އެންޓި ކޮރަޕްޝަން ކޮމިޝަން (އޭސީސީ) ގެ ނައިބު ރައީސް ކަމުގައި ކުރިން ހުންނެވި މުޙަންމަދު މުއައްވިޒު އެކޮމިޝަނުގެ ރައީސް ކަމަށް އައްޔަން ކުރުމާއެކު ހުސްވެފައިވާ ނައިބު ރައީސް ކަމުގެ މަގާމަށް ކޮމިޝަނުގެ މެމްބަރު އައިމިނަތު މިންނާ ހަމަޖައްސައިފިއެވެ.
މައުލޫމާތު ލިބިފައިވާ ގޮތުގައި ކޮމިޝަނުގެ ނައިބު ރައީސް ކަމަށް މިންނާ ހޮވީ މިއަދު ބޭއްވި ކޮމިޝަނުގެ ބައްދަލުވުމެއްގައި މެމްބަރުން ނެގި ވޯޓުގައި ބައިވެރިވެވަޑައިގެންނެވި މެމްބަރުންގެ އިއްތިފާގުންނެވެ.
އޭސީސީގެ މަގާމަށް މިންނާ ހަމަޖެއްސިއިރު މުއައްވިޒު ރައީސް ކަމަށް ހަމަޖައްސާފައި ވަނީ ކޮމިޝަނުގެ ރައީސް ކަމުގައި ހުންނެވި ހަސަން ލުތުފީ ދާދިފަހުން މަގާމުން އިސްތިއުފާ ދެއްވާފައިވާތީއެވެ. ލުތުފީ މަގާމުން އިސްތިއުފާ ދެއްވީ އޮފީހަށް ނުކުމެވަޑައިގަތުން ހުއްޓާލެއްވިޔާ މަސްތަކެއް ފަހުންނެވެ. ނަމަވެސް އޮފީހަށް ނުނުކުންނަވައިވެސް މުސާރަ ނަންގަވަމުން ގެންދެވި މައްސަލަ ވަނީ ފެންމަތި ވެފައެވެ.
އޭސީސީގެ މެމްބަރުންގެ ގޮތުގައި މިވަގުތު ތިއްބެވި މެމްބަރުންގެ ދައުރުވެސް މިއަހަރުގެ ސެޕްޓެމްބަރު މަހު ހަމަވާނެއެވެ. ސެޕްޓެމްބަރު 9 ވަނަ ދުވަހު އޭސީސީއަށް އާ މެމްބަރުން އައްޔަން ކުރުމަށްޓަކައި އޭސީސީގެ މެމްބަރު ކަމަށް ކުރިމަތިލުމުގެ ފުރުޞަތުވެސް ރައީސް އޮފީހުން ދާދިފަހުން ވަނީ ހުޅުވާލާފައެވެ.
