މާފަންނު މާވެޔޮ މިސްކިތުން ވެއްޓުނު ބިއްލޫރި ޝީޓަކުން ޖެހި ދެ މީހަކަށް އަނިޔާވެއްޖެ ކަމަށް ފުލުހުން މަޢުލޫމާތު ދެއްވައިފިއެވެ.
މި ޙާދިސާގެ މަޢުލޫމާތު ފުލުހުންނަށް ލިބިފައިވަނީ މިއަދު ހެނދުނު 10:07 ގައި ކަމަށާއި އަނިޔާ ވެފައިވަނީ އެ މިސްކިތުގައި މަސައްކަތް ކުރަމުންދިޔަ ދެ ބިދޭސީއަކަށް ކަމަށް ވެސް ފުލުހުން ވިދާޅުވިއެވެ. ދެ މީހުންނަށް ވެސް ބޮޑު އަނިޔާއެއް ލިބިފައެއް ނުވެއެވެ. އެމީހުންވަނީ އައިޖީއެމްއެޗް އަށް ގެންގޮސް ފަރުވާދީފައެވެ.
މި ހާދިސާގައި އެކަކުގެ އުނަގަނޑަށް ތަދުވެ އަނެއް މީހާގެ އިނގިއްޔެއް ކަފައިގެން ގޮސްފައިވާ ކަމަށް ވެސް ފުލުހުން ވިދާޅުވިއެވެ. ޙާދިސާ ހިނގި އިރު ދެ މީހުންވެސް ތިބީ ސޭފްޓީ ހެލްމެޓު އަޅައިގެންނެވެ.
ބިއްލޫރި ޝީޓު ވެއްޓުނީ އެ މައްޗަށް ނަގަން އުޅުމުގެ ތެރޭގައި ކަމަށް ވެސް ފުލުހުން ވިދާޅުވިއެވެ.
