މާލޭގެ ގާތްގަނޑަކަށް 30000 ގޭބީސީ ހުރިއިރު އޭގެތެރެއިން ވެމްކޯގައި ރަޖިސްޓްރީ ކޮށްފައިވަނީ ވިހި ހާސް ގޭބިސީކަމަށާއި، ބާކީ ދިހަހާސް ގޭބިދީ ރަޖިސްޓްރީ ކޮށްފައި ނުވާކަމަށް ވެމްކޯއިން މިއަދު ވިދާޅުވެއްޖެއެވެ.
ވެމްކޯއިން މިއަދު ބޭއްވި ނިއުސްކޮންފަރެންސެއްގައި އެކުންފުނީގެ މެނޭޖިން ޑިރެކްޓަރ އާދަމް މުޙައްމަދު ވިދާޅުވީ ވެމްކޯއާއެކު އެއްވެސް ރަޖިސްޓްރީ ކޮށްފައިވާ ބައެއް ފަރާތްތަކުން ވެސް އެކުންފުންޏަށް ފައިސާ ނުދައްކައި ގިނަ ދުވަސްތަކެއް ވެފައިވާ ކަމަށެވެ. އެހެންވުމުން އެކުންފުނީގެ މުވައްޒަފުން ކުރާ މަސައްކަތަށް އުޖޫރަ ލިބިފައި ނުވާ ކަމަށެވެ. އޭގެ ސަބަބުން ކުންފުންޏަށް ގެއްލުންވާ ކަމަށް ވެސް އޭނާ ވިދާޅުވިއެވެ.
"ވަރަށް ގިނަ ޢަދަދެއްގެ ގޭބީސީތައް ވަރަށް ދިގު ޒަމާންތަކެއް ވަންދެން މިއޮތީ އަޅުގަނޑުމެންނަށް ފައިސާ ނުދައްކައި. އެހެން އެކަން ދިމާވެގެން ދިޔައީމަ އަޅުގަނޑުމެން ރައްޔިތުންނަށް ދޭންޖެހޭ ޚިދުމަތްތައް ވަރަށް ބޮޑަށް ދަތިވެގެން މި ދަނީ، އަދި ކުންފުނި ހިންގުމަށް ބޭނުންވާ ފައިސާއާއި އަޅުގަނޑުމެން ކުރާ މަސައްކަތަށް ލިބެންޖެހޭ އުޖޫރަ ނުލިބި މި އޮންނަނީ." އާދަމް ވިދާޅުވިއެވެ.
މިފަދަ މައްސަލަ ދެނެގަތުމަށް ވެމްކޯއިން މިއަދުވަނީ މާލޭގައި ސާވޭއެއް ފަށައިފައެވެ. މި ސާވޭގައި މަސައްކަތްކުރާނީ ވެމްކޯގެ މުވައްޒަފުންނެވެ. ވެމްކޯއަށް ދައްކަންޖެހޭ ފީ ނުދައްކައި އެކުންފުނިން ޚިދުމަތް ހޯދުމާއި ރަޖިސްޓްރީ ނުކުރާ ގޭބިސީތަކުން އެކުންފުނި މެދުވެރިކޮށް ކުނި އުކަމުންދާ މައްސަލަތައް ދެނެގަނެ މި ސޭވޭގެ ތެރެއިން އެކަންކަން ޙައްލު ކުރުމަށް މަސައްކަތް ކުރައްވާނެ ކަމަށް ވެމްކޯއިން ވަނީ ވިދާޅުވެފައެވެ. މި މާކެޓު ސާވޭ ހަމަހަށް ދެމިގެންދާނެއެވެ.
އެމްޑީ ވިދާޅުވީ މޭލޭގައި ކޮމާޝަލް ޔުނިޓުގެ ގޮތުގައި 11000 ތަން އެބަހުރި ކަމަށެވެ. އޭގެ ތެރެއިން ވެމްކޯއާއެކު އެއްވެސްވެ އެގްރީމެންޓް ހަދާފައިވަނީ 1500 ތަނުން ކަމަށެވެ. އެހެންނަމަވެސް އެހެން ހުރިހާތަނަކުން ވެސް ވެމްކޯއަށް ކުނި އަންނަމުން (ޖަމާކުރަމުން) ދާ ކަމަށް އެމްޑީ ވިދާޅުވިއެވެ. މިއީ ޙައްލުކުރަންޖެހިފައިވާ ބޮޑެތި މައްސަލަތައް ކަމަށް ވެސް އެމްޑީ ވިދާޅުވިއެވެ.
