2016 ވަނަ އަހަރުގެ ދުނިޔޭގެ އެއް ވަނަ ޔުނިވަރުސިޓީއަކަށް އިނގިރޭސި ވިލާތުގެ އޮކްސްފޯޑް ޔުނިވަސިޓީ ހޮވިއްޖެއެވެ. އޮކްސްފޯޑަށް މި ވަނަ ލިބިފައި ވަނީ ލަންޑަނުގައި ނެރޭ މަޖައްލާއެއް ކަމުގައިވާ "ޓައިމްސް ހަޔަރ އެޑިއުކޭޝަން" އިން ކޮށްފައިވާ ދިރާސާއަކުންނެވެ. މިއީ އެ މަޖައްލާއިން ކޮންމެ އަހަރަކު އެއް ފަހަރު ކުރާ ދިރާސާއެކެވެ.
މިއީ އެމެރިކާއިން ބޭރުގެ ޔުނިވަރުސިޓީއަކަށް އެއް ވަނަ ލިބުނު ފުރަތަމަ ފަހަރެވެ. ފާއިތުވެ ދިޔަ އެތައް އަހަރަކު އެއް ވަނަ ހޯދާފާއި ވަނީ ކެލިފޯނިއާ އިންސްޓިއުޓް އޮފް ޓެކްނޮލޮޖީއެވެ. މި އަހަރު އެ ތަނަށް ލިބިފައި ވަނީ ދެވަނަ އެވެ. މި ދިޔަ އަހަރުވެސް އަދި މި އަހަރުވެސް ތިން ހޯދާފައި ވަނީ ކެލިފޯނިއާގެ ސްޓެންފަޑް ޔުނިވަސިޓީންނެވެ.
ލިސްޓުގެ އެންމެ ކުރީގައި އޮތް 10 ޔުނިވަރުސިޓީގެ ތެރެއިން އެމެރިކާއިން ބޭރުގެ އިތުރު ތިން ތަނެއް ހިމެނިފައި ވެއެވެ. އެއީ ހަތަރު ވަނައިގައި އޮތް ކެމްބްރިޖް ޔުނިވަސިޓީ (އިނގިރޭސި ވިލާތް) އާއި، އަށް ވަނައިގައި އޮތް އިމްޕީރިއަލް ކޮލެޖް (ލަންޑަން) އާއި، ސްވިސް ފެޑެރަލް އިންސްޓިއުޓް އޮފް ޓެކްނޮލޮޖީ (ޒިއުރިކް) އެވެ.
ލިސްޓުގެ އެންމެ ކުރީގައި އޮތް 50 ތަނުގެ ތެރެއިން ދެބައިކުޅަ އެއް ބަޔަކީ އެމެރިކާގެ ތަންތަނެވެ.
ފާއިތުވީ އަހަރު ތަކަށް ބަލާއިރު އޭޝިއާގެ ޔުނިވަރުސިޓީތަކުން ވަނީ އެކަށިގެންވާ ފަދަ ކުރިއެރުމެއް ހޯދައިފައެވެ. މަޖައްލާއިން ސިފަ ކޮށްފައިވާ ގޮތުގައި ދުނިޔޭގެ ތަޢުލީމުގެ ބޮޑު ބާރަކަށް އޭޝިއާ ވުމުގެ ކޮޅުމަތި މިހާރު ދަނީ ފެންނަމުންނެވެ. އޭޝިއާގައި ހުރި ކަމަށް ދައްކާ ފެންވަރު ރަނގަޅު 290 ޔުނިވަރުސިޓީއެއް މި ލިސްޓުގައި ހިމެނިފައި ވެއެވެ. އެއީ 24 ގައުމަކުންނެވެ.
ލިސްޓުގައި އޭޝިއާގެ ތަނެއް ހިމެނިފައިވާ އެންމެ މަތީ ވަނައަކީ 24 އެވެ. އެއީ ސިންގަޕޫރުގެ ނޭޝަނަލް ޔުނިވަސިޓީއެވެ. ޗައިނާގެ ޕީކިންގ ޔުނިވަސިޓީ އޮތީ 29 ވަނައިގައެވެ. ޖަޕާނުގެ ޔުނިވަސިޓީ އޮފް ޓޯކިޔޯ އޮތީ 39 ވަނައިގައެވެ.
ވަނަތައް ހޮވާން "ޓައިމްސް ހަޔަރ އެޑިއުކޭޝަން" އިން ބަލާ މިންގަނޑުތަކުގެ ތެރޭގައި ކިޔަވާ މާހައުލާއި، ދިރާސާތައް ކުރެވޭ މިންވަރާއި، އާމްދަނީ ހޯދާ މިންވަރާއި، މަގުބޫލުކަން ހުރި މިންވަރާއި، ދުނިޔޭގެ ފެންވަރުގައި ދިރާސާތައް ބަލައިގަންނަ މިންވަރާއި، ދަރިވަރުންނާއި، މުވައްޒަފުންނާއި، ދިރާސާގެ ފެންވަރު ބައިނަލްއަގުވާމީ ފެންވަރުގައި ހިފެހެއްޓިފައި އޮންނަ ފެންވަރު ހިމެނެއެވެ.
އަންޑަރ ގްރެޖުއޭޓް ދަރިވަރުންނަށް ކިޔަވައި ނުދޭ ތަންތަން މި ލިސްޓުގައި ނުހިމަނައެވެ. އަދި 2011 ވަނަ އަހަރާއި 2015 އަހަރާ ދެމެދު 1000 އަށްވުރެ މަދުން ދިރާސާ ލިޔުން ޝާއިޢު ކޮށްފައިވާ ތަންތަންވެސް ނުހިމަނައެވެ. މީގެ އިތުރަށް 80 އިންސައްތަ ދިރާސާ ކޮށްފައި ވަނީ ހަނި ދާއިރާއެއްގައި ކަމުގައި ވެއްޖެ ނަމަވެސް މި ލިސްޓުން ނަން އުނިކޮށްފައި ވެއެވެ.
"ޓައިމްސް ހަޔަރ އެޑިއުކޭޝަން" ގެ ލިސްޓު ބައްލަވައިލައްވާން މިތަނަށް ފިއްތަވައިލައްވާ.
