ލައިބީރިޔާގެ ވެރިރަށް މޮންރޯވިޔާގެ އިރުމަތިން 11 ކިލޯމީޓަރު ދުރުގައި އޮންނަ ޕޭނަސްވިލްގައި ހުންނަ މަދަރުސާއެއްގައި އަލިފާން ރޯވެ، މަދުވެގެން 27 ދަރިވަރުން ފިހިގެން މަރުވެއްޖެއެވެ. މަރުވި ދަރިވަރުންނަކީ އުމުރުން 10 އަހަރާއި 20 އަހަރާއި ދެމެދުގެ ދަރިވަރުން ކަމަށް ވެއެވެ.
ދަނާލަކާ (ބޯރޑިންގ) އަކާއެކު ހަދާފައިވާ އެ މަދަރުސާއަކީ ޤުރްއާން އުނގަންނަދޭ ތަނެކެވެ. މިސްކަތަކާ އިންވެގެން ހަދާފައި ހުރި އެދަނާލުގައި ރޯވީ ދަރިވަރުން ނިދަން ތިއްބާ ކަމަށް ޚަބަރުލިބެއެވެ.
ފުލުހުންގެ ތަރުޖަމާނު މޯސެސް ކާޓަރު ބުނި ގޮތުގައި ރޯވި އަލިފާންގަނޑުން ސަލާމަތްވެ ނުކުމެވުނީ މިސްކިތުގެ އިމާމަށާއި، ދެ މުދައްރިސަކަށާއި، ދަރިވަރަކަށެވެ.
"އަހަރެންގެ ދުއާ ވަނީ ޕޭނަސްވިލް ސިޓީގައި ރޭ މަރުވި ކުދިންގެ އާއިލާތަކާއެކު. މިއީ ހާދިސާގެ ޝިކާރައަކަށްވި ކުދިންގެ އާއިލާތަކާއި، މުޅި ލައިބީރިޔާއަށްވެސް އުނދަގޫ ދަނޑިވަޅެއް." ލައިބީރިޔާގެ ރައީސު ޖޯޖް ވެއާ ކުރެއްވި ޓުވީޓެއްގައި ވެއެވެ.
ޖޯޖް ވިޔާ ވަނީ ހާދިސާ ހިނގި ތަނަށް މިއަދު ޒިޔާރަތް ކުރައްވާފައެވެ. އެ ޒިޔާރަތަށް ފަހު ރައީސުގެ ތަރުޖަމާނު ހާމަކުރި ގޮތުގައި އަލިފާނުގެ ހާދިސާގައި ދެ މުދައްރިސަކުވެސް ވަނީ މަރުވެފައެވެ.
ފުލުހުންގެ ތަރުޖަމާނު ކާޓަރު ބުނީ ލަފާކުރެވޭ ގޮތުގައި ރޯވާން މެދުވަރިވީ ކަރަންޓު ޝޯޓެއްގެ ސަބަބުން ކަމަށާއި، ހަގީގަތް ހޯދަން ތަހުގީގެއް ފަށާފައިވާ ކަމަށެވެ. ކައިރީގައި ހުރި ފައްޅީގެ ފާދިރީ ބުނީ އޭނާއަށް ހޭލެވުނީ މަދަރުސާގައި ރޯވެ އަނދަމުންދާ އަޑަށް ކަމަށާއި، އަވަހަށް އެހީއަށް އެދުނު ކަމަށެވެ.
އެ އަވަށުގެ މީހުން ބުނި ގޮތުގައި އެ މަދަރުސާގެ ދަރިވަރުންނަކީ އަޚްލާގު ރަނގަޅު، މަޑުމައިތިރި ކުދިންނެވެ. އަދި އެކުދިން ރޭނގަޑު ވަރަށް ދަންވަންދެން ޤުރްއާން ކިޔަވާށާއި، ނަމާދުކުރަން ތިބެއެވެ.
އެ މަދަރުސާގައި ކިޔަވަމުން އައީ ކިތައް ދަރިވަރުންކަން އަދި ކަށަވަރުވެފައި ނުވެއެވެ.
