ކެންސަރު ބައްޔަށް ފަރުވާދޭ ޚާއްސަ ހޮސްޕިޓަލެއް ރާއްޖޭގައި ޤާއިމް ކުރުމުގެ މަޝްރޫޢެއް ވަރަށް އަވަހަށް ރާއްޖޭގައި ފެށޭނެ ކަމަށް ރައީސް އިބްރާހީމް މުޙައްމަދު ޞާލިޙު މިއަދު ވިދާޅުވެއްޖެއެވެ.
ނޫސްވެރިންނާ ބައްދަލު ކުރައްވައި އެމަނިކުފާނު މިއަދު ދެއްކެވި ވާހަކަފުޅުގައި ވިދާޅުވީ މި ސަރުކާރުގެ ފަސް އަހަރުގެ ދައުރު ނިމޭއިރު ރާއްޖޭގެ ސިއްޙީ ދާއިރާ ރަނގަޅުވެ ބޮޑު ބަދަލެއް ފެނިގެންދާނެ ކަމަށެވެ. އެދާއިރާ ހަރުދަނާ ކުރުމުގެ މަސައްކަތް ސަރުކާރުން މިހާރުވެސް ކުރައްވާ ކަމަށް އެމަނިކުފާނު ވިދާޅުވިއެވެ.
ކެންސަރ ބައްޔަށް ފަރުވާދޭ ހޮސްޕިޓަލް ޤާއިމް ކުރައްވާނީ ހުޅުމާލޭގައި ކަމަށް ވެސް ރައީސް ވިދާޅުވިއެވެ. އެ މަޝްރޫޢުގެ މަސައްކަތް 18 މަސްތެރޭގައި ނިމޭނެ ކަމަށް ވެސް ރައީސް ވިދާޅުވިއެވެ.
ސިއްޙީ ދާއިރާ ހަރުދަނާ ކުރުމުގެ ގޮތުން އައިޖީއެމްއެޗަށް ބޮޑު ބަދަލުތަކެއް ގެންނެވުމުގެ އިތުރަށް ރާއްޖޭގެ އެކި ސަރަހައްދުތަކުގައި ޓާޝަރީ ހޮސްޕިޓަލްތައް ހުޅުވިގެންދާނެ ކަމަށްވެސް ރައީސް ވިދާޅުވިއެވެ. މި ކަމާބެހޭ އިތުރު ތަފްސީލެއް ރައީސް ނުދެއްވައެވެ. ކެންސަރ ހޮސްޕިޓަލްގެ މަޝްރޫޢު ފަށްޓަވާނެ ތާރީޚެއް ވެސް ރައީސް ވިދާޅެއް ނުވެއެވެ.
