ސެޕްޓެމްބަރު 20 ވަނަ ދުވަހު މާލޭ، ތިލަފުށި ގޭގެ ގުދަނުގައި އަލިފާން ރޯވެ ހިނގި ހާދިސާގައި ގެތަކުން ނުނުކުމެވިފައިތިބި މީހުން ސަލާމަތްކުރި ސިފައިންނަށް ރިހިމެޑަލް ރޭ ދީފިއެވެ.
އެ މީހުންވަނީ އެ ހާދިސާގައި އަލީފާން ނިއްވާލައި ގެތަކުން މީހުން ސަލާމަތް ކުރަން ވަރަށް ބޮޑަށް މަސައްކަތް ކުރައްވައިފިއެވެ. މި މެޑަލް ރޭ ދީފައިވަނީ 9 ބޭކަލަކަށެވެ. އެ ބޭކަލުންނަށް މެޑަލް ދެއްވީ ނަސްރުގެ ދުވަހުގެ ރަސްމީ ޖަލްސާގައި ރައީސް އިބްރާހީމް މުޙައްމަދު ސާލިހެވެ.
މިއީ އަމިއްލަ ނަފްސަށް ވުރެބޮޑަށް އެހެންމީހުންގެ ފުރާނަ ސަލާމަތް ކުރުމަށް މަސައްކްތަކުރާ ސިފައިންނަށްދޭ އެއްޗެކެވެ.
ރޭގެ ޖަލްސާގައި ވާހަކަފުޅު ދައްކަވަމުން ޑިފެންސް މިނިސްޓަރ މާރިޔާ އަހުމަދު ދީދީ ވިދާޅުވީ އަލިފާނުގެ އެ ހާދިސާގައި މީހުން ސަލާމަތް ކުރުމާއި އަލިފާން ނިއްވުމަށް ސިފައިން ކުރެއްވި މަސައްކަތް އެކަމަނާއަށް ފެނިވަޑައިގެންނެވި ކަމަށެވެ. އެ ބޭކަލުން ވަނީ (ޚާއްސަކޮށް ރިހި މެޑަލް ލިބުނު ސިފައިން) އަލިފާން އެންމެ ބޮޑަށް ރޯވި ގެތަކުގެ ތެރެއަށް އެތައް ފަހަރަކުވަދެ މީހުން ސަލާމަތް ކޮށްފައި ކަމަށެވެ.
އެކަމަނާ ވިދާޅުވީ މިފަދަ ކޮންމެ ކަމެއްގައި ވެސް ދިވެހި ސިފައިން ގެންދަވަނީ އެންމެ އިސް ސަފުގައި މަސައްކަތް ކުރައްވަމުންނެވެ. އެދުވަހު ސިފައިން ދެއްކެވި ހިތްވަރަށް ރައީސް އިބްރާހީމް މުޙައްމަދު ޞާލިހުވެސް ވަނީ އެބޭފުޅުންނަށް ތަޢުރީފް ކުރައްވައިފައެވެ.
މާލޭގައި ހިނގި އަލިފާނުގެ އެ ހާދިސާގައި ވަނީ 14 ގެއެއް އަންދައިފައެވެ. އަދި 6 ގުދަނެއްވެސް ވަނީ އަނދައިފައެވެ.
ރޭ ރިހިމެޑަލް ލިބިފައިވަނީ: ސާޖަންޓް އަޙުމަދު ސަޢީދު، ސާޖަންޓް މަހުފޫޒް ޢަބްދުއް ރަޝީދު، ސާޖަންޓް ޢަލީ ރިޒްވީން، ސާޖަންޓް އާދަމް ފަޒީލް، ސާޖަންޓް ޙުސައިން އަންވަރު، ކޯޕްރަލް އަޙުމަދު އަނަސް ޒަކީ، ކޯޕްރަލް އަޙުމަދު ހިޝާމް، ކޯޕްރަލް ޝަހުދާން ނަސީމް، ޕްރައިވެޓް އިސްމާޢީލް ރުހުޝާން އަށެވެ.
