ސަރުކާރުން އައްޑޫ ސިޓީގައި ޢިމާރާތް ކޮށްފައިވާ އިކުއެޓޯރިއަލް ހޮސްޕިޓަލް މިމަހު 15 ވާ އާދީއްތަ ދުވަހު ހުޅުވާ ގޮތަށް ނިންމަވައިފިއެވެ.
އާދީއްތަ ދުވަހު ހޮސްޕިޓަލް ހުޅުވިޔަސް ހުރިހާ ޚިދުމަތެއް އަދި ނުފަށާނެއެވެ. އެހެންނަމަވެސް އޯޕީޑީގެ ޚިދުމަތާއި، އާއްމުބަލިތަކާއި ފިޒިއޯތެރަޕީގެ ޚިދުމަތް ފަށާ ގޮވަށް ވަނީ ހަމަޖެހިފައެވެ.
ހޮސްޕިޓަލް ހުޅުވަން ތައްޔާރުވެފައިވާއިރު ރާއްޖޭގެ ނާއިބު ރައީސް ވަނީ މިއަދު އައްޑުއަށް ވަޑައިގެން ހޮސްޕިޓަލަށް ޒިޔާރަތް ކުރައްވައި އެތަނުގެ ކަންކަން ބައްލަވާލައިފައިފައެވެ. އެދަތުރުފުޅަކީ އައްޑޫ ސިޓީއާއި ފުވައްމުލަކު ސިޓީއަށް އެމަނިކުފާނު ފެއްޓެވި ރަސްމީ ދަތުރުފުޅެކެވެ. އެމަނިކުފާނު މިދަތުރުފުޅުގައި ޒިޔާރަތް ކުރެއްވީ ހޮސްޕިޓަލަށް އެކަންޏެވެ. އައްޑުއަށް ކުރެއްވި ދަތުރުފުޅަށްފަހު ނާއިބު ރައީސް ފައިސަލް ނަސީމް މިހާރުވަނީ އެމަނިކުފާނުގެ އުފަން ރަށް ކަމަށްވާ ފުވައްމުލަކު ސިޓީއަށް ވަޑައިގެންފައެވެ. އެ ސިޓީއަށް ވަޑައިގެން އެސިޓީގެ ހޮސްޕިޓަލުގައި ޑައިލިސިސް ޚިދުމަތް އެމަނިކުފާނު މިއަދު ފަށްޓަވައި ދެއްވާނެއެވެ.
