ނަޒާޙަތްތެރި މަޖިލީހަކަށް ފަހިވާ ގޮތަށް ރައްޔިތުންގެ މަޖިލީހުގެ ޤަވާއިދު އިސްލާޙުކުރައްވައި މަޖިލީހަށް ހުށަހަޅުއްވައިފިއެވެ. ނަޒާޙަތްތެރި މަޖިލީހަށް ފަހިވާގޮތަށް ޤަވާއިދަށް ގެންނަވައިފައިވާ އިސްލާޙުތަކުގެ ތެރޭގައި ވަކި ޢަދަދެއްގެ ޖަލްސާއަށް މެމްބަރުން ހާޒިރިވެ ވަޑައިނުގަންނަވާމަ މުސާރައިން ކެނޑޭނެކަމަށް ވަނީ ބަޔާން ކުރައް ވައިފައެވެ. އަދި މެމްބަރުންނާއި މެމްބަރުންގެ އަނބިން ނުވަތަ ފިރިންގެ މާލީބަޔާން ސާއިޢުކުރައްވަން ޖެހޭނެކަމަށް ވެސް ޤަވާޢިދުގައި ބަޔާންކޮށްފައިވެއެވެ.
ރައްޔިތުންގެ މަޖިލީހުގެ ޤަވާއިދު އިޞްލާޙުކުރައްވައިފައި ވަނީ ރައްޔިތުންގެ ޚިޔާލާއި މަޖިލީހުގައި ހިމެނިވަޑައިގަންނަވާ ސިޔާސީ ޕާޓީތަކުގެވެސް ޚިޔާލާއެކު އެޖެންޑާ ނަވާރައިގައި ބުނާ ނަޒާހަތްތެރި މަޖިލީހެއް ޤާއިމު ކުރެއްވޭނެ ގޮތަށްކަމަށް ރައްޔިތިންގެ މަޖިލީހުހެ އާޤަވާއިދު ހުށަހަޅުއްވަމުން ޤަވާއިދު ކޮމެޓީގެ މުޤައްރިރު، މަރަދޫ ދާއިރާގެ މެމްބަރ އިބްރާހީމް ޝަރީފް ވިދާޅުވިއެވެ. މަޖިލީހަކީ ރައްޔިތުންނަށް ފައިދާހުރި ގޮތެއްގައި މަސައްކަތް ކުރެވޭ ތަނަކަށް ހެދުމަށާއި، ހުށަހެޅޭ ކަންކަން ވީހާވެސް އަވަހަށް ނިންމޭ ގޮތަށް ޤަވާއިދުން މަގުފަހިކޮށްދެއްވައިފައި ވާނެކަމަށް މުޤައްރިރު ފާހަގަ ކުރެއްވިއެވެ. ޤަވާޢިދު އިޞްލާޙުކުރައްވައިފައި ވާނީ ފުޅާ ދާއިރާގައި މަޝްވަރާކުރައްވައި އާ ޤަވާޢިދެއްގެ ގޮތުގައި ކަމަށް މުޤައްރިރު ވިދާޅުވިއެވެ.
ޤަވާއިދު މަޖިލީހަށް ހުށަހެޅުއްވުމަށްފަހު މިހާރު ވަނީ މެމްބަރުންނަށް އިޞްލާޙު ހުށަހެޅުމުގެ ފުރުޞަތު ދެއްވައި ފައެވެ. މެމްބްރުން ގެންދަވަނީ ގިނަ ޢަދަދަކަށް އިޞްލާހު ހުށަހަޅުއްވަމުންނެވެ. ބަހުސް ފަށްޓަވާނީ އިސްލާޙުތައް ހުށަހަޅުއްވައި ނިންމެވުމަށްފަހު ކަމަށް ރިޔާސަތުން ވަނީ ވިދާޅުވެފައެވެ. ޤަވާޢިދު އިޞްލާހު ކުރައްވާނީ ބަހުސަށް ފަހުއެވެ.
