ފްރާންސްގެ ބިއަރިޓްޒްގައި ކުރިއަށްދާ ޖީ-7 ގައުމުތަކުގެ އެންމެ އިސްވެރިންގެ ބައްދަލުވުން ކުރިއަށް ދަނިކޮށް އީރާނުގެ ޚާރިޖީ ވަޒީރު މުޙައްމަދު ޖާވީދު ޒަރީފު އެތަނަށް ކުއްލި ގޮތަކަށް ވަޑައިގެން ފްރާންސްގެ ރައީސު އިމަނުއެލް މެކްރޯންއާ ބައްދަލުކުރައްވައިފިއެވެ.
ބައްދަލުވުމަށް ވަޑައިގެން ތިއްބެވި ގިނަ ބޭފުންނަށް ހައިރާންކަން ލިބުނު މި ދަތުރުފުޅަކީ ރައީސު މެކްރޯންގެ ދައުވަތަކަށް ޒަރީފު ކުރެއްވި ދަތުރުފުޅެކެވެ.
ދުނިޔޭގައި ވިޔަފާރީގެ ހަތް ބާރު ކަމުގައިވާ ކެނެޑާ، ފްރާންސް، ޖަރުމަނު، އިޓަލީ، ޖަޕާން، އިނގިރޭސިވިލާތް އަދި އެމެރިކާގެ އިސްވެރިންގެ ބައްދަލުވުން ކުރިއަށްދާ ފަރަންސޭސި ރަށް ބިއަރިޓްޒްއަށް ޒަރީފު ވަޑައިގަތީ އިއްޔެއެވެ. އެރަށް ވަޑައިގެން އޭނާ ވަނީ ފްރާންސްގެ ޚާރިޖީ ވަޒީރު ޖީޏް-ޔުވެސް ލެޑްރިއަންއާއެކު ތިން ގަޑިއިރާއި ބައިގެ ބައްދަލުވުމެއް ބާއްވަވާފައެވެ.
ޒަރީފު ވަނީ ފަހުން ރައީސު މެކްރޯންއާ ބައިގަޑިއިރަށް ބައްދަލުކުރައްވާފައެވެ. މިއީ ފާއިތުވި ހަތަރު ދުވަހުގެ ތެރޭގައި ދެ ބޭފުޅުން ބައްދަލުކުރެއްވި ދެވަނަ ފަހަރެވެ.
ރައީސު ޓްރަމްޕްއާއެކު ޖީ-7 ބައްދަލުވުމަށް ވަޑައިގެން ތިއްބެވި އެމެރިކާގެ ބޭފުޅުންނަށް ޒަރީފުގެ ދަތުރުފުޅާ ބެހޭ މައުލޫމާތެއް ކުރިން ލިބިފައި ނެތް ކަމަށް ވެއެވެ.
އެހެންނަމަވެސް، ޓްރަމްޕުގެ ސަރުކާރުގެ އިސްބައެއް ބޭފުޅުން ވިދާޅުވީ، ޒަރީފުގެ ކުއްލި ދަތުރުފުޅުން ރައީސު ޓްރަމްޕަށް ހައިރާންކަމެއް ލިބިވަޑައިނުގަންނަވާ ކަމުގައެވެ. ރައީސު ޓްރަމްޕް ބައިވެރިވެވަޑައިގަންނަވާ ބައްދަލުވުމެއް އޮތް ތަނަނަށް ވަޑައިގަތުމަށް އީރާނުގެ ޚާރިޖީ ވަޒީރު ޒަރީފަށް ދައުވަތު އެރުވީތީ ފްރާންސްގެ އޮފިޝަލުންނާ މެދު އެމެރިކާގެ މަސްއޫލުވެރިން ތިއްބެވީ ވަރަށް ބޮޑަށް ހިތްޕުޅު ހަމަނުޖެހިފައެވެ.
"އެއްވެސް މީހަކު އެކަމަށް އުއްމީދުކޮށްގެން ނެތް. އެއީ ހަމަ ކުއްލި ސިހުމެއް ލިބުނު ކަމެއް." ޒަރީފުގެ ދަތުރުފުޅާ ބެހޭ ގޮތުން އެމެރިކާގެ އޮފިޝަލަކު ވިދާޅުވިއެވެ.
ފްރާންސްގެ ރައީސު މެކްރޯން ގެންދަވަނީ އެމެރިކާއާއި އީރާނުގެ އަރައިރުން ނިމުމަކަށް ގެނެސް އިރާނުގެ ނިއުކުލިޔާ ޕްރޮގްރާމާ މެދު އެއްބަސްވުމަކަށް އާދެވެތޯ މަސައްކަތްކުރައްވަމުންނެވެ.
މެކްރޯންއާ ބައްދަލުކުރެއްވުމަށް ފަހު ޚާރިޖީ ވަޒީރު ޒަރީފު ވިދާޅުވީ މެކްރޯން ހުށަހެޅުއްވީ އީޖާބީ (ޕޮޒިޓިވް) ކަންތައްތަކެއް ކަމަށެވެ .އެހެންނަމަވެސް، އީރާނު ބޭނުންވާ ވަރަށް ގިނަ ކަންކަން އަދި ކުރަން ޖެހޭ ކަމަށެވެ.
