ދެކުނު ޕެސިފިކްގައި އުފެދި ފިލިޕީންސާއި ދިމާއަށް ދަތުރުކުރަމުން ދިޔަ ބާރުގަދަ ޠޫފާން 'ކަމޫރީ' އެގައުމުގެ އެންމެ ބޮޑު ޖަޒީރާ ލޫޒޯންއަށް އަރައިފިއެވެ. ވެރިިރަށް މެނީލާވެސް އޮންނަ އެ ރަށަށް ޠޫފާނާއެކު އައި ގަދަ ވަޔާ، ވިއްސާރައިގެ ސަބަބުން މެނީލާގެ ބައިނަލްއަގުވާމީ ވައިގެ ބަނދަރުވެސް ވަނީ ބަންދުކޮށްފައެވެ.
ބޯވާރެޔާއެކު ގަޑިއަކު 235 ކިލޯމީޓަރަށް ޠޫފާނުގެ ވައި ހުރި އިރު، ޠުފާން ދަތުރުކުރި މަގުގައި ހުރި ގެތަކުގެ ފުރާޅުތައް އެއްލާއިި، ކުޑަދޮރުތައް އުދުހި، ގަސްތައް ބިންދައިގެން ގޮސް ބޮޑެތި ގެއްލުންތަކެއް ވަނީ ވެފައެެވެ.
ސައުތު އީސްޓް އޭޝިޔަން ގޭމްސް މެނީލާގައި ކުރިއަށް ދާތީ ދެކުނު އިރުމަތީ އޭޝިޔާ ސަރަހައްދުގެ 8 ހާހަށްވުރެ ގިނަ އެތުލީޓުންނެއް ތިބީ މެނީލާގައެވެ. އެހެންނަަމަވެސް، ޠޫފާނު ދަތުރުކުރަނީ މެނީލާގެ ދެކުނުން ކަަމަށް ވާތީ އެތުލީޓުންނަށް ޠޫފާނުގެ އަސަރުކުރާނެ ކަމަކަށް ނުބެލެވެއެވެ.
މެނީލާގެ ނިނޯއީ އަކީނޯ އިންޓަނޭޝަނަލް އެއާޕޯޓު ބަންދުކޮށްފައިވާ އިރު، އިއްޔެއާއި މިއަދު 500 އަށްވުރެ ގިނަ ފްލައިޓް ވަނީ ކެންސަލްކޮށްފައެވެ. އަދި ފުރަން އެއާޕޯޓަށް ނުދިއުމަށް ކަމާބެހޭ އިދާރާތަކުން ދަނީ އިލްތިމާސްކުރަމުންނެވެ.
ޠޫފާނު އަސަރު އެެންމެ ބޮޑަށް ކުރާނެ ކަމަށް ބެލެވޭ ލުޒާންގެ މެދުތެރޭ ބިކޯ ސަރަހައްދުން 3 ލައްކަ 40 ހާސް މީހުން ވަނީ ރައްކާތެރި ސަރަަހައްދުތަކަށް ގެންދެވިފައެވެ. އަދި މެނީލާގެ ދެކުނުން އޮންނަ އަޑި ސަރަހައްދުގައި ޖިފުޓި ޖަހައިގެން ދިރިއުޅޭ މީހުން އެސަރަހައްދު ދޫކޮށް ދިއުމަށް ވަނީ އިލްތިމާސްކޮށްފައެވެ.
ފިލިޕީންސްގެ މެދުތެރޭގެ 35 ޕްރޮވިންސަކަށް ޠޫފާނުގެ އިންޒާރު ދީފައި ވާއިރު، ކަމޫރީ ގިންތި ކުރެވިފައިވަނީ 5 ވަނަ ގިންތީގެ ޠޫފާނެއްގެ ގޮތުގައެވެ. މި ގިންތީގެ ޠޫފާނުގެ ސަބަބުން އާދަޔާއި ޚިލާފަށް ވައިބާރުވެ، އާދަޔާއި ޚިލާފަށް ބޯ ވާރެވެހި، ބިންގަނޑު ކަނޑައިގެން ދިއުމުގެ އިތުރަށް އިމާރާތްތަކަށާއި ތަކެއްޗަށް ބޮޑެތި ގެއްުލުން ވެއެވެ.
"އަހަރުމެން އަދިވެސް މިދަނީ ލިބުނު ގެއްލުންތައް ބަލަމުން. ފެންނަ ގޮތުގައި ވަރަށް ބޮޑެތި ގެއްލުންތަކެއް ވަނީ ވެފައި." ލޫޒޯންގެ ޑިޒާސްޓާ މެނޭޖްމަންޓް އޮފިޝަލެއް ކަމުގައިވާ ލޫސިޓޯ މެންޑޯޒާ ބުންޏެެވެ.
"އެއް ހިސާބުގައި ގެތަކުގެ ފުރާޅާ ހަމައަށް ވަނީ ފެން ބޮޑުވެފައި،" އޭނާ އިތުރަށް ބުންޏެވެ.
ފިލިޕީންސަށް އެވްރެޖްކޮށް އަހަރަކު 20 ޠޫފާން އަރައެވެ. އެހެންނަމަވެސް، މި ފެންވަރަށް ބާރުގަދަ ޠޫފާން އަރަނީ މަދުންނެވެ.
