ރާއްޖޭގެ ރިސޯޓުތަކުގެ މަތީ މަޤާމްތަކުގައި ދިވެހީން މަދީ ކުރީގެ ސަރުކާރު ތަކުން އެކަމަށް މަސައްކަތް ކުރައްވާފައި ނުވާތީ ކަމަށް މިނިސްޓަރ އޮފް އިކޮނޮމިކް ޑިވެލޮޕްމެންޓް ފައްޔާޒު އިސްމާޢީލް ވިދާޅުވެއްޖެއެވެ.
އާފަތިހަށް މަޢުލޫމާތު ދެއްވަމުން މިނިސްޓަރ ވިދާޅުވީ އެހެން އެކަންވީ ކުރީގެ ސަރުކާރުތަކުގެ ސިޔާސަތު ގެންގުޅެފައިވާ ގޮތުގެ ސަބަބުން ކަމަށް ބެލެވޭ ކަމަށެވެ.
އެފަދަ މަޤާމްތަކަށް މީހުން ގެންދިއުމަކީ ދެމެހެއްޓެނިވި ގޮތެއްގައި ސަރުކާރުތަކުން ކުރަންޖެހޭނެ ކަމެއް ކަމަށްވެސް އެމަނިކުފާނު ވިދާޅުވިއެވެ. އެހެންނަމަވެސް ދެމެހެއްޓެނިވި ގޮތުގައި އެކަން ކުރައްވާފައި ނުވާ ކަމަށް މިނިސްޓަރ ވިދާޅުވިއެވެ.
"ރާއްޖޭގެ ރިސޯޓުތަކުގެ މަތީ މަޤާމްތަކަށް މީހުން ގެންދަން ސަރުކާރުތަކުންނެތް ދެމެހެއްޓެނިވި ގޮތަކަށް އެކަން ކޮށްފައެއް. ކުރިން ދޭތެރެ ދޭތެރެއިން ކަމެއް ކޮށްލަނީ،"މިނިސްޓަރ ވިދާޅުވިއެވެ.
މިނިސްޓަރ ފައްޔާޒު ވިދާޅުވީ މެދުފަންތިއާއި މަތީ ފަންތީގެ ވަޒީފާ ތަކަށް ބޭރު މީހުންގަނައުން މަދު ކުރުމަށް މަސައްކަތް ކުރައްވަމުން ގެންދަވާ ކަމަށެވެ.
"އަޅުގަނޑުމެން މިބަލަނީ މެދުފަންތިއާއި މަތީފަންތީގެ ވަޒީފާތަކަށް ގެންނަ ބޭރުމީހުން މަދު ކުރުމަށް،ކީއްތޯ ކުރަންވީ. ކޮންކަހަލަ ޓްރެއިނިންއެއްތޯ ދިވެހީންނަށް ދޭނީ. އެމަސައްކަތް ފަށައިގެން ކުރިއަށް މިގެންދަނީ،" މިނިސްޓަރ ވިދާޅުވިއެވެ.
