އިންޑިޔާގެ ގާނޫނުހަދާ މަޖިލީހުން އެގައުމުގެ ރަށްވެހިކަމުގެ ގާނޫނަށް އިސްލާހު ގެނައުމުގެ ގާނޫނު، ސިޓިޒެންޝިޕް އެމެންޑްމެންޓް އެކްޓް (ސީއޭއޭ) ފާސްކުރުމާ ގުޅިގެން އެގައުމުގައި ފެށި މުޒާހަރާތައް، އެކި ކަންކޮޅުތަކަށް ފެތުރި ވަރުގަދަވަމުން ދާއިރު، އެ މުޒާހަރާތަކުގައި މަރުވި މީހުންގެ އަދަދު މިހާރު ވަނީ 23 އަށް އަރާފައެވެ.
ފާއިތު ހަފުތާގައި ނިއުދިއްލީގެ އިސްލާމީ ޔުނިވަސީޓީއެއް ކަމަށްވާ، ޖާމިއާ މިއްލިއްޔާ އިސްލާމިއްޔާ ގައި ކުރި މުޒާހަރާއެއް ފުލުހުން ބާރުގެ ބޭނުންކޮށްގެން ރޫޅާލުމުގައި އެތައް ދަރިވަރުންނަށް ޖިސްމާނީ ބޮޑެތި އަނިޔާތަކެއް ކުރިއެވެ. މިކަމުގެ ސަބަބުން ދެން ފެތުރިގެން ދިޔަ މުޒާހަރާތަކަކީ އޭގެ 'ޑޮމިނޯ އެފެކްޓް' ކަމުގައި ބެލެއެވެ. ޑޮމިނޯ ފޮތި ބަރީގެ އެއް ފޮތި ވައްޓާލުމުން ބަރިއަކަށް ހުރިހާ ފޮތިތަކެއް ވެއްޓިގެން ދާހެން، މުޅި އިންޑިޔާއަށް މުޒާހަރާތައް ފެތުރިގެން ދިޔައީއެވެ.
މި މުޒާހަރާތަކުގައި އެންމެ ގިނަ މީހުން މަރުވެފައި ވަނީ އުއްތަރް ޕްރަދޭޝް ސްޓޭޓުގައެވެ. އެ ސްޓޭޓްގެ ފުލުހުންގެ ތަރުޖަމާނު ޕްރަވީން ކުމާރު ވިދާޅުވި ގޮތުގައި، އެ ސްޓޭޓްގައި މަރުވި މީހުންގެ އަދަދު ވަނީ 15 އަށް އަރާފައެވެ. "މަރުވި މީހުންގެ ގިނަ މީހުންނަކީ ޒުވާނުން" ކަމުގައި އޭނާ ވިދާޅުވިއެވެ.
ހުޅަނގުގެ ސްޓޭޓުތައް ކަމުގައިވާ ވެސްޓް ބެންގޯލް، އަސާމް އަދި އުތުރުގެ މެގަލަޔާ ސްޓޭޓާއި، އިރުމަތީގެ މަހާރާޝްޓްރަ ސްޓޭޓްގައި ބޮޑެތި މުޒާހަރާތައް ކުރިއަށް ދިޔަ ނަމަވެސް އެ ސްޓޭޓުތަކުގެ މުޒާހަރާތައް ކުރިއަށް ގޮސްފައިވަނީ އާއްމު ގޮތެއްގައި ސުލްހަވެރިކޮށެވެ.
ރަށްވެހިކަމުގެ ގާނޫނު އުވާލަން ކުރާ މުޒާހަރާތައް މައިގަނޑު ގޮތެއްގައި ކުރެވެމުން ދަނީ އުތުގައި ކަމަށް ވިޔަސް ދެކުނު ޓެމިލްނާޑު ސްޓޭޓްގެ ވެރިރަށް ޗެންނާއީގައި ވެސް އިއްޔެ ވަނީ މުޒާހަރާކުރަން ފަށާފައެވެ. ކިޔަވާކުދިންގެ ތަފާތު ޖަމްއިއްޔާތައް ގުޅިގެން އިއްޔެ ޗެންނާއީގެ ސެންޓްރަލް ރޭލްވޭ ސްޓޭޝަން ކައިރީގައި ބޭއްވި މުޒާހަރާގައި ދަރިވަރުންނާ ފުލުހުންނާ ދެމެދު ކުރިމަތިލުން ހިނގާފައި ވިޔަސް، ބަޔަކަށް ބޮޑު އަނިޔާއެއް ވެފައި ނުވެއެވެ.
އާއްމުން ވަރުގަދަ މުޒާހަރާތައް ކުރުމާއެކު، ގާނޫނީ އަދި އިލްމީ އިސްފަރާތްތަކުން މި ގާނޫނަކީ އިންޑިޔާގެ ގާނޫނު އަސާސީއާ ޚިލާފު ގާނޫނެއް ކަމަށް ބުނަމުން ދާއިރުވެސް ވެރިކަންކުރާ ބާރަތިޔާ ޖަނަތާ ޕާޓީ (ބީޖޭޕީ) އޮތީ ދޫދޭ ގޮތަކަށް ނޫނެވެ. އެ ޕާޓީން މިހާރު ނިންމާފައިވަނީ ރަށްވެހިކަމުގެ ގާނޫނާމެދު އާއްމުން ހޭލުންތެރިކުރުމަށް ފުޅާ ދާއިރާއެއްގައި ކެންޕޭނެއް ފެށުމަށެވެ.
އަނެއްކޮޅުން، މެލޭޝިޔާގެ ބޮޑުވަޒީރު ޑރ. މަހާތީރު މުޙައްމަދު ރަށްވެހިކަމުގެ ގާނޫނަށް ފާޑުވިދާޅުވެ ވާހަކަފުޅު ދެއްކެވުމާ ގުޅިގެން، އިންޑިޔާއިން ވަނީ އެކަމާމެދު ނުރުހުން ފާޅުކުރުމުގެ ގޮތުން، އިންޑިޔާގައި ހުންނަވާ މެލޭޝިޔާގެ ސަފީރު އެކްސްޓާނަލް އެފެއާޒް މިނިސްޓްރީއަށް ހާޒިރުކޮށްފައެވެ.
