ކުރިޔަށް އޮތް ލޯކަލް ކައުންސިލް އިންތިޚާބުގައި ވިހާވެސްގިނަ އަންހެން ބޭފުޅުން ވާދަ ކުރެއްވުމަށް މޯލްޑިވްސް ރިފޯމް މޫވްމަންޓް (އެމްއާރުއެމް) ޕާޓީން ގޮވާލައިފިއެވެ.
އެ ޕާޓީން ބުނެފައިވަނީ އަބަދުވެސް ސިޔާސީ މައިދާނުގައި އަންހެނުން ޙަރަކާތްތެރި ވުމަށް ފުރުޞަތު ހޯދައި ދިނުމަށް އެޕާޓިން މަސައްކަތް ކުރާނެ ކަމަށެވެ. އެގޮތުން އެމް.އާރް.އެމް ގެ އަސާސީ ޤަވާޢިދުގައި، އެމް.އާރް.އެމް ގެ ހުރިހާ ކޮމެޓީތަކުގައި 50 އިންސައްތަ އަންހެނުން ތިބެން ޖެހޭނެ ކަމަށް ކަނޑައެޅިފައިވާ ކަމަށް އެޕާޓީން ބުނެފައިވެއެވެ.
ދިވެހިރާއްޖޭގެ އިދާރީ ދާއިރާތައް ލާމަރުކަޒީ އުޞޫލުން ހިންގުމުގެ ޤާނޫނަށް އިޞްލާޙު ގެނައުމުގެ ބިލު މިއަދު ރައްޔިތުންގެ މަޖިލީހުން ފާސްކުރެއްވުމާ ގުޅިގެން، އެމްއާރުއެމްއިން ނެރުނު ބަޔާނެއްގައި ބުނެފައިވަނީ ކައުންސިލްތަކުގައި އަންހެނުންނަށް ޚާއްޞަ ކުރެވިފައިވާ ވަކިނިސްބަތެއް ކަނޑައެޅިގެން ދިއުމުން ދިވެހި އަންހެނުންނަށް މަރުޙަބާ ދަންނަވާކަމަށެވެ.
"ފުރިހަމަ ލާމަރުކަޒީ ނިޒާމެއް ގެނައުމަކީ ކޯލިޝަނުން ވެފައިވާ ވަޢުދެކެވެ. އަދި މިއަދު މިވަނީ އެ ބިލުގައި އަންހެނުންނަށް ޚާއްޞަކޮށް 33 އިންސައްތަ ކަނޑައެޅި ފާސްކުރެވިފައެވެ. މި މަސައްކަތް ކޮށްދެއްވިކަމަށްޓަކައި ރައްޔިތުންގެ މަޖިލީހުގެ ޢިއްޒަތްތެރި މެންބަރުންނަށް މި ޕާޓީގެ ފަރާތުން ޝުކުރު ދަންނަވަމެވެ."
މިއިސްލާހާއެކު ކައުންސިލުތަކަށް އިންތިޚާބުކުރެވޭ މެންބަރުންގެ ތެރެއިން 33 އިންސައްތަ ޚާއްޞަކުރަންވާނީ އަންހެނުންނަށެވެ. އެގޮތަށް އެކަން ބަދަލުވެގެން ދިއުމަކީ ދިވެހި އަންހެނުން ސިޔާސި މައިދާނުގައި ހަރަކާތްތެރިވެ ބަސްބުނުމަށް އިތުރު ފުރުޞަތު ހޯދައި ދިނުމަށް އެޅިގެން ދިޔަ ބިންގަލެއް ކަމަށް އެމްއާރުއެމްއިން ބުނެފައިވެއެވެ.
"މިބިލު ފާސްވެގެން ދިއުމުގެ މި އުފާވެރި ދުވަހު، އެމް.އާރް.އެމް އިން އުންމީދުކުރަނީ، ދިވެހި ރާއްޖޭގެ ސިޔާސީ މައިދާނުގައި ގިނަ އަންހެނުންގެ ބައިވެރިވުމާއި އަދި މުހިންމު ކަންކަން ނިންމުމުގައި، އަންހެނުން ކުރީސަފުގައި ފެނިގެން ދާނެކަމަށެވެ."
