ރުވާންޑާގެ ވެރިރަށް ކިގާލީގައި ބޭއްވުނު މޮންޓްރިއަލް ޕްރޮޓޮކޯލްގެ 28 ވަނަ މީޓިންސް ތޮފް ދަ ޕާރޓީސްގައި އެ މުއާހަދާގެ ތެރެއިން ހައިޑްރޯ ފުލޮރޯ ކާބަންސް (އެޗް.އެފް.ސީ) މަދުކުރުމަށް ފާސްކޮށްފިއެވެ. 'ކިގާލީ އެމެންޑްމެންޑް'ގެ ދަށުން އެޗް.އެފް.ސީ މަދު ކުރުމަށް ބައިނަލްއަގްވާމީ ފެންވަރުގައި ދުނިޔޭގެ 197 ގައުމުންވަނީ އެއްބަސްވެފައިއެވެ. މިގޮތުން ދުނިޔޭގެ ކުރިއަރާފައިވާ ގައުމުތަކުން 2019 ވަނަ އަހަރުން ފެށިގެން އެމާއްދާތައް މަދުކުރުމަށް މަސައްކަތް ފަށަންޖެހެއެވެ. އަދި ތަރައްގީވަމުން އަންނަ ގައުމުތަކުން 2024 އަދި 2028 ގައި އެޗް.އެފް.ސީ ބޭނުންކުރުން ކޮންޓްރޯލްކޮށް މަދުކުރަން ފަށަންވަނީ އެއްބަސްވެފައިއެވެ. މިއަދު ފާސްކުރި އެއްބަސްވުމުގެ ސަބަބުން ދުނިޔެ ހޫނުވުން 2 ޑިގުރީ ސެލްސިއަސްގެ ތެރޭގައި ހިފެހެއްޓުމަށް ކުރަމުންދާ މަސައްކަތަށް އިތުރު ބާރުވެރިކަމެއް ލިބިގެންދާނެއެވެ.
މިބައްދަލުވުމުގައި ރާއްޖެއިން ބައިވެރިވި ވަފުދުގެ އިސްވެރިއަކަށް ވަޑައިގެންނެވީ މިނިސްޓްރީ އޮފް އެންވަޔަރަންމަންޓް އެންޑް އެނަރޖީގެ ސީނިއަރ ޕޮލިސީ އެގްޒެކެޓިވް ޑރ އަބްދުﷲ ނަސީރުއެވެ. މިބައްދަލުވުމުގެ ހައި-ލެވެލް ސެގްމަންޓްގައި ވާހަކަފުޅު ދައްކަވަމުން ރާއްޖެފަދަ ކުދި ޖަޒީރާ ގައުމަކަށް މިފަދަ އެއްބަސްވުމެއްގެ މުހިއްމުކަމަށް ޑރ ނަސީރު އަލި އަޅުވާލިއެވެ. އަދި މީގެ އިތުރުން މަސްވެރިކަމުގެ ދާއިރާގައި ބޭނުންކުރާ ފިނިކުރާ ނިޒާމްތަކުގައި ތިމާވެއްޓާއި ރައްޓެހި އަދި އޯޒޯން ފަށަލައަށް ގެއްލުން ކުޑަ މާއްދާތައް ބޭނުންކުރުމަށް ހުރި ގޮންޖެހުންތައް ފާހަގަކޮށް، މޮންޓްރިއަލް ޕްރޮޓޮކޯލްގެ ތެރެއިން ރާއްޖެފަދަ ގައުމުތަކަށް އެހީތެރިކަން ފޯރުކޮށްދިނުމަށް ގޮވާލެއްވިއެވެ.
އެޗް.އެފް.ސީ އަކީ ޖައްވު ހޫނުވުމަށް ބާރުއަޅާ، އޭގެ ސަބަބުން މޫސުމަށް ބަދަލުގެނުވާ މާއްދާއެކެވެ. އަދި މި މާއްދާ މައިގަނޑު ގޮތެއްހައި ބޭނުންކުރަނީ ފިނިކުރާ ނިޒާމް ތަކުގައެވެ. ދިރާސާތަކުން ދައްކާގޮތުގައި އެޗް.އެފް.ސީ އެދެވޭ ގޮތެއްގައި ކޮންޓްރޯލްކޮށް މަދުކޮށްގެން 0.5 ޑިގުރީ ސެލްސިއަސްއާއި ބަރާބަރު އަދަދަކަށް ދުނިޔެ ހޫނުވުން އިތުރުވިޔަ ނުދީ ހިފެހެއްޓޭނެއެވެ.
މޮންޓްރިއަލް ޕްރޮޓޮކޯލްއަކީ ދުނިޔޭގެ އޯޒޯން ފަށަލަ ހިމާޔަތްކުރުމަށް 1987 ވަނަ އަހަރު އެކުލަވާލި ބައިނަލްއަގްވާމީ މުއާހަދާއެވެ. މިމުއާހަދާގެ ދަށުން 2008 ވަނަ އަހަރު ރާއްޖެއިންވަނީ ސީ.އެފް.ސީ ބޭނުންކުރުން ހުއްޓާލާފައިއެވެ. މިއީ ރާއްޖެއިން މިމާއްދާ ހުއްޓާލަންޖެހޭ މުއްދަތުގެ ދެއަހަރު ކުރިން ހާސިލްކޮށްފައިވާ ކާމިޔާބީއެކެވެ. ރާއްޖެއިން މިހާރު އަމާޒުކުރަމުންދަނީ އެޗް.ސީ.އެފް.ސީ 2020 ގައި ހުއްޓާލުމަށް މަސައްކަތްކުރަމުންނެވެ.
