މާލޭގައި ރޭ ހިނގި އަލިފާނުގެ ހާދިސާގައި ނިޔާވި ޢާއިޝަތު ޝައުނާގެ އާއިލާއަށް ރައީސް އިބްރާހީމް މުޙައްމަދް ޞާލިޙް ތައުޒިޔާ ފޮނުއްވައިފިއެވެ. ހޮނިހިރު ދުވަހު ކުރެއްވި ޓުވީޓެއްގައި ރައީސް ވިދާޅުވީ ޝައުނާ ނިޔާވި ޚަބަރު އެމަނިކުފާނު އަޑުއެއްސެވީ ފުން ހިތާމަޔާއެކު ކަމަށެވެ. އަދި ޝައުނާއަށް ސުވަރުގޭގެ މަތިވެރި ނިޢުމަތް މިންވަރު ކުރެއްވުން އެދި ދުޢާކުރައްވާކަަމަށެވެ.
ރޭގަ ހެންވޭރުގައި ހިނގާދިޔަ ނުރައްކާތެރި އަލިފާނުގެ ހާދިސާގައި އާއިޝަތު ޝައުނާ ނިޔާވި ހަބަރު އަޅުގަނޑު އަޑުއެހީ ފުން ހިތާމައާއެކު. މިހިތާމައިގެ ދަނޑިވަޅުގައ ޢާއިލާއަށް ތައުޒިޔާ ދަންނަވަން. މާތް ﷲ ޝައުނާއަށް ސުވަރުގޭގެ މަތިވެރި ނިއުމަތް މިންވަރު ކުރައްވާށި.
— Ibrahim Mohamed Solih (@ibusolih) September 21, 2019
ޝައުނާގެ ހަށިގަނޑު ފެނިފައިވަނީ އޭނޭ ގެއްލިފައިވާ ކަމާށް އާއިލާ އިން ރިޕޯޓުކުރުމާ ގުޅިގެން ރެސްކިއު ޓީމުން ކުރި މަސައްކަތުން އޭނާ ދިރިއުޅޭ ގޭގެ ތެރެއިންނެވެ. އޭނާ ފެނުނުއިރު ކާކުކަން ނޭނގޭ ވަރަށް ހަށިގަނޑު ވަނީ އަނދާފައެވެ. މައުލޫމާތު ލިބިފަިއވާ ގޮތުގައި އޭނާގެ ހަށިގަނޑުގެ 60 އިންސައްތަ ވަނީ އަނދާފައެވެ.
ޝައުނާގެ މޫނު ދެއްކުމަށް ހަމަޖެހިފައިވަނީ ހަމައެކަނި އާއިލާގެ މެންބަރުންނަށެވެ. އޭނާގެ ޖަނާޒާ އޮންނާނީ މިއަދުގެ މެންދުރު ނަމާދަށްފަހު އިސްލާމީ މަރުކަޒުގައެވެ.
