ޔަމަނުގެ ދެކުނަށް ނިސްބަތްވާ ހަނގުރާމަވެރި ޖަމާއަތަކުން ޢަދަނަށް އަރައި ރިޔާސީ ގަނޑުވަރާއި، ސަރުކާރު ސިފައިންގެ އަސްކަރީ ކޭންޕުތައް ހިފައިފިއެވެ. ޢަދަނަކީ ބައިނަލްއަޤްވާމީ ގޮތުން ގަބޫލުކުރާ ޔަމަނު ސަރުކާރުގެ ވަގުތީ ވެރިރަށެވެ.
ސަދަން ޓްރާންސިޝަނަލް ކައުންސިލް (އެސްޓީސީ) ގެ ހަތިޔާރުއެޅި ގޮފި 'ސެކިއުރިޓީ ބެލްޓް'ގެ ތަރުޖަމާނު ބުނި ގޮތުގައި އެމީހުންގެ ހަނގުރާމަވެރިން މަޢާޝީޤު ރިޔާސީ ގަނޑުވަރު ހިފީ ރައީސު ޢަބްދުރައްބޫ ހާދީ މަންޞޫރަށް ވަފާތެރި ސިފައިންގެ ފަރާތުން މާބޮޑު ދިފާއީ ފިޔަވަޅަކާ ކުރިމަތިނުވެއެވެ. ބުނެވޭ ގޮތުގައި އެސްޓީސީއަކީ ޔުނައިޓެޑް އަރަބް އެމިރޭޓްސް (ޔޫއޭއީ) އިން އެހީތެރިވާ ޖަމާއަތެކެވެ.
ޔަމަނު ސަރުކާރުގެ ފޮރިން މިނިސްޓްރީން ނެރުނު ބަޔާނެއްގައި ވަނީ 'ވެރިކަމާ ދެކޮޅަށް ބަޣާވާތްކޮށްގެން އުޅޭ ބައިގަނޑުތަކަށް' އެހީތެރިނުވުމަށް ޔޫއޭއީއަށް ގޮވައިލާފައެވެ.
ސައޫދީ އަރަބިއްޔާއިން ލިބޭ ޚަބަރުތައް ބުނާގޮތުން، ޢަދަނުގައި އޮތް ޔަމަނު ސަރުކާރުގެ އިސް މަސްއޫލުވެރިން މިހާރު ވަނީ ސައޫދީ އަރަބިއްޔާއަށް ގޮސްފައެވެ. ބޮޑުވަޒީރުގެ ނާއިބު އަދި ޚާރިޖީ ވަޒީރު އަޙްމަދު އަލްމައިސަރީއާއި، ދަތުރުފަތުރާ ބެހޭ ވަޒީރު ޞާލިޙު އަލްޖަބަވާނީއާއި، ހަތަރުވަނަ އަސްކަރީ ކޮމާންޑުގެ ވެރިޔާ ސައޫދީ އެއާލާއިނުގެ މަތިންދާބޯޓެއްގައި ސައޫދީ ވެރިރަށް ރިޔާޟަށް ގެންދެވިފައިވާ ކަމަށް ސައޫދީ ބައެއް މަސްއޫލުވެރިންނާ ޙަވާލާދީ އަނަޑޯލޫ ނިއުސް އެޖެންސީން ބުނެފައި ވެއެވެ.
ޔަމަނު ސަރުކާރުގެ ދިފާއުގައި ހަނގުމަކުރާ އަރަބި ކޯލިޝަނުން ވަނީ ޢަދަނުގައި ވަގުތުން ހަނގުރާމަ ހުއްޓާލުމަށް ގޮވައިލާފައެވެ. ސައޫދީ އަރަބިއްޔާއާއި ޔޫއޭއީ ހިމެނޭ ކޯލިޝަންގެ ތަރުޖަމާނު ކާނަލް ތުރްކީ އަލްމާލިކީ އާއި ޙަވާލާދީ ސައޫދީ ނިއުސް އެޖެންސީން ބުނެފައިވާ ގޮތުގައި، ކޯލިޝަނުން ގޮވާލަނީ ޔަމަނުގެ ވަގުތީ ވެރިރަށް ޢަދަނުގައި ހަމަލާ ބަދަލުކުރުން ވަގުން ހުއްޓާލުމަށެވެ." އަދި "މިކަމާ ޚިލާފުވާ ފަރާތްތަކާ ދެކޮޅަށް އަސްކަރީ ބާރު ބޭނުންކުރާނެ" ކަމުގައެވެ.
އަރަބި ކޯލިޝަނުން މި މޭރުމުން ވާހަކަދެއްކި ނަމަވެސް ޔަމަނުގެ ސަރުކާރާ އެ ކޯލިޝަނާ ދެމެދު އޮތް އިތުބާރު މި މައްސަލައާ ގުޅިގެން މި ވަނީ ގެއްލިފައެވެ.
"ކަލޭމެން ތިވަނީ ގާނޫނީ ސަރުކާރުގެ ލޭހޮޅިތައް ބުރިކޮށް ކަތިލާފައި." ކޯލިޝަނާ މުޚާޠަބުކޮށް ޔަމަނުގެ ގާނޫނުހަދާ މަޖިލީހުގެ ނާއިބު ރައީސު ޢަބްދުލްޢަޒީޒު ޖަބާރީ ވިދާޅުވިއެވެ. އޭނާ ތުހުމަތުކުރި ގޮތުގައި ފާއިތުވި ހަތަރު ދުވަހު ދެކުނުގެ ހަނގުރާމަވެރިން ޢަދަނަށް ހަމަލާދިން އިރުވެސް އަރަބި ކޯލިޝަން އޮތީ ހިމޭނުންނެވެ.
އަނެއްކޮޅުން، ޔަމަނު ސަރުކާރު ސިފައިންގެ ސްޕެޝަލް ފޯސަސްގެ ކޮމާންޑަރު މޭޖާ ޖެނެރަލް ފަޟްލު ބާޢިޝް ވަނީ ދެކުނުގެ ހަނގުރާމަވެރިންނާ އޭނާ ގުޅިއްޖެކަން އިއުލާންކޮށްފައެވެ.
