ސޫދާނުގައި މިހާރު ވެރިކަންކުރާ އިންތިގާލީ އަސްކަރީ މަޖިލީހާއި، އަސްކަރީ ވެރިކަން ނިމުމަކަށް ގެންނަން ގޮވާލައި މުޒާހަރާ ކުރަމުން ދިޔަ މީހުންނާ ދެމެދު ސޮއިކުރެވުނު 'ދަސްތޫރީ އިއުލާނު'ގައި އެކުލަވާލަން ބުނެފައިވާ 'ސިޔާދީ މަޖިލިސް' (ސޮވެރިން ކައުންސިލް) އެކުލަވާލައި، އެ މަޖިލީހުގެ މެންބަރުން މިއަދު ހުވައިކުރައްވައިފިއެވެ.
39 މަހުގެއިންތިގާލީ މަރުހަލާގައި ސޫދާނުގައި ވެރިކަންކުރުމަށް އެކުލަވާލީ ސިޔާދީ މަޖިލީހަކީ އަސްކަރީ ފަސް މެންބަރުންނާއި، މަދަނީ ހަ މެންބަރުންގެ މައްޗަށް އެކުލެވޭ މަޖިލީހެކެވެ. އެ މަޖިލީހުން ވެރިކަން ކުރާ 39 މަހުގެ ތެރެއިން ފުރަތަމަ 21 މަހުގައި މަޖިލީހުގެ ރައީސަކަށް ހުންނަވާނީ އަސްކަރީ ބޭފުޅެކެވެ. ބާކީ އޮތް 18 މަސް ދުވަހު ހުންނަވާނީ މަދަނީ ބޭފުޅެކެވެ.
މިއަދު ސިޔާދީ ކައުންސިލްގެ ރައީސެއްގެ ގޮތުގައި ސޫދާނުގެ ޗީފް ޖަސްޓިސްގެ ކުރިފުޅުމަތީގައި ހުވައިކުރެއްވީ މިއަދު އުވާލެވުނު އިންތިގާލީ އަސްކަރީ މަޖިލީހުގެ ރައީސަކަށް ހުންނެވި ޖެނެރަލް ޢަބްދުލް ފައްތާޙު ބުރްހާނެވެ.
މަޖިލީހުގައި ދެން ތިއްބެވި 10 މެންބަރުންގެ ތެރެއިން 9 މެންބަރުން ވަނީ ޗީފް ޖަސްޓިސް ޢައްބާސް ޢަލީ ބާބަކްރުއާއި މަޖިލީހުގެ ރައީސު ޖެނެރަލް ބުހްރާނުގެ ކުރިފުޅުމަތީގައި މަގާމުގެ ހުވައިކުރައްވާފައެވެ. މިއަދު އޮތް ހުވައިކުރުމުގެ ރަސްމިއްޔާތަށް މެންބަރު މުޙައްމަދު ޙަސަން އައްތަޢާޔުޝީ ވަޑައިނުގަންނަވަމެވެ. ޚަބަރު ލިބޭ ގޮތުގައި އޭނާ ފަހުން ހުވައިކުރައްވާ ގޮތަށް ވަނީ ހަމަޖެހިފައެވެ.
އިންތިގާލީ މަރުހަލާގައި ގައުމު ހިންގާނެ ސަރުކާރެއް އެކުލަވާލުމަށްޓަކައި ބޮޑުވަޒީރަކު އައްޔަންކުރުމާއި ގާނޫނުހަދާ މަޖިލީހެއް އެކުލަވާލުމުގެ ޒިންމާ ހަވާލުވެފައިވާ ސިޔާދީ މަޖިލީހުގައި ތިއްބަވަނީ އަންހެން ދެ މެންބަރުންނެވެ. އޭގެ އިތުރަށް ނޫސްވެރިޔަކާއި، ފިޒިކްސް ޕްރޮފެސަރަކާއި، ޤިބްޠީންގެ މީހަކުވެސް މެންބަރުންގެ ތެރޭގައި ހިމެނެއެވެ.
ސިޔާދީ މަޖިލީހުގައި ތިއްބަވާ އަސްކަރީ ފަސް ބޭފުޅުންނަކީ: ޖެނެރަލް ޢަބްދުލް ފައްތާޙު ބުރްހާން، ޖެނެރަލް މުޙައްމަދު ޙަމްދާން ދަޤްލޫ (ޙަމީދަތީ)، ޖެނެރަލް ޔާސިރު ޢަބްދުއްރަޙްމާން އަލްޢަޠާ، ޖެނެރަލް ޝަމްސުއްދީން ކަބާޝީ އިބްރާހީމް އަދި މޭޖާ ޖެނެރަލް އިބްރާހީމް ޖާބިރު ކަރީމް އެވެ.
މަދަނީ މެންބަރުންނަކީ: ޙަސަން މުޙައްމަދު އިދްރީސް ޤާޟީ (ޤާނޫނީ ވަކީލެއް)، ޑރ. އައްޞިއްދީޤު ތާވަރް ކާފީ (ކުރީގެ ސޫދާން ބަޢަޘް ޕާޓީގެ އިސް ބޭފުޅެއް އަދި ފިޒިކްސް ޕްރޮފެސަރެއް)، ޢާއިޝާ މޫސާ ސަޢީދު (އިނގިރޭސި ތަރުޖަމާކުރުމުގެ ތަޖުރިބާކާރެއް)، މުޙައްމަދު އަލްފައްކީ ސުލައިމާން (ނޫސްވެރިއެއް)، މުޙައްމަދު ޙަސަން އައްތަޢާޔުޝީ (ޒުވާނުންގެ ލީޑަރެއް) އަދި ރަޖާ ނިކޮލާ ޢީސާ ޢަބްދުލްމަސީޙު (ޤިބްޠީ އަންހެން ބޭފުޅެއް އަދި ޤާނޫނީ ވަކީލެއް)
މިއަދު ސިޔާދީ މަޖިލިސް ހުވައިކުރުމާއެކު، ސޫދާނު ރައްޔިތުން އަށް މަސްދުވަހު މުޒާހަރާކޮށް، 250 މީހުންގެ ފުރާނަ ގުރުބާންކޮށްގެން ގެންނަން ބޭނުންވި އިންތިގާލީ މަރުހަލާ މިވަނީ ފެށިފައެވެ.
އިންތިގާލީ މަރުހަލާގެ ބޮޑުވަޒީރެއްގެ ގޮތުގައި ހަމަޖައްސަން އެއްބަސްވެފައިވާ ޢަބްދުﷲ ޙަމްދޫކް މާދަމާގެ ވަގުތެއްގައި ބޮޑުވަޒީރު ކަމުގެ ހުވައިކުރެއްވުމަށް ވަނީ ހަމަޖެހިފައެވެ.
