ފާއިތުވި އެޕްރީލް މަހު 21 ވަނަ ދުވަހު (އީސްޓާ އާދީއްތަ ދުވަހު) ސްރީލަންކާގެ ބައެއް ފައްޅަތަކާއި، ފަސްތަރީގެ ހޮޓާތަކަށް ދެވުނު ވަރުގަދަ ބޮމުގެ ހަމަލާތަކެއްދީ 258 މީހުން މަރާލައި، 500 އަށްވުރެ ގިނަ މީހުން ޒަޚަމްކޮށްލުމާ ގުޅިގެން އެގައުމުގައި އިއުލާނުކޮށްފައި އޮތް ކުއްލި ހާލަތު އިއްޔެއިން ފެށިގެން ނިމުމަކަށް އަތުވެއްޖެއެވެ.
ހަމަލާތަކުގެ ދެ ދެވަސް ފަހުން، އެޕްރީލް މަހުގެ 23 ވަނަ ރިޔާސީ ގަރާރަކުން އެއް މަސްދުވަހަށް އިއުލާންކުރެވުނު ކުއްލި ހާލަތު ރައީސު މައިތުރިޕާލާ ސިރިސޭނާ ގެންދެވީ ކޮންމެ މަހެއްގެ 22 ދުވަހު އިތުރުކުރައްވަމުންނެވެ. އެހެންނަމަވެސް، ރައީސު އޮފީހުން ކަށަވަރުކޮށްދިން ގޮތުގައި ރައީސު ސިރިސޭނާ އިއްޔެ އެފަދަ ގަރާރެއްގައި ސޮއިކުރައްވާފައި ނުވެއެވެ. އެހެންކަމުން، ކުއްލި ހާލަތު މިވަނީ އަމަލީ ގޮތުން ނިމުމަކަށް އައިސްފައެވެ.
"އިތުރު މުއްދަތަކަށް ކުއްލި ހާލަތު އިތުރުކުރައްވަން ރައީސު އާ ގަރާރެއް ނެރުއްވާފައި ނުވޭ." ރައީސު އޮފީހުގެ މަސްއޫލުވެރިއަކު ވިދާޅުވިއެވެ. ސަރުކާރުގެ ގެޒެޓް ޗާޕްކުރާ ފަރާތުންވެސް ވަނީ އެފަދަ ގަރާރެއް ގެޒެޓްކުރަން އައިސްފައި ނުވާކަން ކަށަވަރުކޮށްދީފައެވެ.
ކުއްލި ހާލަތުގެ ދަށުން ސަލާމަތީ ބާރުތަކުން ގެންދިޔައި ސަލާމަތީ ކަންކަން ވަރުގަދަކޮށް، ހަރުކަށި ޖަމާއަތްތަކަށް ނިސްބަތްވާ މީހުން ކަމަށް ޝައްކުކުރެވޭ މީހުން ހައްޔަރުކޮށް، ޝައްކުކުރެވޭ ތަންތަން ބަންދުކުރަމުންނެވެ. ފާއިތުވި ހަތަރު މަސްދުވަހުގެ ތެރޭގައި ނޭޝަނަލް ތައުހީދު ޖަމާއަތު (އެންޓީޖޭ) އަށް ނިސްބަތްވާ ކަމަށް ޝައްކުކުރެވޭ އެއް ހާހަށްވުރެ ގިނަ މީހުން ވަނީ ހައްޔަރުކޮށްފައެވެ.
ފުލުހުން ބުނެފައިވަނީ ބޮމުގެ ހަމަލާތަކުގެ ބައިވެރިވި އެންމެން މިހާރު ވަނީ މަރުވެފައެވެ. ނުވަތަ ހައްޔަރުކުރެވިފައެވެ.
ކުއްލި ހާލަތުގެ ސަބަބުން ސްރީލަންކާ އަށް އަންނަ ފަތުރުވެރިންގެ އަދަދު މަދުވެފައިވާތީ، ކުއްލި ހާލަތު ނިމުމަކަށް ގެނައުމަށް، ޓޫރަމް ދާއިރާއިން ގޮވާލަމުންނެވެ. ކުއްލި ހާލަތު އުވާލުމަކީ ގައުމު އާދައިގެ ހާލަތަށް އެނބުރި އައިކަން ދޭހަކޮށްދޭ ކަމަކަށް ވާތީއެވެ.
ޓޫރިޒަމް މިނިސްޓަރު ޖޯން އަމަރަތުންގާ ފާއިތުވި ހަފުތާގައި ވިދާޅުވިގޮތުގައި، އޭނާ ވަނީ ކުއްލި ހާލަތު އުވާލެއްވުމަށް ރައީސު ސިރިސޭނާ އަރިހުގައި ދަންނަވާފައެވެ.
