ޕާކިސްތާނުގެ އުތުރގެ ސަރަހައްދުތަކަށާއި، ކަޝްމީރުގެ ޕާކިސްތާނު ފަޅިއަށް މިއަދު ހަވީރު އައި ރިކްޓާ މިންގަނޑުން 8.5 މެންގްނިޓިއުޑްގެ ބިން ހެލުމުގައި ބޮޑުތި ގެއްލުންތަކެއް ވެއްޖެއެވެ.
މިހާތަނަށް 19 މީހުން މަރުވެ 300 މީހުން ޒަޚަމްވިކަން އެނިގިފައިވާއިރު، ގިނަ އަދަދެއްގެ ގެތައް ވެއްޓި، އިމާރާތްތަކާއި، މަގުތަކަށް ގެއްލުން ލިބިފައިވާ ކަމަށް ވެއެވެ.
ޕާކިސްތާން މީޓިއޮރޮލިޖިކަން ޑިޕާޓްމަންޓުން ބުނި ގޮތުގައި މިއަދު ހަވީރު 4:01 ގައި އައި ބިންހެލުން އައިސްފައިވަނީ ކަޝްމީރުގެ ކައިރީގައި އޮންނަ އަވަށެއް ކަމުގައިވާ ޖެހެލުމް ކައިރިއަށެވެ. އެ ބިން ހެލުމުގެ އަސަރު ޖެހެލުމް ކައިރީގައި އޮންނަ ކަޝްމީރުގެ މީރްޕޫރުގެ އިތުރަށް ޕާކިސްތާނުގެ ވެރިރަށް އިސްލާމްއާބާދާއި، އިސްލާމްއާބާދު ކައިރީގައި އޮންނަ ރާވަލްޕިންޑީއާއި، ޕަންޖާބުގެ ވެރިރަށް ލާހޯރަށް ކޮށްފައި ވެއެވެ. އަދި ގުޑުން އެރި އެހެން ރަށްތަކުގެ ތެރޭގައި މަރީ، ޗާރްސައްޑާ، ސުވާތު، ޚައިބަރު، އެބަޓްއާބާދު، ބާޖޯރު އަދި ނޯޝޭރާ ހިމެނެވެ.
މީރުޕޫރާ 80 ކިލޯމީޓަރު ދުރުގައި އޮންނަ ރާވަލްކޯޓުގެ ސީނިއާ ފުލުސް އޮފިސަރަކު ވިދާޅުވީ މީރުޕޫރުގެ އިމާރާތްތަކަށް ބޮޑެތު ގެއްލުންތައް ވެފައިވާ ކަމުގައެވެ. އަދި މަގުތައް ކަނޑައިގެން އަޑިއަށްގޮސް ބައެއް އެއްގަމު އުޅަނދުވެސް އެތަންތަނަށް ވެއްޓިފައިވާ ކަމުގައެވެ.
"އެހިސާބުގެ (މީރުޕޫރު ސަރަހައްދުގެ) މަގުތައް ކަނޑައިގެން ގޮސްފައިވާ ކަމުގެ ރިޕޯޓުތައް އަހަރުމެންނަށް ވަނީ ލިބިފައި." ޑިޒާސްޓާ މެނޭޖްމަންޓުގެ ފަރާތުން ވާހަކަފުޅު ދެއްކެވި އައްމާރު ރިޒާ ޝޭޚް ވިދާޅުވިއެވެ.
2005 ވަނަ އަހަރުގެ އޮކްޓޯބަރު މަހުގައި ޕާކިސްތާނަށް އައި 7.6 މެގްނެޓިއުޑްގެ ބިންހެލުމުގައި 73 ހާސް މީހުން މަރުވެ 3.5 މިލިއަން މީހުންގެ ގެދޮރު ނެތުނެވެ.
