ކުރީގެ ރައީސް އަބްދުﷲ ޔާމީންގެ ސަރުކާރުން ތިން މަޝްރޫއެއްގައި ދޫކޮށްފައިވާ ފްލެޓްތަކާއި ގުޅޭ މައްސަލަތައް ބަލުމަށްޓަކައި ރައީސުލްޖުމްހޫރިއްޔާ އިބްރާހިމް މުޙަންމަދު ސޯލިޙް އުފެއްދެވި ފްލެޓް ތަކުގެ މައްސަލަބަލާ ކޮމިޓީން މީގެ ކުޑަދުވަސް ކޮޅެއް ކުރިން އިސްތިއުފާ ދެއްވާފައިވާނެ ކަމަށް އެ ކޮމިޓީގައި ހިމެނިވަޑައިގަންނަވާ މުޙަންމަދު މުއިއްޒު އަދުނާން ވިދާޅުވެއްޖެއެވެ.
ކޮމިޓީގައި ހިމެނިވަޑައިގަންނަވާ އަޙްމަދު ތޮލާލް ކޮމިޓީން އިސްތިއުފާ ދެއްވި ޚަބަރާއެކު، އެކޮމިޓީގައި ދެން ތިއްބެވި މެމްބަރުންގެ ތެރޭގައި މުއިއްޒުގެ ނަންވެސް ލިޔެފައިވާތީ އެކަން ސާފު ކޮށްދެއްވުމުގެ ގޮތުން މުއިއްޒު ވަނީ އެގޮތަށް ބަޔެއް ނޫސްތަކުގައި ލިޔެވިފައި އެވަނީ އޮޅުމެއް ކަމަށް ވިދާޅުވެފައެވެ. އޭނާ ވިދާޅުވީ އޭނާ ފްލެޓް ކޮމިޓީން އިސްތިއުފާ ދެއްވިތާ މިހާރު ދުވަސްކޮޅެއް ވެއްޖެ ކަމަށާއި މިހާރު އޭނާއަކީ ފްލެޓް ކޮމިޓީގެ މެމްބަރެއް ނޫން ކަމަށެވެ. މުއިއްޒު ވިދާޅުވީ އޭނާގެ އިސްތިއުފާ ރައީސް ސޯލިޙްވެސް ގަބޫލުފުޅު ކުރައްވާފައިވާ ކަމަށެވެ. ނަމަވެސް އިސްތިއުފާ ދެއްވި ސަބަބެއް ވިދާޅެއް ނުވެއެވެ.
މުއިއްޒުގެ އިތުރުން އެ ކޮމިޓީގެ މެމްބަރު ކަމުން ތޮލާލްވެސް އިސްތިއުފާ ދެއްވިއިރު އޭނާ ވިދާޅުވެފައި ވަނީ އިސްތިއުފާ ދެއްވީ ކޮމިޓީއަށް އެކަށީގެންވާ ވަރަށް ވަގުތު ނުދެއްވޭތީ، ވަގުތު ދެއްވޭނެ އެހެން ބޭފުޅަކަށް ފުރުޞަތު ދިނުމުގެ ގޮތުން ކަމަށެވެ.
މުއިއްޒު އާއި ތޮލާލް ފްލެޓް ކޮމިޓީން އިސްތިއުފާ ދެއްވުމާއެކު އެ ދެބޭފުޅުންގެ ބަދަލުގައި މިހާރު އިތުރު ދެބޭފުޅަކު ފްލެޓް ކޮމިޓީއަށް ރައީސް ވަނީ އައްޔަންވެސް ކުރައްވާފައި ކަމަށް މައުލޫމާތު ލިބިފައިވެއެވެ.
ފްލެޓް ކޮމިޓީން ބަލަނީ ކުރީގެ ސަރުކާރުން އެންމެ ފަހުން ދޫކުރި "ހިޔާ" މަޝްރޫއުގެ 25 ބުރީގެ ޓަވަރުތަކުން ދޫކުރި ދެ ކޮޓަރީގެ ފްލެޓްތަކުގެ މައްސަލަ އާއި އޭގެކުރިން ހުޅުމާލެއިން ދޫކުރި "ގެދޮރުވެރިކުރުން" ޕްރޮގްރާމްގެ ތިން ކޮޓަރީގެ ފްލެޓް ތަކުގެ މައްސަލައިގެ އިތުރުން ރައީސް ނަޝީދުގެ ސަރުކާރުން ހުޅުވާލައިގެން އޭރު ކުރިޔަށް ގެންދިޔަ "ގުޅީފަޅު" މަޝްރޫއުތަކުގެ މައްސަލައެވެ.
މި މަޝްރޫއުތަކުން ފްލެޓް ދިނުމުގައި ހައްގު ނޫން މީހުންނަށް ފްލެޓް ދީފައިވާ ކަމަށް ބޮޑެތި ތުހުމަތުތަކެއް ކުރެވޭތީ ރައީސް ސޯލިޙުގެ ރިޔާސީ ވައުދުގެ ދަށުން އެ މައްސަލަބަލައި އިންސާފުން ފްލެޓްތައް ދިނުމަށް އުފެއްދި ފްލެޓް ކޮމިޓީން މިއަހަރުގެ ޑިސެމްބަރުގެ ނިޔަލަށް އެކަން ބަލައި ނިންމަންޖެހެއެވެ.
ކޮމިޓީން މި މައްސަލައިގެ ތެރެއަށް ފުރަތަމަ ވަނުމާއެކު ބުނެފައި ވަނީ ހިޔާ މަޝްރޫއު އާއި ގެދޮރުވެރިކުރުން މަޝްރޫއުގައިވެސް ޝަރުތު ހަމަނުވާ މީހުންނަށް ފްލެޓް ދީފައިވާކަން ކޮމިޓީއަށް ފާހަގަ ކުރެވޭ ކަމަށެވެ. އެހެންވެ ކޮމިޓީން ވަނީ ފްލެޓް ލިބުނު މީހުންގެ ފުރިހަމަ މައުލޫމާތާއެކު ޝަކުވާ ހުށަހެޅުމަށްވެސް މީގެކުރިން ހުޅުވާލާފައެވެ. ކޮމިޓީން ބުނީ މައްސަލަތައް ބެލުމުގައި ޝަކުވާ ފޯމުތަކަށްވެސް ވަރަށް ބޮޑަށް ބަލާނެ ކަމަށެވެ.
ހިޔާ މަޝްރޫއިން ދޫކުރި 7000 ފްލެޓަށް 22،000 މީހުން ކުރިމަތި ލާފައިވާއިރު ކުރީގެ ސަރުކާރުން ވަނީ ފްލެޓް ލިބުނު މީހުންނަށް ފްލެޓް ލިބުނުކަމުގެ ލިޔުންވެސް ހަވާލުކޮށްފައެވެ.
