އޭއެފްސީ އޭޝިއަން ކަޕް ކޮލިފިކޭޝަންގެ ޕްލޭއޯފް ފުރަތަމަ ލެގުގައި މިރޭ ލާއޯސް އާ ދެކޮޅަށް ކުޅުނު މެޗު ރާއްޖެ ކާމިޔާބުކޮށްފިއެވެ.
ގައުމީ ފުޓްބޯޅަ ދަނޑުގައި މިރޭ ކުޅުނު މެޗު، ލާއޯސްގެ މައްޗަށް ރާއްޖެ ކާމިޔާބުކުރީ ފަސޭހަކަމާއެކު 4-0 ނަތީޖާއަކުންނެވެ. މެޗުގެ ފެށުމާއެކުވެސް ގޭމް ކޮންޓްރޯލްކޮށް ގިނަ ވަގުތު ބޯޅަ ހިފަހައްޓައިގެން ކުޅުނީ ރާއްޖެއެވެ.
މެޗުގެ ފުރަތަމަ ލަނޑު ރާއްޖެ ކާމިޔާބުކުރީ މެޗުގެ 14 ވަނަ މިނެޓުގައެވެ. އެއީ އަލީ ފާސިރު (ސެންޓޭ) އޭރިއާތެރެއިން ލިބުނު ބޯޅައެއް ވަރަށް ހުސްކޮށް ގޯލްތެރެއަށް ފޮނުވާލައިގެން އޭނާ ޖެހި ވަރަށް ރީތި ލަނޑެކެވެ. މެޗުގެ ފުރަތަމަ ހާފު ނިމިގެންދިޔައީ 1-0 ލަނޑުން ރާއްޖެ ކުރީގައި އޮވެގެންނެވެ. ފުރަތަމަ ހާފުގައި ރާއްޖެއަށް ނުރައްކާކުރެވޭވަރުގެ ޙަމަލާއެއް ލާއޯސްއަކަށް އުފެއްދިފައެއް ނުވެއެވެ.
ދެވަނަ ހާފުފެށުމާއެކުވެސް ރާއްޖެއިން ގޭމުގެ ކޮންޓްރޯލް ހޯދައި ލާއޯސްއަށް ނުރައްކާކުރަންފެށިއެވެ. ނަތީޖާއެއްގެގޮތުން މެޗުގެ 61 ވަނަ މިނެޓުގައި ރާއްޖޭން ވަނީ ދެވަނަ ލަނޑު ޖަހައި ދެލަނޑުގެ ލީޑެއް ހޯދައިފައެވެ. މިލަނޑު ކާމިޔާބުކޮށްދިނީ ކެޕްޓަން އަލީ އަޝްފާޤު (ދަގަނޑ)ޭއެވެ.
މިރޭގެ މެޗުގައި ދަގަނޑޭ އަށް ވަނީ ވަރަށް ހުސްކޮށް ގޯލްޖަހާނެ ރަނުގެ ފުރުސަތުތަކެއް ލިބި ބޭކާރުވަފައެވެ. ދަގަނޑޭގެ ލަނޑަށްފަހު މެޗުގެ 87 ވަނަ މިނެޓުގައި ރާއްޖޭގެ ތިންވަނަ ލަނޑު ކާމިޔާބުކޮށްދިނީ ބަދަލު ކުޅުންތެރިއެއްގެ ގޮތުގައި ދެވަނަ ހާފުގައި ކުޅެން ނުކުތް ހުސައިން ނިޔާޒް މުހައްމަދު (ބޮކުރީ)އެވެ. ރާއްޖޭގެ ފަހު ލަނޑު ކާމިޔާބުކޮށްދިނީ މެޗުގެ ދެވަނަ ހާފުގެ އިތުރު ވަގުތުކޮޅު ތެރޭގައި ރާއްޖެ އުފެއްދި ޙަމަލާއަކުން ދަގަނޑޭއެވެ.
އޭއެފްސީ އޭޝިއަން ކަޕް ކޮލިފިކޭޝަންގެ ޕްލޭއޯފްގެ ދެވަނަ ލެގު މެޗު ކުޅުމަށް ހަމަޖެހިފައިވަނީ ލާއޯސްގައެވެ. ރާއްޖެ އާއި ލާއޯސް ބައްދަލުކުރާ އެ މެޗު ކުޅުމަށް ހަމަޖެހިފައިވަނީ އަންނަ މަހު 11 ވަނަ ދުވަހުއެވެ. އެ މެޗަށްފަހު، އެގްރިގޭޓުން ކުރީގައި އޮންނަ ޓީމަކަށް އޭޝިއަން ކަޕް ކޮލިފިކޭޝަންގެ ގްރޫޕް ސްޓޭޖުން ޖާގަ ލިބޭނެއެވެ.
