އޮސްޓްރޭލިއާގެ ސްޓޭޓެއް ކަމުގައިވާ ކުއީންސްލޭންޑްގެ ރައްޔިތުންގެ މަޖިލީހުގެ ބައެއް މެންބަރުން ސޯޓާއި، ޓީޝާޓާއި، ފުޓުބޯޅަ ޖާޒީ ފަދަ އެއްޗެތި ތުރު ކުރައްވައިގެން ހުސް ފައިންޕުޅާ މަޖިލީހުގެ ޖަލްސާއަކަށް ވަޑައިގެންފިއެވެ. މިއީ ކުއްލިއަކަށް މެންދަމުގެ ވަގުތުގައި މަޖިލީހަށް ވަޑައިގަންނަވާން ދެންނެވުމުން އެ ބޭފުޅުން ކުރެއްވި ކަމެކެވެ.
ކުއްލި ޖަލްސާ ބޭއްވުނީ އިދިކޮޅު މެންބަރުންގެ ހުށަހެޅުއްވުމަކަށް މެންދަމު ދެގަޑި ބައިގައެވެ.
މެންބަރުން މަޖިލީހަށް ވެދެވަޑައިގަތުމުން އެ ވަގުތު މާލަމުގައި ތިއްބެވި އެހެން މެންބަރުން ހިނިފުޅު ވަޑުވައި ހެއްދެވިއެވެ. އަދި ބައެއް މެންބަރުން އެ ބޭފުޅުންނަށް މަލާމާތް ކުރައްވައި، އެ ބޭފުޅުން ތުރު ކުރައްވައިގެން ތިއްބެވި ހެދުމާ ދެކޮޅު ހައްދަވައި ވާހަކަފުޅުވެސް ދެއްކެވިއެވެ. އެހެންނަމަވެސް މަޖިލީހުގެ ރައީސް ވިދާޅުވީ އެ ބޭފުޅުންގެ ހެދުންކޮޅަކު މައްސަލައެއް ނެތް ކަމުގައެވެ. ކުއްލިއަކަށް މަޖިލީހަށް ވަޑައިގަންވާން ޖެހިވަޑައިގަތުމުން އެފަދަ ގޮތަކަށް ވަޑައިގަތުމަކީ އިއުތިރާޒު ކުރެވޭނޭ ކަމެއް ނޫން ކަމުގައެވެ.
މެންދަމު ވަޑައިގަތީ އިދިކޮޅު މެންބަރުން ހުށަހުޅުއްވި މައްސަލައަކާ ގުޅިގެން ކަމަށް ވީ ނަމަވެސް އެ މައްސަލަ އިދިކޮޅުން ބޭނުންވީ ގޮތަކަށް ފާހެއް ނުވިއެވެ.
އޮސްޓްރޭލިއާގެ ރައްޔިތުންގެ މަޖިލީހުގެ ގަވާއިދުގައި ވާ ގޮތުން މަޖިލީހުގެ ޖަލްސާތަކަށް ވަޑައިގަންނަވާން ވާނީ އެ ދުވަސްވަރެއްގެ މޫސުމާ ގުޅޭ ރީތި ހެދުންކޮޅެއް ތުރު ކުރައްވައިގެންނެވެ. ފިރިހެން މެންބަރުން ވަޑައިގަންވާން އޮންނަނީ ދިގު ފަޓުލޫނަކާއި އަތްދިގު ގަމީހަކާއި ޓައީއެއް ތުރު ކުރައްވައިގެން، ނުވަތަ ޓައީއެއް ތުރު ނުކުރެއްވިޔަސް އަތް ދިގު ގަމީހެއް ތުރު ކުރައްވައިގެންނެވެ. އެކަމަކު ކުއްލިއަކަށް ދެންނެވޭ ޖަލްސާއަކަށް މި ފަދަ ހެދުންކޮޅެއްގައި ވަޑައިގަތުން ލާޒިމެއް ނުކުރެއެވެ.
