ބްރޯޑްކާސްޓިންގ ކޮމިޝަނުގެ ރައީސް ކަމުގައި ހުންނެވި މުޙަންމަދު ޝަހީބު އެމަގާމުން އިސްތިއުފާ ދެއްވުމުން ހުސްވި އެޖާގަ އާއި އެ ކޮމިޝަނުގެ ނައިބު ރައީސް ކަމުގައި ހުންނެވި ފާތިމަތު ޒައިނާ މަޖިލިސްގެ ވޯޓަކުން ވަކި ކުރެއްވުމުން ހުސްވި އެ ޖާގައަށް ރައީސް އޮފީހުން ކުރެއްވި އިއުލާނާއި ގުޅިގެން ހަ ބޭފުޅަކު ކުރިމަތި ލައްވައިފިއެވެ.
ކޮމިޝަނުން ހުސްވި މެމްބަރު ކަމުގެ ދެމަގާމަށް ޖުމްލަ 6 ބޭފުޅަކު ކުރިމަތި ލެއްވިއިރު މީޑިޔާގެ ދާއިރާގައި މިހާރުވެސް ހަރަކާތްތެރިވާ ބަޔެއް ނޫސްވެރިން ހިމެނެއެވެ. ކޮމިޝަނަށް ކުރިމަތި ލެއްވި ބޭފުޅުންގެ ނަންފުޅުތައް ރައީސުލްޖުމްހޫރިއްޔާ އިސްކަން ދެއްވި ތަރުތީބުން ރައްޔިތުންގެ މަޖިލީހަށް ފޮނުއްވިއިރު، ޝަހީބުގެ ޖާގައަށް ކުރިމަތި ލެއްވި ބޭފުޅުންގެ ތެރެއިން އެންމެ ކުރީގައި އޮތީ ޓީވީ ޕްރެޒެންޓަރު މަރިޔަމް ވަޙީދާގެ ނަންފުޅެވެ. ޒައިނާގެ ޖާގަ ހުސްވުމުން ކުރިމަތި ލެއްވި ބޭފުޅުންގެ ތެރެއިން ރައީސް އިސްކަން ދެއްވި ތަރުތީބުން އެންމެ ކުރީގައި އޮތީ އިމްރާނާ ބިންތް އަބްދުﷲގެ ނަންފުޅެވެ.
މީގެތެރެއިން މަރިޔަމް ވަޙީދާއަކީ 20 އަހަރު ނޫސްވެރިކަމުގެ ދާއިރާގައި އުޅުއްވާފައިވާ ފަރާތެކެވެ. އޭނާއަކީ މިހާރުވެސް ރާއްޖޭގައި ހުންނަ ސްވިޑެންގެ އޮނަރަރީ ކޮންސުލްގެ މަގާމާއި، ޕަބްލިކް ސާވިސް މީޑިއާ (ޕީއެސްއެމް) ބޯޑުގެ ވެސް މެމްބަރުކަންވެސް ކުރައްވަމުން ގެންދަވާ ފަރާތެކެވެ.
ޝަހީބުގެ ޖާގައަށް މެމްބަރަކު ނެގުމަށްޓަކައި ކުރި އިއުލާނާއި ގުޅިގެން އެ މަގާމަށް ކުރިމަތި ލެއްވީ 4 ފަރާތަކުންނެވެ. ޝަހީބުގެ ޖާގައަށް ކުރިމަތި ލެއްވި ފަރާތަކުން ޒައިނާގެ ޖާގައަށްވެސް ކުރިމަތި ލައްވާފައިވެއެވެ. އެއީ އިމްރާނާ ބިންތް އަބްދުﷲއެވެ.
ކުރިމަތިލެއްވި ފަރާތްތައް ރައީސް އިސްކަން ދެއްވި ތަރުތީބުން:
1-މަރިޔަމް ވަހީދާ، ގ. ހިލްމަން
2- އައިމިނަތު އަމީނާ، ހަނދުވަރީގެ ލ. ކުނަހަންދޫ
3- އިމްރާނާ ބިންތު އަބްދުﷲ، މ. ކަރޭޖް
4- ދިޔާނާ ތޯހިރު، ސެވަންސްޓަ، ސ. ހިތާދޫ
ޒައިނާގެ ޖާގައަށް މެމްބަރަކު ނެގުމަށް ކުރި އިއުލާނާއި ގުޅިގެން ކުރިމަތި ލެއްވީ ތިން ފަރާތަކުންނެވެ.
ކުރިމަތިލެއްވި ފަރާތްތައް ރައީސް އިސްކަން ދެއްވި ތަރުތީބުން:
1-އިމްރާނާ ބިންތު އަބްދުﷲ، މ. ކަރޭޖް
2- ޙަސަން އިރުފާން، މއ. ބޮޑުމަގުގެ
3- ޑރ އިބްރާހިމް ޝިޔާމް، ކަފިޔަވިލު
ކޮމިޝަނުގެ މެމްބަރު ކަމަށް ކުރިމަތި ލެއްވި ހަ ބޭފުޅުންގެ ނަންފުޅުތައް މަޖިލީހުގެ ރިޔާސަތުން މިއަދު ވަނީ އެ ނަންފުޅުތައް ދިރާސާ ކުރެއްވުމަށްޓަކައި މިނިވަން މުއައްސަސާތަކާބެހޭ ކޮމިޓީއަށް ފޮނުވާފައެވެ. ބްރޯޑްކާސްޓިންގ ކޮމިޝަނުގައި ޖުމްލަ ހަތް މެމްބަރުން ތިއްބަވާއިރު މިވަގުތު އެކޮމިޝަނުގައި ތިއްބެވީ އެންމެ ތިން މެމްބަރުންނެވެ. އެހެންވެ އެ ކޮމިޝަން އޮތީ ޤާނޫނީ ހުސްކަމެއްގެ ތެރޭގައެވެ. ކޮމިޝަނުގެ ދެ މަގާމެއް ހުސްވެގެން މީގެ ފަސް މަހެއްހާ ދުވަސްކުރިން ދެ މެމްބަރުން ނެގުމަށް ކުރި އިއުލާނާއި ގުޅިގެން ކުރިމަތި ލެއްވި 36 ފާރާތުގެ ތެރެއިންވެސް މެމްބަރަކު އަދި ނުނަގައެވެ.
