ރ. މަޑުއްވަރީގައި ފުލުހުންނާއި ސިފައިން ގުޅިގެން ކުރިއަށްގެންދާ އޮޕަރޭޝަން އަދިވެސް ކުރިއަށްދާ ކަމަށް ފުލުހުން ވިދާޅުވެއްޖެއެވެ.
މިއީ އެރަށުގައި އުޅޭކަމަށް ތުހުމަތުކުރެވޭ ހަރުކަށި ފިކުރަށް ތާއިދުކޮށް އެކަން ފަތުރަން މަސައްކަތްކުރާ ބޮޑުން އަތުލައިގަތުމަށް ހިންގާ އޮޕަރޭޝަނެކެވެ. މިހާތަނަށް އެރަށުން ވަނީ 4 މީހަކު ބަންދުކޮށްފައެވެ. އެހެންނަމަވެސް އެމީހުންނާ ބެހޭ އެއްވެސް އިތުރު ތަފްސީލެއް ފުލުހުން ހާމައެއް ނުކުރައްވައެވެ.
ފުލުހުން ވިދާޅުވީ ފުލުހުންނާއި ޖެންޑަރ މިނިސްޓްރީ ގުޅިގެން އެރަށުގައި ހިންގާ ތަހުގީގެއް ވެސް މިހާރު ކުރިއަށްދާ ކަމަށެވެ. އެހެންނަމަވެސް އޭގެ ތަފްސީލެއް ހާމައެއް ނުކުރައްވައެވެ.
އެރަށުން ވަނީ ތަފާތު އެތައް ކަމެއް ތިލަވެފައެވެ. އެގޮތުން ކޯޓުން ބޭރުގައި ކުޑަކުދިންނާ "ކައިވެނިކޮށް" އަނބިންގެ ގޮތުގައި ގެންގުޅެން އަމިއްލައަށް ހުއްދަކުރުމާއި، ކުދިންނަށް ވެކްސިން ދިނުމާ ދެކޮޅު ހެދުމާއި، ކުދިން ތައުލީމުން މަހުރޫމް ކޮށްފައި ބޭތިއްބުން ފަދަ އެތައް ކަމެއް ހިމެނެއެވެ. އޭގެ ތެރެއިން ބައެއް މީހުންވަނީ ޖެންޑަރ މިނިސްޓްރީއާއި ފުލުހުންގެ އެއްބާރުލުމާއެކު ދަރިންނަށް ވެކްސިން ދިނުމަށް އެއްބަސްވެ ވެކްސިން ދީފައެވެ.
ފުލުހުން ވިދާޅުވެފައިވަނީ ޖަމާއަތުން ވަކިވެ ރާއްޖޭގެ ދައުލަތަކީ ކުފުރުގެ ދައުލަތެއް ކަމަށް ގަބޫލުކުރާ މީހުންވެސް އެރަށުގައި އުޅެމުންދާ ކަމަށެވެ.
އެރަށު ކައުންސިލުން ވިދާޅުވެފައިވަނީ އެފަދަ މީހުން ބަންދު ކުރުމަށް ފުލުހުން ހިންގާ އޮޕަރޭޝަނަށް ރަށުކައުންސިލްގެ ތާއިދު ލިބޭނެ ކަމަށެވެ. އެހެންނަމަވެސް ބައެއް ނޫސްތަކުން އެރަށް ބަދުނާމުވާ ގޮތަށް ޚަބަރުތައް ފަތުރާ ކަމަށާއި އެކަމާ ކަންބޮޑުވާ ކަމަށް ކައުންސިލުން ވިދާޅުވެފައިވެއެވެ.
