ގދ. ގައްދުއާއި ތ. ތިމަރަފުށީ މަގުހެދުމުގެ މަޝްރޫޢުން ރޯޑުޑިވެލޮޕްމެންޓް ކޯޕަރޭޝަނުގެ ސްޕީޑު ފެނިގެންދާނެ ކަމަށް އެކުންފުނިން ވިދާޅުވެއްޖެއެވެ.
ރޯޑުޑިވެލޮޕްމެންޓް ކޯޕަރޭޝަން (އާރުޑީސީ) ގެ މެނޭޖިން ޑިރެކްޓަރ މޫސާ އަލިމަނިކު މިރޭ ވިދާޅުވީ އެއްފަހަރާ 10 ރަށުގެ މަގުހެދުމުގެ ގާބިލއްޔަތުކަން ކުންފުނީގައި މިހާރުވެސް އެބަހުރި ކަމަށެވެ. މިއަހަރު ނިމޭއިރު އެކުންފުނިން 30 ރަށެއްގައި މަސައްކަތް ކުރިއަށްދާނެ ކަމަށް ވިދާޅުވިއެވެ. އެކުންފުނީގެ މުވައްޒަފުން ވެސް ތިބީ އަވަހަށް މަސައްކަތް ނިންމުގެ ވިސްނުމުގައި ކަމަށް އޭނާ ވިދާޅުވިއެވެ. "އަޅުގަނޑުމެންގެ ސްޕީޑު ގައްދު އަދި ތިމަރަށްފުށީގެ ޕްރޮޖެކްޓުން ފެނިގެންދާނެ އިރާދަކުރެއްވިއްޔާ. މުވައްޒަފުން ވެސް ތިބީ އެގޮތަށް،" އޭނާ ވިދާޅުވިއެވެ.
އެމްޑީ ވިދާޅުވީ ކުންފުނީގެ މަސައްކަތް ކުރިއަށް ގެންދާނީ ލާމަރުކަޒު ކޮށްގެން ކަމަށެވެ. އެގޮތުން ރާއްޖެ ފަސް ސަރަހައްދަކަށް ބަހާލައި އެ ސަރަހައްދެއްގެ މަޝްރޫއު އެސަރަހައްދެއްގެ އޮފީހުން ކުރިއަށް ގެންދާގޮތަށް ހަމަޖައްސަވާނެ ކަމަށް އޭނާ ވިދާޅުވިއެވެ. އެގޮތަށް ހެދުމުން މަސައްކަތްތައް ލުއިވެ ފަސޭހަވެ ރައްޔިތުންނަށް ބޭނުންވާ ޚިދުމަތް ރައްޔިތުންގެ ގާތުން ދެވޭނެ ކަމަށް އުންމީދު ކުރައްވާ ކަމަށް އޭނާ ވިދާޅުވިއެވެ.
އޭނާ ވިދާޅުވީ ރާއްޖޭގެ ރަށްރަށުގެ މަގުތަކަށް ދިމާވެފައިވާ މައްސަލަތަކަކީ އެހެން މައްސަލަތަކުގެ ހައްލުކަމަށް ވެސް ވެގެންދާނެ ކަމަށެވެ.
