ފާއިތުވި އެޕްރީލް މަހު ރައީސު ޢުމަރު ޙަސަން އަލްބަޝީރު މަގާމުން ދުރުކޮށް ގެނައި އަސްކަރި އިންގިލާބަށްފަހު އެގައުމުގައި ވެރިކަން ކުރަމުންދާ އިންތިގާލީ އަސްކަރީ ކައުންސިލާއި، މަދަނި ވެރިކަމަކަށް ގޮވާލައި އިހުތިޖާޖުކުރަމުންދާ ޖަމާއަތްތައް އެއްބަސްވުމަކަށް އަތުވެއްޖެއެވެ.
މިއަދު(ބުދަ ދުވަހު) ފަތިހު އިއުލާންކުރި އެއްބަސްވުމުގައި ވަނީ ތިން އަހަރު ދުވަހުގެ އިންތިގާލީ މަރުހަލާއެއް ކަނޑައަޅާފައެވެ. ތިން އަހަރަށް ފަހު މުޅިން މަދަނީ ސަރުކާރަކާ ވެރިކަން ހަވާލުކުރެވޭނެއެވެ.
މި އެއްބަސްވުމުގެ ދަށުން ވެރިކަން ހިންގާނެ ސޮވެރިން ކައުންސިލަކާއި، ވަޒީރުންގެ މަޖިލީހަކާއި، ގާނޫނު ހަދާ މަޖިލީހެއް އުފައްދާނެއެވެ. ގާނޫނުހަދާ މަޖިލިސް އެކުލެވިގެންވާނީ 300 މެންބަރުންގެ މައްޗަށެވެ. އެތަނުން 67 މެންބަރުން އައްޔަންކުރާނީ އިހުތިޖާޖުކުރާ މީހުންގެ ފަރާތުން ވަކާލާތުކުރާ އެލާޔަންސް ފޯ ފްރީޑަމްއިންނެވެ. ބާކީ ގޮނޑިތައް ދެނޭ އެހެން ސިޔާސީ ޕާޓީތަކަށެވެ.
އިންތިގާލީ މަރުހަލާގެ ފުރަތަމަ ހަ މަސް ދުވަސް ކަނޑައަޅާފައިވަނި ސަރުކާރާ ދެކޮޅަށް ހަނގުރާމަކުރާ ހިތިޔާރުއެޅި ޖަމާއަތްތަކާއި މަޝްވަރާކޮށް ސުލްހައިގެ އެއްބަސްވުންތައް އެކުލަވާލައި، ގައުމުގައި ސުލްހަ ގާއިމުކުރުމަށެވެ.
ބުދަ ދުވަހު ފަތިހު ނޫސްވެރިންނާ ވާހަކަދައްކަވަމުން އިންތިގާލީ އަސްކަރީ ކައުންސިލްގެ މެންބަރު ޔާސިރު އަލްޢަޠާ ވިދާޅުވީ "އެއްބަސްވުން ސަލާމަތުން ފުރިހަމަ ގޮތުގައި ތަންފީޒުކޮށް 24 ގަޑިއިރުގެ ތެރޭގައި ރައްޔިތުންގެ އުއްމީދުތައް ހަގީގަތަކަށް ހަދައިދިނުމަށް ވައުދުވާ" ކަމުގައެވެ. އޭނާ އިޝާރާތްކުރެއްވީ ސޮވެރިން ކައުންސިލާއި، ވަޒީރުންގެ މަޖިލިސް އެކުލަވާލުމަށެވެ.
އެލާޔަންސް ފޯ ފްރީޑަމް އެންޑް ޗޭންޖްގެ ފަރާތުން ވާހަކަދެއްކެވި މަދަނީ ޢައްބާސް މަދަނީ ވިދާޅުވީ "ސޮވެރިން ކައުންސިލްގައި ތިއްބަވާނީ އިންތިގާލީ އަސްކަރީ ކައުންސިލްގެ މެންބަރުންނާއި އެލާޔަންސްގެ މެންބަރުން" ކަމުގައެވެ. އޭނާ އިތުރަށް ވިދާޅުވިގޮތުގައި ވަޒީރުންގެ މަޖިލީހުގެ މެންބަރުން އައްޔަންކުރާނީ އެލާޔަންސުގެ ފަރާތުންނެވެ.
މި އެއްބަސްވުން އިއުލާންކުރުމާއެކު ޑިފެންސް މިނިސްޓްރީގެ ކުރިމަތީގައި އޮތް މައިދާނުގައި އެޕްރީލްމަހުގެ 6 ވަނަ ދުވަހުއްސުރެ އިހުތިޖާޖުކުރަމުން ދިޔަ މީހުން ވަނީ އުފާފާޅުކުރަން ފަށާފައެވެ.
އަސްކަރިއްޔާއާއި، އިހުތިޖާޖުކުރާ މީހުންގެ މެދުގައި ނުތަނަވަސްކަން އިތުރުކޮށް ހަމަނުޖެހުމުން އުފެއްދުމުގެ މަގުސަދުގައި އިއްޔެރޭ 'ގޮތް ނޭނގޭ ބަޔަކު ވަނީ މީހުންގެ ތެރެއަށް ބަޑިޖަހައި އާއްމުންގެ 5 މީހަކާއި އަސްކަރީ އޮފިސަރަކު މަރާލާފައެވެ. މިމައްސަލަ ތަހުގީގުކުރުމަށް ދެފަރާތް އެކުވެގެން މިހާރު ވަނީ ކޮމިޓީއެއް އެކުލަވާލާފައެވެ.
