މިސްރުގެ އުތުރުގެ ރަށެއް ކަމުގައިވާ ޕޯޓު ސައީދު (ބޫރް ސަޢީދު) ގެ ހައިވޭއެއްގައި މިނީ ބަހަަކާއި ޓްރަކެއް ޖެހިގެން ހިނގި އެެކްސިޑެންޓެއްގައި 23 މީހުން މަރުވެ 7 މީހުން ޒަޚަމްވެެއްޖެއެވެ.
ނޫސްވެރިންނަށް މައުލޫމާތު ދެއްވި އޮފިޝަލަކު ވިދާޅުވި ގޮތުގައި އެކްސިޑެންޓުވެފައި ވަަނީ ޕޯޓް ސައީދުގެ ހެދުން އުފައްދާ ފެކްޓަރީއެއްގައި މަސައްކަތްކުރާ މީހުންނާއިގެން ދިމްޔާޠަށް އިއްޔެ ހަވީރު ދަތުރުކުރި މިނީ ބަހެކެވެ. ޕޯޓް ސައީދުއަކީ ގާހިރާގެ އުތުރުން 200 ކިލޯމީޓަރު ދުރުގައި އޮންނަ ރަށެެކެވެ.
ސަލާމަތީ ޚިދުމަތްތަކުން މައުލޫމާތުދޭ ގޮތުގައި، ލަފާކުރެވެނީ ކުރިމަތިން ދަތުރުކުރަމުން ދިޔަ ކާރަކުން ނައްޓައި ކުރިއަރަންވެގެން ޓްރަކް އެއްފަރާތަަކަށް އެރުމުން އަނެއްކޮޅުން ދަތުރުކުރަމުން އައި މިނީ ބަހުގައި ޖެހުނީ ކަމަށެވެ.
ޒަޚަމްވި މީހުން ކައިރި 3 ހޮސްޕިޓަލަށް ގެންދެވިފައި ވާއިރު، އެމީހުންނަށް ލިިބިފައި ވަނީ ސިކުނޑި ގުނޑުމާއި، ތަންތަން ބިނދުމާއި، ފުންކޮށް ކަނޑައިގެން ދިއުމާއި، މަށައިގެން ދިއުން ފަދަ ޒަޚަމްތަކެވެ.
ހަމަ އިއްޔެ މިސްރުގެ އެހެން ހިސާބެއްގައި ހިނގި އެކްސިޑެންޓެއްގައި 6 މީހަކު ވަނީ މަރުވެފައެވެ.
މި އެކްސިޑެންޓު ހިނގާފައި ވަނީ ގާހިރާގެ އިރުން 120 ކިލޯމީޓަރު ދުރުގައި، ރަތް ކަނޑުގެ އައްސޭރީގައި އޮންނަ އައިންސުޚްނާ ކައިރީގައި އޮންނަ ހައިވޭ އަކުން ދަތުރުކުރި ދެ ބަސް ޖެހިގެންނެވެ. މި އެކްސިޑެންޓުގައި މަރުވެފައި ވަނީ މިސްރު ތިން މީހުންނާއި، މެލޭޝިޔާ ދެ މީހުންނާއި، އިންޑިޔާ މީހެކެވެ. ޒަޚަމްވި 24 މީހުން ވަނީ ފަރުވާދިނުމަށް ކައިރި ހޮސްޕިޓަލްތަކަށް ގެންދެވިފައެވެ.
މިސްރުގެ ދަތުރުފަތުރާ ބެހޭ ވުޒާރާގެ ހިސާބުތައް ދައްކާ ގޮތުން ފާއިތުވި 2018 ވަނަ އަހަރު އެގައުމުގައި ބޮޑެތި 8 ހާސް އެކްސިޑެންޓު ހިނގާފައިވާއިރު، މި އެކްސިޑެންޓުތަކުގައި 3 ހާސް މީހުން މަރުވެ 12 ހާސް މީހުން ޒަޚަމްވެފައި ވެއެވެ.
