ޒިމްބާބްވޭ ކުރީގެ ރައީސު ރޮބަޓް ގަބްރީލް މުގާބޭ އުމުރުފުޅުން 95 އަހަރުގައި އަވަހާރަވެއްޖެއެވެ.
"ޒިމްބާބްވޭ ގެ ބާނީ އަދި ކުރީގެ ރައީސު ކޮމްރެޑް ރޮބަޓް މުގާބޭ އަވަހާރަވީ ވާހަކަ އަހަރެން މި އިއުލާންކުރަނީ ފުން ހިތާމައާއެކު." މުގާބޭ އަވަހާރަވީ ވާހަކަ ރާއްޖޭ ގަޑިން ހެނދުނު 10:05 ގައި އިއުލާންކުރައްވަމުން ޒިމްބާބްވޭގެ މިހާރުގެ ރައީސު އެމަސަން މްނާންގަގްވާ ކުރެއްވި ޓުވީޓުގައި ވެއެވެ.
"ކޮމްރެޑް މުގާބޭއަކީ މިނިވަންކަމުގެ ރަމްޒެއް. މުޅި އެފްރިކާގެ ލީޑަރެއް. އޭނާ ހަޔާތް ވަގުފުކުރެއްވީ އޭނާގެ ރައްޔިތުންނަށް އިގްތިސާދީ އަދި އިޖްތިމާއީ ކުރިއެރުން ހޯއްދަވައިދެއްވުމަށާއި، އެމީހުން ބާރުވެރިކުރުމަށް. އަހަރުމެންގެ މި ގައުމާއި މި ބައްރުގެ ތާރީޚުގައި އޭނާ ދައުރު ދުވަހަކުވެސް ހަނދާންނެތިގެން ނުދާނެ." މްނާންގަގްވާގެ ޓުވީޓުގައި ވެއެވެ.
މުގާބޭ އަވަހާރަވީ ވަގުތަކާއި ތަނެއް އިއުލާންކޮށްފައި ނުވި ނަމަވެސް، އޭނާ އަވަހާރަވެފައިވަނީ މިއަދު ހެނދުގެ ވަގުތެއްގައި ސިންގަޕޫރުގައިކަން ޚަބަރުތަކުން އެނގެއެވެ. މުގާބޭ ގެންދެވީ ކޮން ބައްޔެއްކަން ހާމަކުރެވިފައި ނުވާ ބައްޔަކަށް ފާއިތުވި އެޕްރީލް މަހުއްސުރެ ސިންގަޕޫރުގައި ފަރުވާ ހޯއްދަވަމުންނެވެ. އޭނާ ފަރުވާ ހޯއްދަވަމުން ގެންދެވީ ޕްރޮސްޓޭޓް ކެންސަރަށް ކަމަށް ބައެއް ޚަބަރުތަކުން ބުނި ނަމަވެސް އޮފިޝަލުން ވަނީ އެކަން ދޮގުކުރައްވާފައެވެ.
ކުރީގެ ސިޔާސީ ކުށްވެރިޔާ، އަދި ހަނގުރާމަވެރި ލީޑަރު މުގާބޭ 1980 ވަނަ އަހަރުގެ އިންތިޚާބު ކާމިޔާބުކުރައްވައި ވެރިކަމަށް ވަޑައިގަތީ އޭރުގެ ބައިމަދު ދޮންމީހުގެ ސަރުކާރު ބަލިކުރެއްވުމަށް ފަހުގައެވެ. ފެބްރުވަރީ މަހު އިންތިޚާބު ކާމިޔާބުކުރެއްވުމަށްފަހު 18 އެޕްރީލް 1980 ގައި އިނގިރޭސިންގެ އަތްދަށުން މިނިވަންވުމުގެ އެއްބަސްވުމުގައި ސޮއިކުރައްވައި މިނިވަންކަން އިއުލާންކުރެއްވިއެވެ.
21 ފެބްރުއައީ 1924 ގައި އޭރުގެ ދެކުނު ރޮޑޭޝިޔާގެ ޒްވިމްބީ ޑިސްޓްރިކްޓަށް އުފަންވެވަޑައިގަތް މުގާބޭ ވަނީ 1980 ވަނަ އަހަރުން ފެށިގެން 1987 ގެ ނިޔަލަށް ޒިމްބާބްވޭގެ ބޮޑުވަޒީރުކަން ކުރައްވާފައެވެ. އެއަށްފަހު އޭރު އެ ގައުމުގައި އޮތް ބަރުލަމާނީ ނިޒާމު ރިޔާސީ ނިޒާމަކަށް ބަދަލުކުރައްވައި 1987 ވަނަ އަހަރު ޑިސެންބަރު މަހުގެ 31 ވަނަ ދުވަހު ރައީސުކަމާ ހަވާލުވެވަޑައިގަތެވެ.
އޭނާގެ ވެރިކަމާ ދެކޮޅަށް ޒިމްބާބްވޭގައި މުޒާހަރާތައް އާއްމުވެ ރައްޔިތުން މަގުމައްޗަށް ނުކުތުމުން ސިފައިން ނުކުމެ 21 ނޮވެންބަރު 2017 ގައި އޭނާ ވެރިކަމުން ދުރުކުރަންދެން މުގާބޭ ހުންނެވީ ޒިމްބާބްވޭގެ ރައީސުކަމުގައެވެ.
