އައްޑޫ ސިޓީ ހިތަދޫގައި ހިންގާ އިކޮނޮމިކް މިނިސްޓްރީގެ ބިޒްނަސް ޑިވެލޮޕްމެންޓް ސެންޓަރުން ވަގަށް ނަގައިފައިވާ ތިޖޫރި ހޯދައިފި ކަމަށް ފުލުހުން ވިދާޅުވެއްޖެއެވެ.
މިމަހު 5 ވަނަ ދުވަހު ވަގަށް ނަގައިފައިވާ ތިޖޫރި ފެނިފައިވަނީ ހިތަދޫ ރިޖަނަލް ހޮސްޕިޓަލާ ދިމާ ފުއްޓަރުފަރާތު ވަލުން ކަމަށް ފުލުހުން ވިދާޅުވިއެވެ. ފުލުހުން ވިދާޅުވީ ތިޖޫރި ފެނިފައިވަނީ ލިބުނު އިންޓަލިޖެންސް މަޢުލޫމާތަކާ ގުޅިގެން އެތަން ބަލައި ފާސްކުރަމުން ދަނިކޮށް ކަށެވެ.
ތިޖޫރި ފެނުނުއިރު އޭގައި އެއްވެސް ފައިސާއެއް ނެތެވެ. ބިޒްނަސް ސެންޓަރުން ވިދާޅުވީ ތިޖޫރި ވަގަށް ނެގިއިރު އޭގައި 51000 އަށްވުރެ ގިނަ ރުފިޔާ ހުންނާނެ ކަމަށެވެ.
ވައްކަމުގެ މި މައްސަލައިގެ ތުހުމަތުގައި މިހާތަނަށް އެއްވެސް މީހަކު ބަންދު ކޮށްފައި ނުވާކަމަށް ވެސް ފުލުހުން ވިދާޅުވިއެވެ.
