އަންނަ އަހަރު ބާއްވާ ލޯކަލް ކައުންސިލް އިންތިޚާބަށް ފަހު 1313 އަންހެނުން އިންތިޚާބީ މަޤާމުތަކުގައި ތިބޭނެއެވެ. އެއީ 179 ރަށާއި 3 ސީޓީގެ ކައުސިލަށް އިންތިޚާބު ކުރާ 384 އަންހެން ކައުންސިލަރުންނާއި ރަށުކޮމެޓީތަކަށް އިންތިޚާބުކުރާ 929 މެމްބަރުންނެވެ.
މިއަދު ރައީސުލް ޖުމްހޫރިއްޔާ އިފްތިތާޙްކޮށްދެއްވި ވިއަވަތި ރާއްޖެ ކޮންފަރެންސްގައި ވާހަކަ ދައްކަވަމުން ރައީސުލް ޖުމްހޫރިއްޔާ އިބްރާހީމް މުޙައްމަދު ޞާލިޙް ވިދާޅުވީ ލޯކަލް ކައުންސިލް އިންތިޚާބަށްފަހު އިންތިޚާބީ މަޤާމުތަކުގައި ފިރިހެނުންނަށް ވުރެ އަންހެނުންގެ ނިސްބަތް އިތުރުވެގެންދާނެކަމަށެވެ. މިއީ އަންހެނުން ބާރުވެރިކުރުމުގެ ގޮތުން އެޅޭ ވަރަށް މުހިންމު ފިޔަވަޅެއްކަން ރައީސުލް ޖުމްހޫރިއްޔާގެ ވާހަކަފުޅުގައި ފާހަގަ ކުރެއްވިއެވެ.
ކައުންސިލްތަކުގެ 33 އިންސައްތަ ގޮޑި އަންހެނުންނަށް ދިނުމަށް ކަނޑައަޅައިފައިވާ ލާމަރުކަޒީބިލް ވިއަވަތި ރާއްޖެ ކޮންފަރެންސްގައި ރައީސުލްޖުމްހޫރިއްޔާ ވަނީ ތަސްދީޤްކުރައްވައިފައެވެ.
އަންނަ އަހަރު ބާއްވާ ލޯކަލް ކައުންސިލްގެ އިންތިޚާބާއެކު އަންހެނުންގެ ކޮމެޓީތައް ވެސް އިންތިޚާބު ކުރެވޭނެއެވެ. ކޮންމެ އަންހެނުންގެ ކޮމެޓީއަކަށް ފަސް މެމްބްރުން އިންތިޚާބު ކުރެވޭނެއެވެ. އަންހެނުންގެ ތަރައްޤީއަށް މަސައްކަތްކުރާ ކޮމެޓީތަކުގެ މެމްބަރުންނަށް އުޖޫރައެއް ކަނޑައެޅަން ޖެހޭނެކަމަށްވެސް ޤާނޫނުގައި ވަނީ ބުނެފައެވެ. އަންހެނުން ކޮމެޓީތަކަށް ވަކި ބަޖެޓެއްދީ އޮފިސްހިންގާނެ ތަނެއް ހަމަޖައްސައި ދިނުންފަދަ އިންތިޒާމުތައް ކައުންސިލްތަކުން ފޯރުކޮށްދޭންވާނެކަމަށް ވެސް ބިލްގައި ކަނޑައަޅައިފައި ވެއެވެ.
އިދާރީ ދާއިރާތައް ލާމަރުކަޒީއުޞޫލުން ހިންގުމުގެ ޤާނޫނަށް ގެނެވުނު މައިގަނޑު އަނެއް އިޞްލާޙަކީ ކައުންސިލްތަކުގެ ޢުމުރު ތިން އަހަރުން 5 އަހަރަށް އިތުރުކުރުމާއި ކައުންސިލްތަކުގެ ކިބައިން ވަކިކުރެވިފައިވާ ބާރުތަކާއި ޒިންމާތައް އަލުން އިޢާދަކޮށްދިނުމެވެ. ކައުންސިލްގެ އިޚްތިޞާސް ހިނގާ ސަރަޙައްދު ކަނޑައަޅާނެގޮތުގެ އުޞޫލުތައް ވެސް ޤާނޫނުގައި ވަނީ ކަނޑައަޅައިފައެވެ. ކައުންސިލްތަކުގެ އިޚްތިޞާޞްގައިވާ އެންމެހާ ވަޞީލަތްތަކާއި ބިނާތަކާއި ނުއުފުލޭ ހަރުމުދާ ކައުންސިލްތަކުގެ މިލްކްވެރިކަމަށް ބަދަލުވެގެންދާނެ އުޞޫލުތައްވެސް ޤާނޫނުގައި ހިމެނެއެވެ.
ދައުލަތުގެ އާމްދަނީގެ ފަސް އިންސައްތައަށްވާ ޢަދަދުގެ ފައިސާ ކައުންސިލްތަކަށް ދިނުމަށާއި ކައުންސިލްތަކުގެ އިޚްތިޞާސްގައި ނުހިމެނޭ ބިމާއި ފަޅާއި ފަރުގެ ސަރަޙައްދުތަކުގެ ކުލީގެ 40 އިންސައްތަ، ފިސްކަލް ފޯމިއުލާއެއްގެ ދަށުން، ހުރިހާ ކައުންސިލްތަކަށް ބެހިގެންދާނެކަމަށް ވެސް ޤާނޫނުގައި ވެއެވެ. ކައުންސިލްތަކުންދޭ ޚިދުމަތްތަކަށް ބޭނުންވާ ފައިސާ ހޯދުމަށް ފީ ނުވަތަ ކުލި ނެގުމުގެ ބާރު ވެސް ޤާނޫނުން ކައުންސިލްތަކަށް ވަނީ ދީފައެވެ.
