އެޓްލާންޓިކް ކަނޑުގައި މިހާތަނަށް އުފެދުނު އެންމެ ބާރުގަދަ އެއް ޠޫފާން 'ޑޯރިއަން' ބަހާމާސްގެ އުތުރުގެ ރަށްތަކަށް އަރައިފިއެވެ. މިއީ ޠޫފާން ގިންތިކުރެވޭ އެންމެ މަތީ ގިންތި ކަމުގައިވާ 5 ވަނަ ގިންތީގެ ޠޫފާނެކެވެ.
ފްލިރިޑާގެ މަޔާމީގައި ހުންނަ އެމެރިކާގެ ނޭޝަނަލް ހަރިކޭން ސެންޓަރ (އެންއެޗްސީ) އިން ބުނި ގޮތުގައި 'ޑޯރިއަން' އިއްޔެ މެންދުރު 12:40 (ރާއްޖޭ ގަޑިން ރޭ 9:40) ގައި ބަހާމާސް އުތުރުގައި އޮންނަ އަބަކޯސް އައިލޭންޑްސްގެ އެލްބޯ ކޭ އަށް އެރިއިރު ޠޫފާނުގެ ވައި ހުރީ ގަޑިއަކު 295 ކިލޯމީޓަރަށެވެ. މިއީ ޠޫފާންތަކުގެ ރިކޯޑު ބަލަހައްޓަން ފެށިފަހުން ޠޫފާނެއް އެއްގަމަށް އެއިއިރު ވައިޖެހުނު އެއްމެ ބާރުމިނެވެ.
ޠޫފާނުގެ ސަބަބުން އުފެދުނު ބިޔަ ރާޅުތަކާއި، ޠޫފާނާއެކު އައި ބޯ ވާރެއާ، އާދަޔާ ޚިލާފަށް ބާރު ވައިގެ ސަބަބުން ޠޫފާން އެރި ސަރަހައްދަށް ވަނީ ބޮޑެތި ގެއްލުންތަކެއް ވެފައެވެ.
އެންއެޗްސީގެ ޑިރެކްޓަރު ކެން ގްރަހަމް ވިދާޅުވިގޮތުގައި ބަހާމާސްގެ ރަށްތަކުގައި ޠޫފާނީ ހާލަތު ތިރީހަކަށް ގަޑިއިރަށް އޮންނާނެ ކަމަށް ލަފާކުރެވެއެވެ.
"އެ ހާލަތު އެއީ ޠޫފާނީ ބާރުވައި. އެއީ 10 ފޫޓު، އަދި ބައެއް ސަރަހައްދުތަކުގައި 20 ފޫޓު ރާޅު. އަދި އެއީ 15 އިންޗިއާއި 20 އިންޗިއާ ދެމެދުގެ ބޯ ވާރޭ." އޭނާ ވިދާޅުވިއެވެ.
އާންމުކޮށް ޠޫފާން އަރާ ސަރަހައްދެއްގައި އޮންނަ ގައުމަކަށް ވާތީ ބާހާމާސް ގައި ގިނަ ގެތައް އަޅާފައި ހުންނަނީ ގަޑިއަކު 240 ކިލޯމީޓަށް ޖެހޭ ވައިގެ ކުރިމަތީގައި ހިފަހައްޓާލެވޭ ވަރަށެވެ. އެހެންނަމަވެސް 'ޑޯރިއަން' އެރި އިރު ވައި ޖެހުނީ އެއަށްވުރެ މާ ބާރަށެވެ.
"މި (ޠޫފާނު) މިވަނީ އަހަރުމެންނާ ކުރިން ދުވަހަކުވެސް ކުރިމަތިނުވާ ފަދަ އިމްތިހާނެއް އަހަރުމެންނާ ކުރިމަތިކޮށްފައި. މިއީ ފަހަރެއްގައި އަހަރެން ބަހާމާސްގެ ރައްޔިތުންނާ މުޚާޠަބުކުރާ އެންމެ ހިތާމަވެރި، އެންމެ ދެރަ ދުވަސްކަމުގައި ވެދާނެ." ގައުމީ ޓީވީ މެދުވެރިކުރައްވައި ބަހާމާސްގެ ރައްޔިތުންނާ މުޚާޠަބުކުރައްވަމުން ބޮޑުވަޒީރު ހުބަޓް މިނިސް ވިދާޅުވިއެވެ.
ރޭ ދަންވަރު ލިބުނު ޚަބަރުތައް ބުނާ ގޮތުގައި ޠޫފާން 'ޑޯރިއަން' ހުރީ އެމެރިކާގެ ފްލޮރިޑާ ސްޓޭޓާ 100 ވަރަކަށް ކިލޯމީޓަރު ދުރުގައެވެ.
ފްލޮރިޑާގެ ބައެއް ސަރަހައްދުތަކުން މީހުން ފޭބުމަށް އެ ސްޓޭޓުން މިހާރު ވަނީ އަންގާފައެވެ. އަދި ޠޫފާން އަރާފާނެކަމަށް ސައުތު ކެރޮލައިނާ ސްޓޭޓުގައި ވަނީ ކުއްލި ހާލަތު އިއުލާންކޮށްފައެވެ.
