ރައީސް އަލްއުސްތާޒު މައުމޫން ޢަބްދުލްގައްޔޫމް އިސްވެ ހުންނަވައިގެން އުފައްދަވާ މޯލްޑިވްސް ރިފޯމް މޫވްމަންޓް (އެމްއާރުއެމް) ގެ އަސާސީ ގަވާއިދު ފާސްކުރުން މިރޭ އޮންނާނެއެވެ.
އެޕާޓީގެ އަސާސީ ގަވާއިދު ފާސްކުރުން އޮންނާނީ ޕާޓީ އުފެއްދުމަށް ދަރުބާރުގޭގައި މިރޭ ބާއްވާ ޚާއްސަ ޖަލްސާގައެވެ. މިޖަލްސާއަކީ ޕާޓީއެއް އުފެއްދުމަށް ނުވަތަ ރަޖިސްޓްރީ ކުރުމަށްޓަކައި ގާނޫނީގޮތުން ބާއްވަންޖެހޭ ޖަލްސާއެކެވެ.
ޕާޓީގެ ފުރަތަމަ ކޮންގުރެސް ބޭއްވުމާ ހަމައަށް އިންތިގާލީ މަރުހަލާގައި ކަންކުރާނެގޮތުގެ ބާބެއް ވަނީ އެކަލަވާލައިފައެވެ. އޭގެ ދަށުން އެކުލަވާލަންޖެހޭ އިންތިގާލީ މަގާމްތަކަށް ނަންހުށަހެޅުމާއި މެމްބަރުން އިތިޚާބުކުރުން ވެސް މިޖަލްސާގައި އޮންނާނެއެވެ.
އެމްއާރުއެމް އުފެއްދުމަށް މިރޭ ބާއްވާ ޖަލްސާގައި ޕާޓީއަށް އިންތިގާލީ ރައީސަކު އިންތިޚާބު ކުރާނެއެވެ. އޭގެ އިތުރަށް 20 މެމްބަރުންގެ މައްޗަށް އެކުލެވޭ އިންތިގާލީ އެގްޒެކެޓިވް ކޮމިޓީއެއް އެކުލަވާލުން ވެސް އޮންނާނެއެވެ. އޭގެ ތެރެއިން 10 މީހުންނަކީ އަންހެނުންނަށް ވާންޖެހެއެވެ. އަދި އިންތިގާލީ ޒުވާނުންގެ ކައުންސިލަށް 15 ފިރިހެން މެމްބަރުން ހޮވުމާއި އިންތިގާލީ ޒުވާނުންގެ ކައުންސިލަށް 15 އަންހެން މެމްބަރުން އިންތިޚާބު ކުރުންވެސް އޮންނާނެއެވެ. މި މަގާމްތަކަށް އިންތިޚާބު ކުރެވޭނީ އުމުރުން 30 އަހަރު ނުވާ ޒުވާނުންނެވެ. މިއިން ކޮންމެ 15 މެމްބަރެއްގެ ތެރެއިން އެންމެގިނަ ވޯޓުލިބޭ 6 މެމްބަރަކު އެގްޒެކެޓިވް ކޮމިޓީގައި ހިމެނޭނެއެވެ. މީގެ އިތުރަށް އިންތިގާލީ އަންހެނުންގެ ކައުންސިލަށް 20 މެމްބަރުން އިންތިޚާބު ކުރުންވެސް މިރޭ އޮންނާނެއެވެ.
އެމްއާރުއެމް އަކީ ރައީސް މައުމޫން އިސްކޮށް ހުންނަވައިގެން އުފައްދަވާ ސިޔާސީ ތިންވަނަ ޕާޓީއެވެ. މީގެ ކުރިން އެމަނިކުފާނު ހައްދަވާފައިވަނީ ޑީއާރުޕީއާއި ޕީޕީއެމް އެވެ.
