މާލޭގެ ހަލަނބޮލި މާހައުލުން ބޯ ނެރެލުމަށް ފަހު އެންމެ ކައިރިން ހިތްހަމަ ޖައްސާލަން ދާން އޮންނަ ރަށަކީ ފަހަކަށް އައިސް ހުޅުމާލެއެވެ. ނަމަވެސް މާލެ އާއި ހުޅުމާލެ ގުޅުވާލަދިން ބުރިޖާއެކު އެކަން މުޅިން ބަދަލުކޮށްލިއެވެ. ހުޅުމާލޭ ބީޗުގައި މޫދާ ހަމައަށް ދަމާލި ކެފޭތަކުގެ ގޮނޑިބަރިތަކާއެކު ހުޅުމާލެއަކީ ދަތުރު ޖައްސާލާ މީހުންގެ މަންޒިލަކަށް ވެފައިއޮތް އޮތުން ހުއްޓި އެއީ ހަމައެކަނި ކޮފީބޯން މާލެއިން އަންނަ މީހުންގެ މަންޒިލަކަށް ވިއެވެ. އެކަމަކު މިހާރު އަނެއްކާވެސް އެކަން މިއޮތީ އަނެއްކޮޅަށް ބަދަލުވެފައެވެ.
ހުޅުމާލޭ ބީޗުގައި ހުރި ގެސްޓު ހައުސްތައް ހިންގާ މީހުން އެ ގެސްޓު ހައުސްއަކާ ދިމާއިން ބީޗު ނަގައި، ސާފުކޮށް އެތަންތަން އެމީހުންގެ ކެފޭގެ އެންމެ ބޮޑު ބަޔެއްގެ ގޮތުގައި ހެދިއެވެ. އެއާއެކު އެބަޔަކަށް ގޮނޑި ޖެހުނު ހިސާބަކު ގޮނޑި ޖަހައި ފުރާލިއެވެ. ގުންޑޮޅިއާ ހަމައަށް ގޮނޑިތައް ޖަހައި މުޅި ބީޗު ފުރާލިއެވެ. ހުޅުމާލެއަށް ދަތުރު އައިސް މީހުން އިށީދެލައި، ދުވެ، ކުޅެލައި ހަދަން އޮތް ބީޗު އެފަދަ މީހުންނަށް މުޅިން ނެތިދިޔައެވެ. ކޮފީ ބޯ މީހުންގެ ހާއްޔަކަށް ހުޅުމާލޭ އަތިރިމަތި ބަދަލުކޮށްލިއެވެ.
ސިނގިރޭޓާއި އެނޫންވެސް ދުންފަތުގެ ސާމާނުގެ ދުމުން މުޅި ބީޗު ދުންބޯ ކޮށްލިއެވެ. އެހިސާބުން ދަތުރު އަންނަ މީހުން ހިތް އުފާކޮށްލަން އޮތް ބީޗު ގެއްލުމާއެކު ހަމައެކަނި މޫދަށް އެރިލަން އަންނަ މީހަކު ނޫނީ ދަތުރު ނާދެއެވެ. ދަތުރު އަންނަ މީހުން ގެއިން ހަދައިގެން ގެންނަ ކާބޯތަކެއްޗާއި އެނޫންވެސް ސާމާނު ބެހެއްޓޭނެ ތަންފުކެއް ބީޗަކު ނެތެވެ. އެހެންވެ ދަތުރު އަންނަ މީހުންގެ ހިތް އުފާކޮށްދޭ މަންޒިލަކަށް ވެފައި އޮތް ހުޅުމާލެ މުޅިން ބަދަލުވިއެވެ.
ނަމަވެސް މިހާރު ވަރަށް ތަފާތެވެ. އެޗްޑީސީގެ ވަރުގަދަ ނިންމުމަކާއެކު ބީޗުގައި ކެފޭ ހިންގަމުން އައި މީހުން ބީޗުން ނެރެލުމާއެކު ކުރީގެ މަންޒަރު އަލުން ހުޅުމާލެއިން މިހާރު ފެންނަން ފަށައިފިއެވެ. ބީޗުގައި ރަސްކަން ކުރަމުން އައި ކެފޭތައް އެތަނުން ނަގައި ހުޅުމާލޭގެ އަތިރިމަތި ހުސްކޮށްލުން ވެގެންދިޔައީ ހުޅުމާލެއަށް ދަތުރު އަންނަ މީހުންނަށް ބޮޑު ނަސީބަކަށެވެ. އެއާއެކު މިހާރު ހަފްތާ ބަންދު ދުވަސްތައް ހުޅުމާލޭ އަތިރިމައްޗާއި މޫދުގެ ސަރަހައްދުތައް ފެންނަނީ ވަރަށް ބިޒީ ކޮށެވެ. ތޮއްޖެހި ބާރުވެފައި އޮއްވައެވެ.
ބީޗު ސަރަހައްދުގެ ކޮޅުން ކޮޅަށް މިހާރު ހަފުތާ ބަންދުގައި ފުރާލާފައި އޮންނަނީ ދަތުރު އަންނަ މީހުންނެވެ. ބީޗުން ފެންނަނީ ބޮޑެތި "މަޖާ ގަނޑު" ހަދައިގެން އައިސް އާއިލާތައް އެކުގައި ކައިބޮއި އުޅޭ މަންޒަރެވެ. އެކުވެރިންތައް ފުޓްބޯޅަ އާއި ފައިގަތަޅާ ފަދަ ކުޅިވަރުތައް ކުޅޭ މަންޒަރެވެ. ކުޑަކުދިންނާއި އުމުރުން ދުވަސްވީ މީހުންވެސް ދޮންވެލި ބީޗުގައި މަޖާ ނަގައި މޫދަށް އެރި ތަފާތު މޫދު ކުޅިވަރުތައް ކުޅެމުން އަންނަ މަންޒަރެވެ. ދަތުރު އަންނަ މީހުން ވަރުބަލި ފިލުވާލަން ގަސްގަސް ދޮށުގައި ޖައްސާލައިގެން އަރާމުކޮށްލާ މަންޒަރެވެ.
މިހާރު ހަފުތާ ބަންދު ދުވަސްތަކުގައި ވަރަށް ހެދުނު މީހުން ހުޅުމާލެއަށް ދަތުރު އަންނަން ފަށައެވެ. އާންމުގޮތެއްގައި ހެނދުނު 7 ޖަހާއިރަށް މީހުން ބީޗަށް އަންނަން ފަށައެވެ. އެއާއެކު ހުކުރު ދުވަހު އިރު އޮއްސެން ކައިރި ވަންދެން ބީޗު ސަރަހައްދު އޮންނަނީ ފުރިފައެވެ. ހޮނިހިރުވެސް ހަމަ އެހެންނެވެ.
ހުޅުމާލެ އަނެއްކާވެސް ހަފުތާ ބަންދުގައި ގިނަބަޔަކު ދަތުރު އަންނަ މަންޒިލަށް ބަދަލުވުމާއެކު އޭގެފައިދާ ހުޅުމާލޭގައި ހިންގާ ގެސްޓު ހައުސްތަކާއި ކެފޭ ރެސްޓޯރެންޓު ތަކަށްވެސް ވަރަށް ބޮޑެވެ. ހަފުތާ ބަންދު ދެ ދުވަހަކީ ހުޅުމާލޭ ގެސްޓު ހައުސްތަކަށްވެސް މިހާރު ވަރަށް ބާރު ބޮޑު ދެދުވަހަށް ވަނީ ވެފައެވެ. އެހެންކަމުން ހުޅުމާލޭ ބީޗުން ކެފޭތައް ނެރެލުން ވެގެންދިޔައީ އެތައްހާސް ބަޔަކު ބޯ ހާސްކަމުން ހިތް އުފާކޮށްލުމަށް ލިބުނު ރަނުގެ ފުރުޞަތަކަށެވެ.
