އެތަނުން ގަބޫލު ކުރައްވާ ކަމަށެވެ. "މަޓީން އަބަދުވެސް އިލްތިމާސް ކުރަނީ ހުރިހާ ފަރާތްތަކުން ވެސް ޤާނޫނާއި ޤަވާއިދުތަކަށް ޙުރުމަތްތެރިކޮށް ހިތުމަށެވެ. މި ގޮތުން ސާވީސް ޗާޖޭބެހޭ ގަވާއީދަށް ވެސް ފުރިހަމައަށް އަމަލު ކުރުމަށެވެ." މަޓީން ވިދާޅުވެފައިވެއެވެ.
މަޓީގެ ބަޔާނުގައި ވިދާޅުވެފައިވަނީ ދިވެރާއްޖޭގައި ހިންގަމުންދާ ރިސޯޓުތަކަކީ އެކިފަންތިއަށް އަދި އެކި ގިންތިއަށް ނިސްބަތްވާ ރިސޯޓުތަކެއް ކަމަށެވެ. އަދި ދެވޭ ޚިދުމަތްތަކުގެ ގޮތުންނާއި އަގުގެ ގޮތުން ވަރަށް ތަފާތުބޮޑު ތަންތަން ކަމަށްވެސް ވިދާޅުވެފައިވެއެވެ. މުވައްޒަފަކަށްޖެހޭ ސާވިސްޗާޖު ވެސް ހިސާބު ކުރެވެނީ އެރިސޯޓަކަށް އާމްދަނީ ލިބޭވަރާއި އެރިސޯޓުގައި މަސައްކަތްކުރާ މުވައްޒަފުންގެ އަދަދުން ކަމަށް ވެސް ވިދާޅުވެފައިވެއެވެ.
ދިވެހިރާއްޖޭގެ ފަތުރުވެރިކަމުގެ ސިނާއަތަކީ މިވަގުތު ދިވެހިރާއްޖެއަށް އެންމެ މުހިންމު ސިނާއަތް ކަމަށާއި، އެސިނާއަތަކީ މުޅި ދިވެހިރާއްޖެ ބަރޯސާ ވެގެންތިބި ސިނާއަތެއް ކަމަށް ވެސް ވިދާޅުވެފައިވެއެވެ. މިސިނާއަތަށް އަންނަ ކުރިއެރުމަކީ މުޅި ދިވެހިރާއްޖެއަށް ލިބޭ ކުރިއެރުމެއް ކަމަށާއި ހަމައެގޮތަށް އެ ސިނާއަތަށް ލިބޭ ހީނަރުކަމަކީ ވެސް އޭގެ އަސަރު ހުރިހާ ދިވެހީންނަށް ކުރާނެ ކަމެއް ކަމަށް ވިދާޅުވެފައިވެއެވެ.
