ޖަލުތައް އިސްލާހު ކުރުމަށް ގާބިލް މީހުން އިސްކުރަން ޖެހޭ ކަމަށް ރައްޔިތުންގެ މަޖިލީހުގެ ބ. ކެންދޫ ދާއިރާގެ މެމްބަރު ޢަލީ ޙުސައިން ވިދާޅުވެއްޖެއެވެ.
އޭނާ ކުރެއްވި ޓުވީޓެއްގައި ވިދާޅުވެފައިވަނީ ޖަލުތައް އިސްލާހު ކުރެއްވުމަކީ ސަރުކާރުގެ އެންމެ ބޮޑު އެއް ވަޢުދު ކަމަށެވެ. އެހެންނަމަވެސް އެމަސައްކަތް އެންމެ ރަނގަޅަށް ހިނގަމުންދާ ތަނެއް ނުފެންނަ ކަމަށް ވިދާޅުވިއެވެ. "ޖަލުތައް އިސްލާހު ކުރުމަށްޓަކައި ޖަލު ހިންގުމަށް ގާބިލް އަދި ޕްރޮފެޝަނަލް މީހުން އިސްކުރަންޖެހޭ ކަމަށް ދެކެން،" އޭނާ ވިދާޅުވެފައިވެއެވެ.
ޢަލީ ޙުސައިން މިފަދަ ޓުވީޓެއް ކުރެއްވީ މާލޭ ޖަލުގައި ގައިދީން ބަނޑުހައިހޫނު ކަމުގެ ހަޅުތާލެއް ފަށައިގެން އުޅޭކަމުގެ އަޑުތަކެއް ފެތުރިފައި ވަނިކޮށްނެވެ. އަދި ބައެއް ގައިދީންނަށް ޖަލުގައި އަނިޔާ ކުރަމުންދާ ކަމަށް ވެސް އަޑު ފެތުރިފައިވަނިކޮށްނެވެ.
ޤާނޫނޫ ވަކީލް ޢަބްދުﷲ ޙަސީން ކުރައްވާފައިވާ ޓޫވީޓެއްގައި ވިދާޅުވެފައިވަނީ އޭނާގެ ކުލައިންޓަކަށް ޖަލުގައި އަނިޔާކޮށްފި ކަމަށެވެ. "އަޅުގަނޑުގެ ކުލައިންޓު ޒިހާން އިސްމާޢީލަށް އިއްޔެ މާލޭ ޖަލުގައި އަނިޔާކޮށްފި. އަނިޔާކުރި ތަންތަން އެހެރޭ ފެންނަން،" ޙާސިން ވިދާޅުވެފައިވެއެވެ.
މިކަމާ ގުޅިގެން ކަރެކްޝަނަލް ސާވިސް އިން ވިދާޅުވީ ޖަލުގެ ބައެއް ގޮޅިތަކުގެ ގައިދީން ކާއެއްޗެހި ނުނެގުމަކީ ޢާއްމު ކަމެއް ކަމަށެވެ. އެހެންކަމުން އެއީ ޖަލުގައި ބަނޑުހައިހޫނު ކަމުގެ ހަޅުތާލެއް ކުރުން ކަމަށް ނުބެލެވޭނެ ކަމަށެވެ. މީޑިއާއިން މައުލޫމާތު ފެތުރުމުގެ ކުރިން އެކަން ކަށަވަރު ކުރުމަށް އެދޭ ކަމަށް ވެސް އެތަނުން ވަނީ ވިދާޅުވެފައެވެ. މީހުންނަށް ޖަލުގައި އަނިޔާކުރާ ވާހަކަތަކަށް ވެސް އެތަނުންވަނީ އިންކާރު ކުރައްވައިފައެވެ.
