ޢިމާރާތް ކުރުމާބެހޭ މުހިންމު ތިން އުފެއްދުމެއް ރާއްޖޭގެ ބާޒާރަށް އެސްޓީއޯއިން މިއަދު ތަޢާރަފްކޮށްފިއެވެ.
އެސްޓީއޯއިން ވިދާޅުވީ މިއީ އިމާރާތްކުރުމުގެ ދާއިރާގެ މަސައްކަތްތަކަށް އިތުރު ލުއިފަސޭހަތަކެއް ގެނަސްދިނުމުގެ ގޮތުން ތަޢާރަފްކުރި ތިން އުފެއްދުމެއް ކަމަށެވެ.
ހޮޓެލްޖެންގައި މިއަދު ބޭއްވި ރަސްމިއްޔާތެއްގައި އެކުންފުނިން ތަޢާރަފްކޮށްފައިވަނީ ރެނާކޮން އޮޓޮކްލޭވް ކޮންކްރީޓް ބްލޮކާއި، ރެނާޕްލާސްޓް ރެޑީމިކްސް ޕްލާސްޓަރ އާއި، ރެނާބޮންޑް ޖޮއިނިން މޯޓަރ އެވެ.
ރެނާކޮން އޮޓޮކްލޭވް ކޮންކްރީޓް ބްލޮކަކީ ގޮނޑުދޮށުންނާއި ފަޅުތަކުން ވެލި ނަގައިގެން ރާއްޖޭގައި އާއްމުގޮތެއްގައި އުފައްދާ ގައު ނުވަތަ ސޮލިޑް ބްލޮކްތަކާ ޚިލާފަށް، ރިސައިކަލް ކޮށްފައިވާ ތަކެތިން އުފައްދާފައިވާ ތިމާވެއްޓާ ރައްޓެހި އެއްޗެއް ކަމަށް އެސްޓީއޯއިން ވިދާޅުވިއެވެ. އެއީ ޢިމާރާތުގެ ސްޓްރަކްޗަރއަށް ކުރާ ޚަރަދު ކުޑަކޮށްދީ، މަސައްކަތުގެ ސްޕީޑް އަވަސްކުރުމަށް އެހީތެރިވެދޭނެ އުފެއްދުމެއް ކަމަށް ވެސް އެކުންފުނީން ވަނީ ވިދާޅުވެފައެވެ. މިއީ ތާމަލް އިންސިއުލޭޝަން ހިމެނޭ، 2 ފޫޓު ދިގުމިނުގެ ގަލެކެވެ. މިގައު ނުވަތަ މިބްލޮކް ބޭނުންކޮށްގެން ހަދާ ޢިމާރާތްތަކުގެ ކަރަންޓަށް ކުރާ ޚަރަދު 20 ޕަސެންޓަށް ދަށްވާ ކަމަށް ވެސް އެސްޓީއޯއިން ވިދާޅުވިއެވެ.
ރެނާކޮން އޮޓޮކްލޭވް ކޮންކްރީޓް ބްލޮކާއިއެކު އެ ބޭނުންކޮށްގެން ރޭނުމަށްޓަކައި ބޭނުންކުރާ ރެނާބޮންޑް ޖޮއިނިން މޯޓަރ ވެސް އެސްޓީއޯއިން މިއަދު ވަނީ ބާޒާރަށް ނެރެފައެވެ. ސިމެންތިއާއި ވެލި އެއްކޮށްގެން އުފައްދާ މޯޓަރތަކާއި ޚިލާފަށް ރެނާބޮންޑް ޖޮއިނިން މޯޓަރަކީ، ބޭނުންވާ މިންވަރަށް ފެންއެޅުމަށްފަހު ވަގުތުން ބޭނުންކުރެވޭގޮތަށް ތައްޔާރުކޮށްފައިވާ އުފެއްދުމެކެވެ.
ރާއްޖޭގެ ބާޒާރުގައި ހިމުންވެލި ލިބުމަށް ދަތިވެފައިވާތީ އެކަމަށް ވެސް އެކުންފުނިންވަނީ ހައްލު ހޯއްދަވައި ދެއްވައިފައެވެ. އެކަމުގެ ޙައްލުގެ ގޮތުގައި ބާޒާރަށް ނެރުއްވީ "ރެނާޕްލާސްޓް ރެޑީމިކްސް ޕްލާސްޓާ" އެވެ. މި އުފެއްދުން ބޭނުން ކުރުމުން، ޚަރަދު ކުޑަ ގޮތަކަށް ޕްލާސްޓަރިންގގެ މަސައްކަތް ނިންމާލެވޭނެއެވެ. އަދި އިމާރާތުގެ ފިނިޝިންގ އަށްވެސް އިތުރު ފުރިހަމަކަމެއް ލިބިގެންދާނެ ކަމަށް އެކުންފުނިން ވިދާޅުވިއެވެ.
އެސްޓީއޯއިން މިހާރުވެސް ގެންދަވަނީ މާލެއާއި ހުޅުމާލޭގައި ރެޑީމިކްސް ކޮންކްރީޓްގެ ޚިދުމަތް ފޯރުކޮށްދެމުންނެވެ.
އެސްޓީއޯ ކޮންސްޓްރަކްޝަން މެޓީރިއަލްސް ބޮޑަށް ފާހަގަ ކުރެވިފައިވަނީ އިމާރާތްކުރުމުގެ ދާއިރާއަށް ބޭނުންވާ މުހިއްމު އައިޓަމްތައް ވަރަށް ހެޔޮއަގުގައި އާއްމު ރައްޔިތުންނަށާއި ވިޔަފާރިތަކަށް ފޯރުކޮށްދޭ ވަރުގަދަ އިތުބާރު ހިފޭ ކުންފުންޏެއްގެ ގޮތުގައެވެ.
