މާލެ "ރޯވަމުން" ދާ ކަމަށާއި މާލޭގައި ހިނގައިދިޔަ އެންމެ ބޮޑު އަލިފާނުގެ ޙާދިސާގައި ޝައްކުތަކެއް އެބަހުރި ކަމަށް ކާށިދޫ ދާއިރާގެ މެމްބަރު އަބްދުﷲ ޖާބިރު ވިދާޅުވެއްޖެއެވެ.
ހެންވޭރުގެ އެތައް ގެޔެއް އަނދައި އަޅިޔަށްވެ 400 މީހުން ބޯހިޔާވަހިކަން ގެއްލި ޙާލުގައި ޖެހިގެންދިޔަ ޙާދިސާއާއި ގުޅިގެން މިއަދު އޮތް ރައްޔިތުންގެ މަޖިލީހުގެ ޖަލްސާއަށް ޖާބިރު ހުށަހެޅުއްވި ކުއްލި މައްސަލައިގައި ވާހަކަ ދައްކަވަމުން އޭނާ ވިދާޅުވީ ހެންވޭރުގެ އަލިފާނުގެ ބޮޑު ހާދިސާ ތަހުގީގު ކުރަންޖެހޭނެ ކަމަށެވެ.
ޖާބިރު ވިދާޅުވީ މާލޭގައި މިފަދަ ނުރައްކާތެރި ޙާދިސާއެއް ހިނގައިފާނެ ކަމުގެ "އެލާޓް" ރައްޔިތުންގެ މަޖިލީހުގައިވެސް ތަކުރާރު ވަމުންދާ ކަމަށެވެ. އޭނާ ވިދާޅުވީ ރާއްޖޭގެ އާބާދީގެ ބޮޑު ބަޔެއް ތަފާތު ބޭނުން ތަކަށް މާލެ ހިޖުރަކޮށް ދިރިއުޅެމުންދާއިރު އެއްވެސް ސަރުކާރަކުން މާލޭގެ ޕްލޭނެއް ހަދާފައި ނެތުން އެއީ މިފަދަ ހިތާމަވެރި ޙާދިސާއެއް ކުރިމަތިވާން ޖެހުނު އެއްސަބަބު ކަމަށެވެ.
"އިއްޒަތްތެރި ރައީސް، މިއީ ސަމާސާ ވާހަކައެއްނޫން، މި މާލޭގެ ޕްލޭނިންގއެއް ހަދާކަށްނެތް، އެއްވެސް ސަރުކާރަކުން. މި މާލޭގައި ރާއްޖޭގެ ހުރިހާ އެންމެން ދިރިމިއުޅެނީ" ޖާބިރު ވިދާޅުވިއެވެ.
އޭނާ ވިދާޅުވީ ރަށްރަށުން ގިނަބަޔަކު މާލެއަށް އަންނަނީ ދަރިންނަށް ކިޔަވައިދީ، އެނޫންވެސް ޚިދުމަތް ހުރީ މާލޭގައި ކަމަށްވާތީ ކަމަށާއި ރަށްރަށުން މާލެއަށް މީހުން އަންނަނީ ވަރަށް ބޮޑެތި އުންމީދުތަކެއްވެސް ކުރަމުން ކަމަށެވެ.
"ދެން މާލެ ރޯވެގެން މިދަނީ، ކާކުތޯ މި ރޯކޮށްލީ، އެވެސް ބަލަން އެބަޖެހޭ، އަޅުގަނޑަށް ޝައްކު، މިވަރުގެ ބޮޑު ޙާދިސާއެއް ހިނގައި ދިޔައީމަ ތަހުގީގުގެ މައްޗަށް ތަހުގީގު ކުރަންޖެހޭނެ" ޖާބިރު ވިދާޅުވިއެވެ.
ޖާބިރު ވިދާޅުވީ ޚާއްސަކޮށް މާލޭގެ ކަންކަން ނާޒުކު ފައްތަރެއްގައި އޮތްއިރު ރައްޔިތުންގެ ސަލާމަތާއި ރައްކާތެރިކަން ބަލަހައްޓާ ފަރާތްތަކަށް "އެދޭ ވަރަކަށް ބަޖެޓް ދޭންޖެހޭނެ" ކަމަށެވެ. އަދި މިހާދުވަސް ވީއިރު "މަތިން އައިސް ފެންޖަހާލެވޭ ކަހަލަ ބޯޓު ގަނޑެއް" ރާއްޖޭގައި ނެތީ ކީއްވެތޯ ޖާބިރު ސުވާލު ކުރެއްވިއެވެ. އެކަމަށް އިންޑިޔާގައި މިއަދުން މިއަދަށް "ދަންނަވާލަންވީނޫންތޯ" ވެސް ޖާބިރު ވިދާޅުވިއެވެ.
"ކީއްވެގެންތޯ އަލިފާން ނިވާ ޖެކެޓު ލައިގެން ވަންނަން އުޅުނު ބޭފުޅާ ވަދެފަ، ނުވަދެ ނުކުމެގެން ދިޔައީ، ކިހިނެތްތޯ މިވީ، އެވަރުގެ ޓްރޭނިންގއެއް ދީފައި ނެތީ ކީއްވެގެންތޯ، ކޮންކަމަކާތޯ، ހަނގުރާމައެއް އޮތީތޯ މިގައުމުގައި، މި ގައުމުގެ ސިފައިން މިކަމުގައި އެބަޖެހޭ އިތުރަށް ވިސްނަން" ޖާބިރު ވިދާޅުވިއެވެ.
ހެންވޭރުގައި ހުރި ކެމިކަލް ގުދަނެއްގައި އަލިފާން ރޯވި މި ޙާދިސާގައި އެ ސަރަހައްދުގައި ހިފި އަލިފާން ކޮންޓްރޯލްނުވެ އެތައް ގެޔެއް ވަނީ އަނދައިގެން ގޮސްފައެވެ. އަލިފާން ރޯވި ގެތަކުގައި ތާށިވި މީހުންގެ ތެރެއިން އެންމެ މީހަކު ފިޔަވައި އެހެން ހުރިހާ މީހުން ވަނީ ސަލާމަތް ކޮށްފައެވެ. މީހުން ސަލާމަތް ކޮށްދިނުމުގައި ސިފައިންނާއި ފުލުހުންގެ އިތުރުން އާންމު ރައްޔިތުންގެ ތެރެއިން ބަޔަކުވެސް ހިލޭ ސާބަހަށް މަސައްކަތް ކޮށްފައިވެއެވެ.
