އދ. ގެ ފަރާތުން ދުނިޔޭގެ ކަންކޮޅުތަކަށް ފޮނުވާ ސުލްހަ ބަލަހައްޓާ ލަޝްކަރުތަކުގައި ސްރީލަންކާގެ ސިފައިން ނުހިމެނުމަށް އެ ޖަމްއިއްޔާއިން ނިންމައިފިއެވެ. މިގޮތަށް ނިންމާފައި މިވަނީ ސްރީލަންކާގެ ސިފައިންގެ ކޮމާންޑަރެއްގެ ގޮތުގައި ހުންނަވައިގެން އިންސާނީ ހައްގުތަކާ ޚިލާފު އަމަލުތަކެއް ހިންގަވާފައިވާ ކަމަށް ތުހުމަތުކުރެވޭ ބޭފުޅަކު ސްރީލަންކާގެ ސިފައިންގެ އިސްވެރިޔާގެ މަގާމަށް އައްޔަންކޮށްފައި ވާތީއެވެ.
ލެފްޓިނެންޓް ޖެނެރަލް ޝަވެންދްރަ ސިލްވާ ކޮމާންޑަރ އޮފް ސްރީލަންކަން އާމީގެ މަގާމަށް ފާއިތުވި އޮގަސްޓް މަހުގެ 21 ވަނަ ދުވަހު އައްޔަންކުރާއެކު އދ. އާއި، އެމެރިކާއާއ، ޔޫރަޕިއަން ޔުނިއަން (އީޔޫ) އިން ވަނީ އެ ނިންމުމަށް ވަރަށް ބޮޑަށް ފާޑުކިޔައިން، ނިންމުން މުރާޖައާކުރުމަށް ގޮވައިލާފައެވެ.
"ބައިނަލް އަގްވާމީ އިންސާނީ ހައްގުތަކާ ބެހޭ ގާނޫނާ ލެފްޓިނެންޓް ޖެނެރަލް ޝަވެންދްރަ ސިލްވާ ޚިލާފުވެވަޑައިގެންފައިވާކަމަށް، އިތުބާރުހުރި ގޮތަށް ކުރެވޭ ތުހުމަތުތާއެކުވެސް، އޭނާ ސްރީލަންކާ ސިފައިންގެ ކޮމާންޑަރުގެ މަގާމަށް އައްޔަންކޮށްފައި ވާތީ، އަހަރުމެންގެ ކަންބޮޑުވުން ވަނީ ސްރީލަންކާ ސަރުކާރަށް ހުށަހަޅާފައި." ނިއުޔޯކުގައި ނޫސްވެރިންނަށް މައުލޫމާތު ދެއްވަމުން އދ. ގެ ސެކްރެޓަރީ ޖެނެރަލްގެ ތަރުޖަމާނުގެ ނާއިބު ފަރްހާން ހައްޤު ވިދާޅުވިއެވެ.
"މި އައްޔަންކުރުމުގެ އަލީގައި، އދ. ގެ ޑިޕާޓްމަންޓް އޮފް ޕީސް އޮޕަރޭޝަންސް އިން މިވަނީ، ސްރީލަންކާގެ ސިފައިން ބައިވެރިނުކޮށްފިނަމަ، އދ. ސުލްހަ ބަލަހައްޓާ ސިފައިންގެ އޮޕަރޭޝަންތަކަށް ބޮޑު ގެއްލުމެއް ލިބިދާނެކަށް ފެނިއްޖެ ހާލަތެއްގައި މެނުވީ ސްރީލަންކާގެ ސިފައިން އދ. ގެ ސުލްހަ ބަލައްޓާ ސިފައިންނާއު ހަރަކާތްތެރިވުން މަނާކުރަން ނިންމާފައި." ތަރުޖަމާނު ވިދާޅުވިއެވެ.
"އދ. ގެ ސުލްހަ ބަލަހައްޓާ ސިފައިންގެ ތެރޭގައި މިހާރު ޚިދުމަތްކުރަމުންދާ ސްރީލަންކާގެ ސިފައިންގެ ޔުނިޓާއި، އޮފިސަރުން އަންނަ މަހުގެ ތެރޭގައި ފޮނުވާލެވޭނެ. އަދި އެމީހުންގެ ބަދަލުގައި ސްރީލަންކާގެ ސިފައިން ދެން ނުގެނެވޭނެ." ފަރްހާން ހައްޤު ވިދާޅުވިއެވެ.
2015 ވަނަ އަހަރު އދ. ގެ ހައި ކޮމިޝަނާ ފޯ ހިއުމަން ރައިޓްސް ގެ އޮފީސް (އޯސީއެޗްއާރ) އިން ޝާއިއުކުރި ރިޕޯޓެއްގައި ވާތުން ސިލްވާގެ ކޮމާންޑަރުކަމުގެ ދަށުގައި ހަރަކާތްތެރިވި ސިފައިންގެ ޔުނިޓަކުން ވަނީ ޕުޓުމައްޓަލަން އަވަށުގެ ހޮސްޕިޓަލަކަށާއި، އދ. ގެ މަރުކަޒަކަށް ހަމަލާދީފައެވެ.
