އިންޑޮނޭޝިޔާގެ ސުމަޓްރާގައި ފަރުބަދަ މަތިން ދަތުރުކުރަމުން ދިޔަ ބަހެއް ދެ ފަރުބަދަ ދެމެދުގައި އޮތް ފުން ވާދީއަކަށް ވެއްޓުމުގެ ސަބަބުން 24 މީހުން މަރުވެ، 13 މީހުން ޒަޚަމްވެއްޖެއެވެ.
ސުމަޓްރާގެ ޕަގަރް އާލަމް ސިޓީގެ ފުލުހުންގެ ތަރުޖަމާނު ޑޮލީ ގުމާރާ ބޭރުގެ ބައެއް ނިއުސް އެޖެންސީތަކަށް މައުލޫމާތޫ ދެއްވަމުން ވިދާޅުވި ގޮތުގައި ހޯމަ ދުވަހެގެރޭ ދަންވަރު އެ ސިޓީގެ ރަށް ބޭރު ހިސާބެއްގައި ދަތުރުކުރަމުން ދިޔަ ބަސް މަގުން ކައްސާލައިގެން ވެއްޓުނީ 500 ފޫޓު އަޑިއަށެވެ. އަދި ވެއްޓިގެން ގޮސް ޖެހުނީ އެ ވާދީގައި އޮތް ކޯރެއްގެ ތެރޭގައެވެ.
"ވާދީގެ ތެރެއަށް ވެއްޓުމުގެ ކުރިން، އެ ބަސް ކޮންކްރީޓް ބެރިޔާގައި ޖެހި އެ ބެރިޔާ ވަނީ ހަލާކުވެފައި. ބައެއް މީހުން އަދިވެސް ތިބީ ބަސް ތެރޭގައި ތާށިވެފައި." ގުމާރާ ވިދާޅުވިއެވެ.
ސިރިވަޖާޔާ ކޮންމެޕީގެ އެ ބަސް ބެންގްކުލޫ ޕްރޮވިންސުން ޕަގަރް އާލަމްއަށް ދިއުމަށް ދަތުރުފެށި އިރު އޭގައި ތިބީ 27 މީހުންނެވެ. އެހެންނަމަވެސް، ސަލާމަތްވި މީހުން ކިޔައިދިން ގޮތުގައި ބަސް ވެއްޓުނު އިރު ބަހުގައި ފަންސާހަކަށް މީހުން ތިއްބެވެ.
"ފަހަރެއްގައި ދަތުރުކުރަމުން އައި މަގުމަތީގައި ބަހަށް އިތުރު މީހުން އެރުވީ ކަމަށް ވެދާނެ. އިތުރު ބައެއް މީހުން ކޯރުގެ ތެރެއަށް ގެއްލިފައި ވުމަކީވެސް އެކަށީގެންވާ ކަމެއް." ފުލުހުންގެ ތަރުޖަމާނު ވިދާޅުވިއެވެ.
ސަލާމަތްވި މީހުން ޕަގަރް އާލަމްގެ ބާސިމާ ހޮސްޕިޓަށް ގެންދެވިފައިވާއިރު، އަންގާރަ ދުވަހު (މިއަދު) ހެނދުނު ވެސް އިތުރު މީހުން ފެނޭތޯ ދަނީ މަސައްކަތްކުރަމުންނެވެ. އެހެންނަމަވެސް، ބަސް ވެއްޓިފައި އޮތް ހިސާބަށް އުޅަނދުތަކުގައި ދަތުރުކޮށްފައި ދިއުން އުނދަގޫ ކަމުން މީހުން ހޯދުމުގެ މަސައްކަތް ވަނީ ލަސްވެފައެވެ.
އިންޑޮނޭޝިޔާގެ ޖާވާގައި ފާއިތު ފެބުރުވަރީ މަހު ބަހެއް ފަރުބަދަމަތިން ވެއްޓުމުގެ ސަބަބުން 27 މީހުން މަރުވެފައި ވެއެވެ.
