އާސަންދަ ކުންފުނިން ހުޅުމާލެ ހޮސްޕިޓަލް ހިންގުން މިއަދު ފެށިގެން ހުއްޓާލައިފި ކަމަށް އެކުންފުނިން ވިދާޅުވެއްޖެއެވެ. އެކުންފުނިން ވިދާޅުވީ އެކަން އެގޮތަށް ނިންމަވައި ހުސްވި ޑިސެމްބަރު މަހު 26 ވަނަ ދުވަހު ރައީސް އޮފީހުން އެކަން އަންގަވާފައި ވާކަމަށެވެ.
އާސަންދަ ކުންފުނިން ހުޅުމާލެ ހޮސްޕިޓަލް ހިންގަ ފަށާފައިވަނީ 2016 ވަނަ އަހަރުގެ އެވެ. އެތަނުން އެ ހޮސްޕިޓަލް ހިންގެވިއިރު ވަނީ ތަނަށް ކުރިއެރުން ހޯދައިދީފައެވެ.
އެ ހޮސްޕިޓަލް ހިންގުން އެކުންފުނިން ވަކިކޮށް ދެން ހިންގަން ހަވާލުކުރާނީ ކޮންބަޔަކާ ކަމެއް އަދި އެނގިފައެއް ނުވެއެވެ. އިންޑިއާ ކުންފުންޏަކާ ވެސް އެ ހޮސްޕިޓަލް ހިންގުން ހަވާލުކުރަން އުޅުނު ކަމުގެ ޚަބަރު ކުރިން ފެތުރުނެވެ. މިކަމާ ބެހޭ އިތުރު މައުލޫމާތެއް އަދި ސާފެއް ނުވެއެވެ.
