ޓަގު ބޯޓެއްގައި ފިއްލަވައިގެން ރާއްޖެ ދޫކުރައްވައި އިންޑިޔާގެ ސޫތުކުޅިއަށް އެތެރެވެވަޑައިގަންނަވަން އުޅުއްވަނިކޮށް އަތުލައިގެން ރާއްޖެ ގެނެސްފައިވާ ކުރީގެ ނައިބު ރައީސް އަޙްމަދު އަދީބުގެ މައްޗަށް އެ މަސައްލައިގެ ޙުކުމް މިއަދު އިއްވާނެއެވެ.
އެ މައްސަލައިގެ އަޑު އެހުންތައް ނިމިފައިވާއިރު ހުކުމް އިއްވާ ޝަރީއަތުގެ މަޖިލިސް ކްރިމިނަލް ކޯޓުގައި ތާވަލް ކޮށްފައި ވަނީ މިއަދު މެންދުރުފަހު 2 ޖަހާއިރަށެވެ. އަދީބު ވަނީ ފިއްލަވައިގެން ވަޑައިގެންނެވުނީތީ ކުށަށް އިއުތިރާފުވެވަޑައިގެން މައާފަށްވެސް އެދިވަޑައިގެންފައެވެ.
މި މައްސަލައިގައި އަދީބު ކުށަށް އިއުތިރާފުވެވަޑައި ނުގެންނެވި ނަމަ އަދީބުގެ މައްޗަށް 4 މަހާއި 24 ދުވަހުގެ ޖަލު ހުކުމެއް އައުން އެކަށީގެންވެއެވެ. ނަމަވެސް އަމިއްލަފުޅަށް ކުށަށް އިއުތިރާފުވެވަޑައިގެން މައާފަށް އެދިވަޑައިގެންފައިވާތީ އެ ހުކުމް 3 މަހާއި 18 ދުވަހަށް ލުއިވުމުގެ ފުރުޞަތު އަދީބުގެ މައްޗަށް ދައުވާ ކޮށްފައިވާ ޤާނޫނުލް އުޤޫބާތުގެ 533 ވަނަ މާއްދާގެ (ހ) އާއި (ނ) ގެ ދަށުން ލިބިދެއެވެ.
އަދީބުގެ މައްޗަށް ޚިޔާނާތުގެ ތުހުމަތު ތަކެއްގައި ތަގުގީގު ހިންގަމުން ދަނިކޮށް ފިއްލަވައިގެން އިންޑިޔާއަށް ދަތުރު ކުރެއްވީ ރާއްޖެއަށް ހިލަވެލި ހުސްކޮށްފައި ފުރައިގެންދިޔަ ޓަގު ބޯޓެއްގައެވެ. ނަމަވެސް އެ ޓަގުގެ ފަޅުވެރިޔަކު ވަނީ އެ ބޯޓުގައި އަދީބު ހުންނެވިކަން އިންޑިޔާގެ ކަމާބެހޭ ފަރާތްތަކަށް އަންގައި އެކަން ފަޅާ އަރުވާލާފައެވެ. އެއާއެކު އިންޑިޔާގެ ކަމާބެހޭ ފަރާތްތަކުން ވަނީ އަދީބު އިންޑިޔާއަށް އެތެރެވެވަޑައިގަތަ ނުދެއްވައި އަނބުރައި އެ ޓަގު ބޯޓުގައި ރާއްޖެއަށް ފޮނުވާލާފައެވެ.
ދިވެހި ފުލުހުންގެ ބެލުމުގެ ދަށަށް އަނބުރައި އަދީބު ގެންދެވީ ކަނޑުމަތިންނެވެ. އަދީބުގެ އިތުރުން އަދީބު ދަތުރު ކުރެއްވި ސިންގަޕޫރަށް ނިސްބަތްވާ ވާގޯ9 ކިޔާ ޓަގު ބޯޓާއި އެ ބޯޓުގެ ކެޕްޓަނުވެސް މައްސަލަ ނިމެންދެން ރާއްޖެއިން ފުރައިގެން ނުދެވޭގޮތަށް ވަނީ ހަދާފައެވެ.
