އޭޝިއަން ޝޫޓިންގ ކޮންފެޑެރޭޝަނުން އިންތިޒާމުކޮށްގެން ބާއްވާ އޭޝިއާގެ އެންމެ ބޮޑު ޝޫޓިން މުބާރާތްކަމަށްވާ "14 ވަނަ އޭޝިއަން ޗެމްޕިއަންޝިޕް" މިއަދު ފަށާނެއެވެ. މިފަހަރުގެ މުބާރާތް ބާއްވަނީ ގަތަރުގައެވެ.
މިއަދުން ފެށިގެން މިމަހު 13 ކުރިއަށްދާ މުބާރާތުގައި ރާއްޖެއިން ބައިވެރިވާ ޓީމުވެސް މިހާރުވަނީ ގަތަރަށް ގޮސްފައެވެ. އެ ޓީމުގައި ހިމެނެނީ 6 އެތުލީޓުންނެވެ. އޭގެ އިތުރަށް ކޯޗަކާއި މެނޭޖަރެއް ހިމެނެއެވެ. އެތުލީޓުންގެ ތެރޭގައި ހިމެނެނީ އަންހެން ތިން އެތުލީޓުންނާއި، ފިރިހެން ތިން އެތުލީޓުންނެވެ.
ޓީމުގައި ހިމެނިފައިވާ އެތުލީޓުންނަކީ، ސާޖަންޓް ފަސްޓް ކްލާސް ޢަބްދުﷲ މުޙައްމަދު އާއި ސާޖަންޓް އަޙްމަދު އިބްރާހީމާއި، ސާޖަންޓް ޝަރަފިއްޔާ ޢަބްދުއްރަޙްމާނާއި، ކޯޕްރަލް ރިއުޝާ މުޙައްމަދާއި ލާންސް ކޯޕްރަލް އާސިފާ ޖައުފަރާއި، ޕްރައިވެޓް ޒިޔާން ޒިޔާޢު އެވެ. ހެޑްކޯޗަކީ، ސާޖަންޓް ފަސްޓް ކްލާސް ޙަސަން ޢަބްދުލްޣަފޫރެވެ. މެނޭޖަރަކީ، ސްޓާފް ސާޖަންޓް އަޙްމަދު ސިރާޖެވެ.
އޭޝިއަން ޝޫޓިން ޗެމްޕިއަންޝިޕްގައި ޝޫޓިންގ ޓީމުން ވާދަކުރާ އިވެންޓްތަކުގެ ތެރޭގައި، 50 މީޓަރ 3 ޕޮޒިޝަން ރައިފަލް މެންސް އިވެންޓާއި، 50 މީޓަރ ޕްރޯން ރައިފަލް މެންސް އިވެންޓް، 10 މީޓަރު އެއަރ ޕިސްޓަލް މެންސް އިވެންޓް އާއި، 25 މީޓަރު ސްޕޯޓްސް ޕިސްޓަލް ވިމެންސް އިވެންޓާއި ، 10 މީޓަރ އެއަރ ރައިފަލް ވިމެންސް އިވެންޓް ހިމެނެއެވެ.
ޝޫޓިންގ އެސޯސިއޭޝަން އޮފް މޯލްޑިވްސްގެ ޤައުމީ ޓީމް މި މުބާރާތަށް ތައްޔާރުވުމުގެ ގޮތުން ފަރިތަކުރުންތައް ކުރިއަށްގެންގޮސްފައިވަނީ ވިލިމާލޭގައި ހުންނަ 25 މީޓަރ އަދި 50 މީޓަރ ވަގުތީ ރޭންޖްގައާއި، ހެންވޭރު މުނިއުފާގައި ހުންނަ 10 މީޓަރ އިންޑޯރ ވަގުތީ ރޭންޖުގައެވެ. މި ޓީމް މިމުބާރާތައް ފަރިތަކުރަން ފައްޓާފައި ވަނީ މީގެ 5 މަސް ދުވަސްކުރިންނެވެ.
