މިނިވަން މުއައްސަސާތަކުގެ މެމްބަރު ކަމަށް ކުރިމަތިލައްވާ ބޭފުޅުންގެ ތެރެއިން ރައީސުލްޖުމްހޫރިއްޔާ މަޖިލީހަށް ފޮނުއްވާ ނަންފުޅުތައް ކޮމިޓީ މަރުޙަލާގައި ދިރާސާކުރާއިރު އެބޭފުޅުން ކޮމިޓީއަށް ގެންނަވައިގެން ކުރައްވާ އިންޓަވިއު ލައިވް ކުރަން މަޝްވަރާ ކުރަމުންދާ ކަމުގައި މިނިވަން މުއައްސަސާތަކާބެހޭ ކޮމިޓީގެ މުޤައްރިރު ރޮޒައިނާ އާދަމް މިރޭ ވިދާޅުވެއްޖެއެވެ.
ރާއްޖެޓީވީގެ "ފަލަސުރުޚީ" ޕްރޮގްރާމްގައި މިރޭ ވާހަކަ ދައްކަވަމުން ރޮޒައިނާ ވިދާޅުވީ މިނިވަން މުއައްސަސާތަކަށް އައްޔަން ކުރެއްވުމަށްޓަކައި ކޮމިޓީން މާކްސްދޭއިރު އިންޓަވިއު ލައިވް ކުރަން ވިސްނާ ސަބަބަކީ ކޮމިޓީގައި ހިމެނިވަޑައިނުގަންނަވާ މަޖިލީހުގެ ހުރިހާ މެމްބަރުންގެ އިތުރުން އާންމު ރައްޔިތުންނަށްވެސް ވީހާބޮޑަށް އެކަން ހިނގައިދާ ގޮތް ސާފުކޮށް އެންގެވުން ކަމަށެވެ.
ރޮޒައިނާ ވިދާޅުވީ އިންޓަވިއުތައް ލައިވް ކުރަން ފެށުމުން ކޮމިޓީ މަރުޙަލާއަށް އެބޭފުޅަކު ވަޑައިގެން ދެއްކެވި ވާހަކަފުޅުތަކާއި މެމްބަރުން ކުރިމަތި ކުރައްވާ ސުވާލުވެސް ރައްޔިތުންނަށް ސާފުވެ، ސޯޝަލް މީޑިޔާގައި ބަޔެއް ބޭފުޅުންނާ ބެހޭގޮތުން ދެކެވޭ ވާހަކަތަކުގެ ހަގީގަތް އެނގިގެންދާނެ ކަމަށެވެ.
ރޮޒައިނާ ވިދާޅުވީ އޭސީސީގެ މެމްބަރު ކަމަށް އައްޔަން ކުރައްވަން ރައީސް ފޮނުއްވި ބޭފުޅުންގެ އިންޓަވިއު ލައިވް ނުކުރެވުނު ނަމަވެސް ދެން ކޮމިޓީގައި އެންމެ އަވަހަށް އޮންނަ އިންޓަވިއުތައް ލައިވް ކުރަން ފެށޭނެކަމުގެ އުންމީދު ބޮޑު ކަމަށެވެ. އެގޮތުން ކޮމިޓީގައި މިހާރު އެންމެ އަވަހަށް ބާއްވަން ތާވަލް ކޮށްފައިވާ އިންޓަވިއުތަކަކީ އިންފޮމޭޝަން ކޮމިޝަނަރު ކަމަށް ކުރިމަތި ލެއްވި ބޭފުޅުންގެ ތެރެއިން މަޖިލީހަށް ރައީސް ފޮނުއްވި ހަތަރު ބޭފުޅުންގެ އިންޓަވިއުއެވެ. ރޮޒައިނާ ވިދާޅުވީ އީދު ބަންދަށް ފަހު މަޖިލީހުގެ މަސައްކަތް ފެށުމާއެކު އެ އިންޓަވިއުތައް ކުރިޔަށް ގެންދަން މިހާރު ވަނީ ތާވަލް ކޮށްފައި ކަމަށާއި އެ އިންޓަވިއުތަކާ ހަމައިން ލައިވް ކުރުން ފެށޭނެ ކަމަށެވެ.
މިނިވަން މުއައްސަސާތަކުގެ ތެރެއިން އޭސީސީއަށް 5 މެމްބަރުން އައްޔަން ކުރުމަށްޓަކައި މިނިވަން މުއައްސަސާތަކާބެހޭ ކޮމިޓީން އިންޓަވިއުކޮށް މާކްސް ދިންގޮތާމެދު މަޖިލީހުގެ ބަޔެއް މެމްބަރުންގެ މެދުގައިވެސް ޚިޔާލުތަފާތުވުން އުފެދިފައިވާއިރު ރޮޒައިނާ ވިދާޅުވީ އިންޓަވިއުތައް ލައިވް ކުރަން ފެށުމުން އެފަދަ ޝަކުވާތައް މަދުވެ، ހަގީގަތް ފެނިގެންދާނެ ކަމަށެވެ.
ރައްޔިތުންގެ މަޖިލީހުގެ ޖަލްސާތަކާއި ބަޔެއް ކޮމިޓީތަކުގެ ބައްދަލުވުންތައް މީގެކުރިން ލައިވް ކުރަމުން ދިޔަނަމަވެސް މިނިވަން މުއައްސަސާތަކަށް ކުރިމަތި ލައްވާ ބޭފުޅުންގެ އިންޓަވިއު މީގެކުރިން ދުވަހަކުވެސް މަޖިލީހުން ލައިވް ކޮށްފައިނުވެއެވެ.
މިނިވަން މުއައްސަސާތަކުގެ ތެރެއިން ބަޔެއް ކޮމިޓީތަކަށް މެމްބަރުން އައްޔަން ކުރެއްވުމުގެ ކަންކަމާއި ވަކިކުރެއްވުމުގެ ކަންކަން މަތިކޮށްފައި ވަނީ މަޖިލީހުގައި އަލަށް އުފެއްދެވި ކަމާގުޅުން ހުރި ބަޔެއް އެހެން ކޮމިޓީތަކަށެވެ. މިނިވަން މުއައްސަސާތަކާބެހޭ ކޮމިޓީގެ ބެލުމުގެ ދަށުގައިވެސް ހަތް މުއައްސަސާއެއް އޮވެއެވެ.
