އިންޑިޔާ ކަނޑުގައި އިނގިރޭސިން އެމެރިކާއަށް ކުއްޔަށް ދީފައިވާ އަސްކަރީ މަރުކަޒުއޮންނަ ޑިއޭގޯ ގާސިޔާ ހިމެނޭ ފޯޅަވަހި (ޗާގޯސް އާކިޕެލަގޯ) މޮރިޝަސްއާ "ވީ އެންމެ އަވަހަކަށް" ހަވާލުކުރުމަށް ގޮވާލާ ގަރާރެއް ޔުނަޓެޑް ނޭޝަންސް (އެކުވެރިދައުލަތްތައް -އދ.) ގެ އާއްމު މަޖިލީހުގެ ބޮޑު އަޣުލަބިއްޔަތަކުން ފާސްކޮށްފިއެވެ.
މޮރިޝަސްއާ އެރަށްތައް ހަވާލުކުރުމަށް އިނގިރޭސިވިލާތަށް އަންގައި އިއްޔެ އދ. ގެ އާއްމު މަޖިލީހުގައި ނެގި ވޯޓުގައި 193 ގައުމުން ބައިވެރިވިއިރު، 116 ގައުމުން ވަނީ އެގަރާރާ އެއްކޮޅަށް ވޯޓުދީފައެވެ. އިނގިރޭސި ވިލާތަށް ތާއީދުކޮށް، ގަރާރާ ދެކޮޅަށް ވޯޓުދިނީ އެންމެ 6 ގައުމެވެ. އެއީ އެމެރިކާއާއި، އިނގިރޭސިވިލާތާއި، ހަންގޭރީއައި، އިސްރާއީލާއި، އޮސްޓްރޭލިޔާއާއި، ދިވެހިރާއްޖެއެވެ. 56 ގައުމަކުން ވޯޓުގައި ބައިވެރިނުވެއެވެ. އެއީ މައިގަނޑުގޮތެއްގައި ޔޫރަޕުގެ ގައުމުތަކެވެ.
އާއްމު މަޖިލީހުން ފާސްކުރާ ގަރާރުތަކަށް އަމަލުކުރުން މެންބަރު ގައުމުތަކުގެ މައްޗަށް ލާޒިމެއް ނޫނެވެ. އެހެންނަމަވެސް، އެ ގަރާރުތަކަކީ ވަކި މައްސަލައެއްގައި ދުނިޔޭގެ ގައުމުތަކުން ދެކޭގޮތް ދައްކައިދޭ މުހިއްމު ގަރާރުތަކެކެވެ.
މޮރިޝަސްއިން ބުނަނީ 1965 ވަނަ އަހަރު އިނގިރޭސިވިލާތުން އެގައުމު މިނިވަންކުރީ ބަދަލުގައި ގަދަކަމުން ޗާގޯސް އާކިޕެލަގޯ އަތުލައިގެންނެވެ. އިނގިރޭސިން ބުނަނީ އެ ރަށްތައް ނެގީ މޮރިޝަސްއަށް 3 މިލިއަން ޕައުންޑު (58 މިލިއަން ރުފިޔާ) ގެ ބަދަލެއް ދީފައި ކަމުގައެވެ.
އިއްޔެގެ ގަރާރާ ގުޅިގެން އިނގިރޭސިވިލާތުގެ ފޮރިން އެންޑް ކޮމަންވެލްތު އޮފީސް (އެފްސީއޯ) އިން ނެރުނު ބަޔާނެއްގައި ބުނީ، ފޯޅަވަހީ މައްޗަށް މޮރިޝަސްގެ މައްޗަށް މޮރިޝަސްގެ ސިޔާދަތު (ސޮވްރެންޓީ) އޮތްކަމަށް އިނގިރޭސިވިލާތުން އެއް ދުވަހަކުވެސް ގަބޫލުނުކުރާ ކަމުގައެވެ. އެހެންނަމަވެސް، ދިފާއީ ބޭނުމަށްޓަކައި އެރަށްތަކުގެ ބޭނުން ނުހިފޭ ދުވަހެއް އައުމުން އެރަށްތައް މޮރިޝަސްއާ ހަވާލުކުރަން ތައްޔާރުކުރަން އޮތްކަމުގައެވެ.
1965 ވަނަ އަހަރު އިނގިރޭސިން މޮރިޝަސް މިނިވަންކުރި އިރު، ފޯޅަވަހި އެގައުމާ ވަކިކޮށް، އެ ރަށްތަކުގެ ތެރެއިން އެންމެ ބޮޑު ރަށް ޑިއޭގޯ ގާސިޔާގައި ވަނީ އެމެރިކާގެ ބޮޑު އަސްކަރީ މަރުކަޒެއް ގާއިމުކޮށްފައެވެ. އެ މަރުކަޒު ހަދަންވެގެން އެ ރަށްތަކުގައި ދިރިއުޅުނު ހާހެއްހާ މީހުންވަނީ ބޭރުކޮށްލާފައެވެ.
އިނގިރޭސިން ބްރިޓިސް އިންޑިއަން އޯޝަން ޓެރިޓަރީގެ ނަންދީފައިވާ ފޯޅަވަހީގެ ޑިއޭގޯ ގާސިޔާގައި 1971 ވަނަ އަހަރުން ފެށިގެން ހިންގަނީ އެމެރިކާގެ އަސްކަރީ މަރުކަޒެކެވެ. އެ މަރުކަޒު ވަނީ އެމެރިކާ ސިފައިން އަފްޣާނިސްތާނާއި، އިރާގުގައި ކުރި ހަނގުރާމަތަކުގައި ބޮޑު ދައުރެއް އަދާކޮށްފައެވެ.
އައްޑޫ ސިޓީގެ ގަމުގެ ދެކުނުން 450 ކިލޯމީޓަރު ދުރުގައި އޮންނަ ފޯޅަވައްސަކީ 15 ހާސް އަކަ ކިލޯމީޓަރުގެ ސަރަހައްދަކަށް ފެތުރިފައިވާ 60 ރަށުގެ މައްޗަށް އެކުލެވޭ ރަށްތަކެކެވެ. ބިމުގެ ސަރަހައްދުގެ ބޮޑުމިނަކީ 56 އަކަ ކިލޯމީޓަރެވެ. އެންމެ ބޮޑު ރަށް، ޑިއޭގޯ ގާސިޔާގެ ބޮޑު މިނަކީ 32 އަކަ ކިލޯމީޓަރެވެ. އެރަށް ފިޔަވައި އެހެން ރަށްރަށަކީ ކުދި ފަޅު ރަށްރަށެވެ.
2016 ވަނަ އަހަރު އިނގިރޭސިވިލާތުން ވަނީ އެމެރިކާއަށް ޑިއޭގޯ ގާސިޔާ ކުއްޔަށްދީފައިވާ މުއްދަތު 2036 އާ ހަމައަށް އިތުރުކޮށްފައެވެ.
