މަތިންދާބޯޓު އުފައްދާ އެންމެ ބޮޑު އެއް ކުންފުނި ބޮއިންގްއިން އުފައްދަމުން އައި 737 މެކްސް މަރުކާގެ މަތިންދާބޯޓު އުފެއްދުން ހުއްޓާލަން އެކުންފުނިން ނިންމައިފިއެވެ.
އެ ކުންފުނިން ހޯމަ ދުވަހު ނެރުނު ބަޔާނެއްގައި ބުނެފައިވާ ގޮތުގައި 737 މެކްސް އުފެއްދުން ވަގުތީ ގޮތުން ހުއްޓާލަން ނިންމީ، އެ މަރުކާގެ ދެ ބޯޓެއް ވެއްޓި ގިނަ އަދަދެއްގެ ބަޔަކު މަރުވުމާ ގުޅިގެން، ވައިގެ ދަތުރު ފަތުރުގެ ސަލާމަތާ ބެހޭ އިދާރާތަކުން އެ މަރުކާގެ ބޯޓުފަހަރު އުދުހުން ވަގުތީގޮތުން މަނާކުރުމަށް ފަހު އަދިވެސް އުދުހުމުގެ ހުއްދަ ދީފައި ނުވާތީއެވެ. އަދި 2020 ގެ ކުރިން އެ މަރުކާގެ ބޯޓުފަހަރު އުދުހުމުގެ ހުއްދަ ދެވެން ނެތްކަމަށް އެމެރިކާގެ ފެޑެރަލް އޭވިއޭޝަން އެޑްމިނިސްޓްރޭޝަން (އެފްއޭއޭ) އިން ބުނުމާ ގުޅިގެންނެވެ.
ބޮއިންގްއަކީ އެމެރިކާގެ އުފެއްދުންތައް އެންމެ ގިނައިން ބޭރުކުރާ ކުންފުންޏެވެ. އެ ކުންފުނިން އުފެއްދުންތައް ބޭރުކުރުމަށް އަންނަ ހީނަރުކަމުގެ އަސަރު އެމެރިކާގެ އިގްތިސާދަށް ކުރާނެއެވެ. އަދި އެމެރިކާގައި ވައިގެ ދަތުރުފަތުރުގެ ޚިދުމަތް ދޭ ކުންފުނިތަކަށް މަތިންދާބޯޓު ހޯދުމުގައި ދަތިތައް ކުރިމަތިވާނެއެވެ.
އެ ކުންފުނިން އުއްމީދުކުރީ 737 މެކްސް އަލުން އުދުހުމުގެ ހުއްދަ މި ޑިސެންބަރު މަހުގެ ތެރޭގައި އެފްއޭއޭއިން ދޭނެ ކަމަށެވެ. އެހެންނަމަވެސް، އެކަން އެ ގޮތަށް ނުވުމުން އެ މަރުކާގެ މަތިންދާބޯޓު އުފެއްދުން މަޑުޖައްސާލީއެވެ.
ބޮއިންގް 737 މެކްސްއަކީ އެކުންފުނިން އެންމެ ގިނައިން ވިކުނު މަތިންދާބޯޓެވެ. އަދި މާ ދިގު ނޫން މުއްދަތެއްގެ ތެރޭގައި އެ މަރުކާގެ ދެ މަތިންދާބޯޓެއް ވެއްޓުމާ ހަމައަށް އެ ކުންފުނީގެ އެންމެ ކާމިޔާބު މަތިންދާބޯޓެވެ.
ފާއިތުވި އަހަރުގެ އޮކްޓޯބަރު މަހުގެ 29 ވަނަ ދުވަހު އިންޑޮނޭޝިޔާގެ ލަޔަން އެއާގެ 737 މެކްސް 8 މަރުކާގެ މަތިންދާބޯޓެއް އުދުއްސާލިތާ މާގިނައިރުތަކެއް ނުވަނީސް ވެއްޓި އެއިން ދަތުރުކުރި 189 މީހުން މަރުވިއެވެ. އެފަހުން ފަސް މަސް ނުވަނީސް، މިއަހަރުގެ މާރިޗު މަހުގެ 10 ވަނަ ދުވަހު އިތިއޮޕިއަން އެއާލައިންގެ 737 މެކްސް 8 މަރުކާގެ މަތިންދާބޯޓެއް އެޑިސްއަބާބާއިން ފުރިތާ ގިނައިރުތަކެއް ނުވަނީސް ވެއްޓި އެ ބޯޓުން ދަތުރުކުރި 157 މީހުން މަރުވިއެވެ. ދާދި އެއް ގޮތަކަށް ހިނގި މި ދެހަދިސާއާ ގުޅިގެން އެ މަރުކާގެ މަތިންދާބޯޓު އުދުހުން އެފްއޭއޭއިން މަނާކުރިއެވެ.
އެފްއޭއޭ އިން ފަހުން ކުރި ތަހުގީގުތަކުން އެނގުނު ގޮތުގައި ދެ ހާދިސާވެސް 737 މެކްސް އުފެއްދުމުގައި ހުރި ގޯހެއްގެ ސަބަބުންނެވެ. އެކަން ރަނގަޅުކޮށް އެފްއޭއޭއިން ހިފަހައްޓާ ސަލާމަތީ މިންގަނޑުތަކާ އެއްގޮތަށް އަލުން ކާމިޔާބުކަމާއެކު ޓެސްޓު ކުރެވުމުން ނޫނީ 737 މެކްސްއަށް އުދުހުމުގެ ހުއްދަ ނުލިބޭނެއެވެ.
