އިނގިރޭސިވިލާތު އެންމެ މޮޅު ސްކޫލުތަކުގެ ލިސްޓުގެ އެންމެ ކުރީގައި މުސްލިމް ސްކޫލްތައް

އިނގިރޭސިވިލާތުގެ މުސްލިމުން ހިންގާ މުސްލިމް ސްކޫލްތައް މިވަނީ އެގައުމުގެ ތާރީޚުގައި އައު ރެކޯޑެއް ހަދައިފައެވެ. އެއީ އިނގިރޭސި ސަރުކާރުން މިއަހަރު ކުރި މިއަހަރުގެ އެންމެ ފެންވަރު ރަނގަޅު ސެކަންޑަރީ ސްކޫލްތަކުގެ ލިސްޓުގެ ފުރަތަމަ ތިންވަނަ ހޯދައިގެންނެވެ. އަދި މުސްލިމް އިތުރު 5 ސްކޫލެއް އެންމެ މޮޅު 20 ސްކޫލްގެ ތެރޭގައި ހިމެނިފައެވެ.

2019 ވަނަ އަހަރުގެ އެންމެ މޮޅު ސެކަންޑަރީ ސްކޫލްތަކުގެ ލިސްޓުގެ ފަޚުރުވެރި އެއްވަނަ ހޯދާފައިވަނީ ބްލެކްބާންގައި ހުންނަ 'ތައުހީދުލް އިސްލާމް ގާލްސް ހައި ސްކޫލް' އެވެ. ދެވަނަ ހޯދާފައިވަނީ ބާމިންގހަމްގައި ހުންނަ 'އީޑެން ބޯއިސް ސްކޫލް' އެވެ. އަދި ލިސްޓުގެ ތިންވަނައިގައި ވަނީ ކޮވެންޓްރީގެ ސްކޫލެއް ކަމުގައިވާ 'އީޑެން ގާލްސް ސްކޫލް' އެވެ.

މިތިން ސްކޫލަކީވެސް އިނގިރޭސި ގައުމީ މުގައްރަރުގެ އިތުރަށް އިސްލާމީ މާއްދާތައް ކިޔަވައިދޭ، މުސްލިމް ކުދިން ކިޔަވާ ސްކޫލްތަކެވެ.

ތައުހީދުލް އިސްލާމް ސްކޫލްގެ %83.3 ދަރިވަރުން ވަނީ އިނގިރޭސި އަދި ހިސާބު ދެ މާއްދާއިން އެންމެ މަތީ ދަރަޖައިން ފާސްވެފައެވެ.

އިނގިރޭސިވިލާތުގެ ޑިޕާޓްމަންޓް އޮފް އެޑިޔުކޭޝަން (މިނިސްޓްރީ އޮފް އެޑިޔުކޭޝަން) މި ލިސްޓު ތަރުތީބުކުރުމުގައި ގިނަ ކަންތައްތަކަކަށް ބަލައެވެ. އޭގެ ތެރޭގައި އިނގިރޭސި ބަސް، ހިސާބު، ފިޒިކްސްއިން ދަރިވަރުން ހޯދާ ނަތީޖާއާއި، އަހަރުގެ ފަހު އިމްތިހާނުގައި ދަރިވަރުން އެވްރެޖާއި، ސްކޫލް ނިންމާ ދަރިވަރުންގެ ނިސްބަތާއި، ސްކޫލް ނިންމާ ދަރިވަރުންނަށް ވަޒީފާގެ ފުރުސަތު ލިބުން ފަސޭހަ މިންވަރު ހިމެނެއެވެ.

މުސްލިމް ކައުންސިލް އޮފް ބްރިޓްން (އެމްސީބީ) އިން ނެރުނު ބަޔާނެއްގައި ވަނީ، ދީނީ ސްކޫލްތަކާ މެދު އާއްމުން ތަސައްވަރު ގޯސް ނަމަވެސް، އެފަދަ ސްކޫލްތަކުގެ ފެންވަރު ރަނގަޅުކަން މި ނަތީޖާތަކުން ހާމަވާ ކަމުގައެވެ.

"މުސްލިމް އަގީދާގެ މި ސްކޫލްތަކުން ހޯދި ފުރިހަމަ ކާމިޔާބީގެ ހުރިހާ ޝުކުރެއް ހައްގުވަނީ ޓީޗަރުންނަށާއި، ބެލެނިވެރިންނަށް، އަދި ވަކިން ޚާއްޞަކޮށް ދަރިވަރުންނަށް." އެމްސީބީގެ ސެކްރެޓަރީ ޖެނެރަލް ހާރޫން ޚާން ވިދާޅުވިއެވެ.

"އެ ސްކޫލްތަކުގެ ނަތީޖާތަކުން ދައްކައިދެނީ، ކޮންމެ ދީނެއްގެ ކުދިންނަށްވެސް ކޮންމެ ކަހަލަ މާހައުލެއްގައި ވެސް ބުރަ މަސައްކަތްކޮށްފިނަމަ ކާމިޔާބުހޯދޭނެކަން." އޭނާ ވިދާޅުވިއެވެ.

އިނގިރޭސިވިލާތުގެ ސެކަންޑްރީ ސުކޫލްތަކުގެ އެއްވަނަ ހޯދި ތައުހީދުލް އިސްލާމް ގާލްސް ހައި ސްކޫލަކީ އިނގިރޭސިވިލާތުގައި 25 ސްކޫލް ހިންގާ މުސްލިމް ޖަމާއަތެއް ކަމުގައިވާ ތައުހީދު އެޑިޔުކޭޝަން ޓްރަސްޓް އިން 1984 ވަނަ އަހަރު ހުޅުވި ސްކޫލެކެވެ. އެ ސްކޫލުގައި މިއަހަރު އުމުރުން 11 އަހަރާއި 18 އަހަރާއި ދެމެދު 777 އަންހެން ދަރިވަރުން ތައުލީމު ހާސިލުކުރަމުން ދެއެވެ.