ފިއްލަވައިގެން ޓަގު ބޯޓެއްގައި އިންޑިޔާއަށް އެތެރެވެވަޑައިގަންނަވަން އުޅުއްވަނިކޮށް އިންޑިޔާއިން ހިފަހައްޓައި ރާއްޖެ ފޮނުވުމާލުމާއި ގުޅިގެން ރޭގެ ވަގުތެއްގައި ރާއްޖެ ގެނެސް ބަންދުގައި ބަހައްޓަން މުއްދަތު އިތުރު ކުރަން ކްރިމިނަލް ކޯޓަށް ގެންދިޔުމުން އަދީބު ހައްޔަރުކުރީ ބައިނަލް އަޤްވާމީ ކަނޑުގެ ސަރަހައްދުން ކަމަށްވުމާއެކު އެއީ ޤާނޫނާ ޚިލާފަށް ކުރި ހައްޔަރެއް ކަމަށްބުނެ ރޭ މިނިވަންކުރި އަދީބު އަނެއްކާވެސް ކޯޓު އަމުރެއްގެ ދަށުން ހައްޔަރުކޮށް ދޫނިދޫއަށް ގެންގޮސްފިއެވެ.
ރޭ 10:30 ހާއިރު ބަންދުގެ މުއްދަތު އިތުރުކުރަން ކްރިމިނަލް ކޯޓަށް އަދީބު ގެންދިޔުމުން އެ ކޯޓުން ނިންމީ ފުލުހުން އަދީބު ހައްޔަރުކުރީ ރާއްޖޭގެ ކަނޑުގެ ސަރަހައްދުން ނޫން ކަމަށް ހައްޔަރުކުރި ފުލުހުންނާއި ޕީޖީންވެސް އެއްބަސްވުމާއެކު މިވަގުތު ހައްޔަރުގައި ބަހައްޓަން މުއްދަތު އިތުރު ކުރެވެން ނެތް ކަމަށެވެ. އެހެންވެ ކޯޓުން ރޭ އަމުރު ކޮށްފައި ވަނީ ވަގުތުން އަދީބު މިނިވަން ކުރުމަށެވެ. އެއާއެކު އަދީބު ވަނީ އެމަނިކުފާނު ދިރިއުޅުއްވާ ގެޔަށް ވަޑައިގެންފައެވެ.
ކްރިމިނަލް ކޯޓުން ރޭ އަދީބު މިނިވަން ކުރުމާއެކު ފުލުހުން ދެން މަސައްކަތް ކުރަމުން ދިޔައީ ހައްޔަރު ކުރުމުގެ އިތުރު ކޯޓު އަމުރެއް ހޯދާށެވެ. އަދީބު އަލުން ހައްޔަރުކޮށް ދޫނިދޫއަށް ގެންދިޔަ ކަމަށްވަނީ މިއަދު ހެނދުނުގެ ވަގުތެއްގައެވެ. ފުލުހުން އަދީބު ހައްޔަރުކުރީ އަލުން ކޯޓު އަމުރެއް ހޯދައިގެންނެވެ. އަލުން ހައްޔަރުކޮށްގެން ގެންދެވުނީ އަދީބު ދިރިއުޅުއްވާ ގޭގައި ހުންނަވަނިކޮށެވެ.
ފުލުހުން އަދީބު ހައްޔަރު ކުރުމުގެ ކޯޓު އަމުރަކަށް އެދިފައި ވަނީ ޕާސްޕޯޓް ހިފަހައްޓާފައި ވަނިކޮށް ރާއްޖެއިން ބޭރަށް ވަޑައިގެންނެވުމާއި، ޖިނާއީ މައްސަލައެއްގައި ކުށަށް އަމިއްލަފުޅަށް އިއުތިރާފުވެވަޑައިގަތުމަށް ފަހު ކޯޓަށް ވަޑައިގެން ހެކިބަސް ދެއްވަން އެއްބަސްވުމެއްގައި ސޮއި ކުރެއްވުމަށް ފަހު ފިއްލެވުމާއި ގުޅިގެންނެވެ. އަދި އަދީބު ދޫކޮށްލާފައި ބަހައްޓައިފިނަމަ އޭނާގެ މައްޗަށް ތުހުމަތު ކުރެވޭ ޖިނާއީ މައްސަލަތަކުގެ ހެކިންނަށް ނުފޫޒު ފޯރުއްވަފާނެތީއެވެ.
